Read zande Yoere 3 Bible Online

Yoere 3 - zande bible

Yoere 3

¹“Bambiko mo ngére, rogo agu auru re na ti gu rago re, ho mi ka karaga Yuda ni na Yerusarema gene zia yo yo,

²mi adúngura arikaaboro dunduko, ki ye na yo ku rogo ga Yosafata ngboongboorago, mi ki tona sara ngbanga yo yo, tipa gimi aboro na gimi mosoro nga aYisaraere, bambiko i gbandaka yo dagba arikaaboro, ki kparaka gi ringara,

³ki ba ake tipa gimi aboro, ki unda kumbagude na debari, ki bagi degude tipa imekakue, ka mbira ha.

⁴“Ako Tura na Sidona, gini he nga oni fere, na agu angbi dunduko nga ga ringara aFereseto? Oni natumo fere berewe tipa he? Ka si adu wa oni natumo fere, mi aira bape gaoni mangaapai kina ku ri roni ni ba sa sa ni ipiipi he.

⁵Bambiko oni di gi feda na gi dahabu, ki ndu na gimi kikiipaahe ku rogo ga gaoni mbori abambu yo.

⁶Oni bagi awiri aYudo na awiri Yerusarema fu aGiriki, ki nigbisi yo tuturu ti gayo bangbandarago.

⁷Awere mi awó ti yo rogo agu aba bagi oni yo ku ho ni, mi ki iri bape gaoni mangapai kina ku ri roni.

⁸Mi abága awironi nga akumba na agu awironi nga ade ku be awiri aYudo, i ki bagi yo fu aSebo, fu rikaaboro tuturũ; bambiko Yekova gumba ha wo.”

⁹Oni táki pande gere dagba arika aboro: Oni mbakadi pa sovura, oni wó ti airanyaka. Abasovura dunduko yé mbembedi, i yé kono.

¹⁰Oni táki gaoni marã sopabino wa abaasape, na gaoni marã kuya ngua wa abaso; rurungbura boro yá, “Mi nga boro sovura.”

¹¹Oni ípisi tironi ki ye, oni arikaaboro dunduko du kirikiri, oni dungura tironi koyo. Ako Yekova, Mo yé na gamo aborosovura kono.

¹²Arikaaboro zíngisi tiyo, ki ye kono ku rogo ga Yosafata ngboongboorago yo; bambiko yo mi ka sunga ni ka sapa ngbanga arikaaboro dunduko du kirikiri.

¹³Oni rogo sape, bambiko regbo ke ahe da. Oni rími ku bapira ahe yo ki nisimbi bakakue, bambiko bapira imekakue hi. Awari hiki ki niukaga, bambiko gayo gbigbitaapai ni dungu he.

¹⁴Arimbasa, arimbasa aboro rogo ngboongboorago ba siaapai yo! Bambiko rago Yekova nambeda rogo ngboongboorago ba siaapai yo.

¹⁵Uru na diwi bisi, akerekuru mbu hasa rago.

¹⁶Yekova napaa Siona yo, ki gumba gako fugo Yerusarema yo, angbangbaturũ na kpotosende ki nizigizo tihe. Ono Yekova nga nyanyaki bagbuko fu gako aboro, ni nyanyaki gbata fu awiri aYisaraere.

¹⁷“Si du oni ka ina ha ti ni ya mi nga Yekova nga gaoni Mbori, naraka Siona yo, nga gi ziazia bagangara. Yerusarema adú ni kparakpara ziazia ba ka kungba aboro asúsa nga rogo ho berewe ya.

¹⁸“Ti gu rago re abaagangara aúka nzinziri imekakue, mamuanya ki nifu ku ri agangara, agu awiri agene ime du Yuda yo dunduko ime afúka rogo ho; gugaabi akúra rogo ga Yekova bambu yo ki nitudi gu ngboongboorago nga Sitimi.

¹⁹“Ringara Ezipeta asá tihe ni gbara sigbarasi he, Edome ki du ni vurubate ngbakungba, bambiko gu zuu i amangi he kuti awiri aYudo, bambiko i auka kure wenesa rogo gayo ringara.

²⁰Ono aboro aráka Yuda yo nye anye kindi, na Yerusarema yo ki da ti nyasa arikaaboro dunduko.

²¹Mi aíra bape kureyo, ka mi ambú nga gu ni du na pai ku ri ni ya, bambiko Yekoba naraka Siona yo.”