Read zande Amosa 3 Bible Online

Amosa 3 - zande bible

Amosa 3

¹Ako oni nga awiri aYisaraere, oni gi gi pai gumba Yekova kuti roni re, kuti agu arika ngbatunga aboro dunduko mi aye na yo ringara Ezipeta yo:

²“Kina roni sa mi aini roni dagba agu arika ngbatunga aboro dunduko du auru kpotosende; si du mi ambúsa roni ti ni tipa gaoni irairaapai dunduko.

³“A nga aboro ue nata gene sa, kina gu ka i ringbisi pa ha mbata te?

⁴Ka bahu gbungu bire yo ho u azia nga zizi he ni ya? Ka paranga bahu poi sima ru yo, wa u azia nga he ya?

⁵Ka zire zi ti gbina sande, ho adu nga gbina ni sa ru ya? Ka gbina za sande, ho si azia nga he ni ya?

⁶Ka i vudi nambongo rogo bakporo, ka aboro akio nga ya? Ka gbigbitapai ti ku rogo bakporo, kina gu ka Yekova mangi he te?

⁷Ni rengo Yekova MBORI amanga nga pai te, zanga kusa gako rondo fu gako amoyambu nga anebi.

⁸Bahu gbungu; da agúnde nga ya? Yekova MBORI gumba pai, da rengbe ka zanga gumba pai?”

⁹Oni táki pande pai fu nyanyaki abaagbata Asedodo yo, na fu nyanyaki abaagbata ringara Ezipeta yo, ki ya, “Oni dúngura tironi ku ri agu abaagangara yo du Somorona yo, ka bi gu bakere gbarakagbaraka apai du rogo ho, na agu arungosi du rogo ho.”

¹⁰“Agu yo oko zuu ki igi údĩ ku rogo gayo nyanyaki abaagbata, i aina nga waĩ ka i mangi rurupai te,” wo poi Yekova.

¹¹Si du ya Gbia MBORI wẽ: “Boro ake pati ringara kirikiri, ki rogo gaoni baome ti roni, i agbú gaoni nyanyaki abaagbata.”

¹²Ya Yekova wẽ: “Wa babanda akandoro nibatasi ndu kandoro ue ngba bahu watadu mbarakata turu, wo awiri aYisaraere ka bata na kina kitiri bakpanga na bete pa barame be yo, nga agu yo naraka Somorona yo,”

¹³Ya Gbia MBORI, nga Mbori nga ga arimbasa ko wẽ, “Oni gi he, ki gumba pai kuti ngbatunga Yakoba,

¹⁴ti gu uru mi ka mbusa aYisaraere tipa gayo samungu, mi ambúsa agu abamotumo nga ga Betere, agu agbanga du ti bamotumo akáfa ki tiwi ku sande.

¹⁵Mi agbárasa gu bambu du tipa ragozere na gu bambu du tipa faarago; agu abambu du ni rindi mbarã anyása, pa abaabambu ki go a,” wo poi Yekova.