Read zande Amosa 7 Bible Online

Amosa 7 - zande bible

Amosa 7

¹Were Gbia MBORI ayugu pai fere: oni ngére, ko namanga ayere ti rago kura akpe ahe nga ga yangara rúkurúku ahe; oni ngére, si nangia gu nakuru fuo de yo ga bakindo anvuo.

²Ho ami anyasi rita nvuo ni nga ga ringara, mi ki ya, “Ako Gbia MBORI, mi nazungadi ro, mo vú yo! Waĩ rengbe Yakoba ka ru? Ko ni wiri toni ko!”

³Yekova ki birĩ tiko tipa gere; “Si amánga nga te,” wo poi Yekova.

⁴Were Gbia MBORI ayugu pai fere: oni ngére, Gbia MBORI ayamba he tipa sarangbanga ni we, si ki nyoto gu dudu ngura baime ki niri ringara.

⁵Mi ki ya, “Ako Gbia MBORI, mi nazungadi ro, mo mbú pa ha! Waĩ rengbe Yakoba ka ru? Ko ni wiri toni ko!”

⁶Yekova ki birĩ tiko tipa gere; “Gere amanga nga a te,” wo poi Gbia MBORI.

⁷Ko ki yugu pai fere: oni ngére, Gbia aru pati vuro bambu i adua ha kuti giri ringbisa gene, giri ringbisa gene ki du be ko.

⁸Yekova ki ya fere, “Amosa, gine mo abi he?” Mi ki ya, “Giri ringbisa gene.” Yekova ki ya, “Mo ngére, mi nataã giri ringbisa gene dagba gimi aboro aYisaraere; mi ambú nga pai fu yo berewe te;

⁹gu tumbatumba arago nga ga Yisaka adú ni bate, gu kparakpara rago nga ga Yisaraere adú ni gbarasigbarasi he, mi azinga kuti ngbatunga Yerobama na basape.”

¹⁰Amasaya nangia boromotumo Betere yo ki kedi sunge koyo du Yerobama ni nga bakindo ku ri aYisaraere, niya, “Amosa ta bura ro dagba ngbatunga aYisaraere yo; ringara arengba nga na gako gumbagumba apai dunduko te.

¹¹Bambiko wo gumba Amosa ha, ‘Yerobama akpi ngba basape, aYisaraere ka ndu ni zizi yo ku sa yo ti gayo ringara.’ ”

¹²Amasaya ki ya fu Amosa, “Ako babiapai, mo ndú, mo óro ku ringara Yuda yo, ka ri riahe yo, ki gumba pai yo;

¹³ono ka mo gumba nga pai berewe Betere yo ya, bambiko si nga ga bakindo kparakpara rago, si ki ngia ga bakindo ngbi.”

¹⁴Amosa ki karaga ha fu Amasaya ki ya, “Nebi nga mi te, wiri nebi a te; ono mi nga babanda anya ni babanda angua wa birikita,

¹⁵Yekova ki di re pati peka fuo rimbasa anya, Yekova ki ya fere, ‘Mo ndú ka gumba pai fu gimi aboro aYisaraere.’

¹⁶“Awere mo gí sangba Yekova. Mo naya, ‘Ka mo gúmba nga pai kuti aYisaraere ya, ka mo túngusi nga pai kuti ngbatunga Yisaka ya.’

¹⁷Si du ya Yekova wẽ: ‘Diaro adú ni debari rogo bakporo, awiro nga akumba akpi ngba basape na agu awiro nga ade, i akpáraka rogo ga ringara ni giri ringbisa ahe; mo akpi tigamo rogo bibiriko ringara, aYisaraere andú ni zizi yo ni rengo ku sa yo ti gayo ringara.’ ”