Read zande Amosa 8 Bible Online

Amosa 8 - zande bible

Amosa 8

¹Were Gbia MBORI ayugu pai fere: oni ngére, baga du na zuzu angua nga ga faarago rogo.

²Ko ki ya, “Amosa, gine mo abi he?” Mi ki ya, “Baga du na zuzu angua nga ga faarago rogo.” Yekova ki ya fere, “Digida rago da ku ri gimi aboro aYisaraere; mi ambú nga pai fu yo berewe te.

³Agu abia nga ga yekaru adú ni kpe wawa ti gu rago re,” wo poi Gbia MBORI; “kangba aboro adú ni dungu he; i abáfa ha dú rogo arago dú ku sa yo, niya, ‘Oni ongo kii.’ ”

⁴Oni gi gere, agu roni nasimba ri airazingohe, ki nyasi pa rungorungo aboro du ringara yo,

⁵niya, “Fogo diwi ati ni gini rago, ya ani bagi zende ahe berewe? Na rago sabiti, ya ani kusi nganu i ngbe he, ani ki sa efa ni toni he ki sa sekere ni bakere he, ki mangi pai ni biriki na iraira úringbisaahe,

⁶ani ki ngbe rungorungo aboro na feda na irazingohe na katara sa, ki bagi umu nganu a?”

⁷Yekova zunga he tipa gu ruka nga ga Yakoba: “Ni rengo bangire ago nga ti gu mangaapai nga gayo te.

⁸Ringara akio nga tipa gi pai te re? na agu aboro naraka rogo ho i akpara nga ni nunga ni ba sa sa te? si ahí nga dunduko wa di nga Nire te? ki nipangura kirikiri ki niugudi berewe, wa Nire du Ezipeta yo te?

⁹“Ti gu rago re, mi amánga uru si ki ti kina bebere uru,” wo poi Gbia MBORI, “mi ki birisi kpotosende rogo baima uru.

¹⁰Mi asá gaoni apumbo wa rago kparakpe ni nunga, na gaoni abia dunduko ni bia akpe; mi ayé na mbuzaroko ku dimoroni dunduko, na kpatakpa ku ri aboro dunduko ni ba sa sa; mi asá pa gu rago re wa rago kpe nunga tipa kpio bangisa gude, digidaha adú ni kere rago.

¹¹“Oni ngére, arago naye,” wo poi Gbia MBORI, “ho mi ka keda ngbongi ni ku rogo ringara; ngbongi riahe te, ngbongi gomoro ime a te, ono ngbongi pa gia agu apai nga ga Yekova.

¹²I andú tona ti gu baime sa gu baime, tona nodiyo ku uroyo; i aóra ku bani na ku bani, ka gbata gu pai nga ga Yekova, ono i abi nga ha te.

¹³“Ti gu rago re wene ngasu ade na paranga akumba he amáka yo be gomoro ime.

¹⁴Agu yo nazunga he ti rimo Asima du Somorona yo, ki ya, ‘Ako Dana, wa du ga mbori ni ungaha,’ na, ‘Wa gu sino nga ga Bera-saba du ni ungaha,’ i ati wa, ka i agúari nga berewe ya.”