Read zande Amosa 2 Bible Online

Amosa 2 - zande bible

Amosa 2

¹Ya Yekova wẽ: “Tipa samungu bara biata nga ga Moaba, na tipa biama a, mi asá nga gako mbusa te; bambiko ko azo ameme bakindo aEdome si ki sa tihe wa gbitiri kuamba.

²Si du mi ka keda we ti ni ku ri Moaba, si ki riti gu nyanyaki abaagbata du Keriota yo, Moaba akpi rogo gbarakagbaraka pai, na tawawa na woro nambongo;

³mi abáfa gaha basapungbanga ku sa yo, ki imi gaha abazogo dunduko na ko,” wo poi Yekova.

⁴Ya Yekova wẽ: “Tipa samungu bara biata nga ga Yuda, na tipa biama a, mi asá nga gaha mbusa te; bambiko i agindiga ga Yekova rugute, ka i aka nga kuti gako rugapai ya, ono gayo azire ki ingisi yo, nga gu abayo anapeka fuo ho.

⁵Si du mi ka keda we ti ni ku ri Yuda, si ki riti gu nyanyaki abaagbata du Yerusarema yo.”

⁶Ya Yekova wẽ: “Tipa samungu bara biata nga ga Yisaraere, na tipa biama a, mi asá nga gaha mbusa te; bambiko i bagi ruru boro tipa feda, na irazingohe tipa katara―

⁷i nga agu yo simbi ri rurungbura aboro ku nvutu yo, ki aria bayee aboro ku bani ngba gayo gene; kumba rimi fuo kina gu paranga de sa na bako, ka gbarasa kparakpara ziazia rimore;

⁸i piki pati bamotumo dunduko auru aroko i nizi ni ũngbaanga; rogo ga gayo Mbori bambu yo i nambira imekakue nga ga agu aboro gbarasi yo ngbanga fu yo.

⁹“Ono mi agbarasi aAmoro bara bangiriyo, du basona yo wa angua kedara, i adu nyanyaki wa gero; mi agbarasi gayo zuzu ahe ari yo, na gayo tarã ahe du tii sende yo.

¹⁰Mi aye na oni a ringara Ezipeta yo, ki ngbe fu roni ku mbata yo garã ki du 40 ku ngbakungba yo, oni di gu ringara ni gaoni nga ga aAmoro.

¹¹Mi ki sa agu awironi ni anebi, na gu gaoni aparanga ni aNazara. Ako awiri aYisaraere, a nga si wo ni rengo te?” wo poi Yekova.

¹²“Ono oni afu imekakue fu aNazara i mbiri he, ki rugu anebi, niya, ‘Ka oni nigúmba nga pai ya.’

¹³“Oni ngére, mi agbíngbida roni ku ba roni, wa ũtinda ahe nagbingbida sende nga gu hi be vodivodi zende ahe.

¹⁴Bata anyása be aboro oto, iranyaka anyákasa nga gani ome te, iraome abátasa nga ungani a te;

¹⁵gu ni nagbe mboto arú nga te, na gu ni ipi na nduni abátasa nga tini te, gu ni nga banduri farasi abátasa nga ungani a te;

¹⁶na gu ni nga ngangarã boro kpotoni yo dagba airaome aóra ni gu uru re ni kina kundiri ni ku sa yo,” wo poi Yekova.