Read zande Amosa 9 Bible Online

Amosa 9 - zande bible

Amosa 9

¹Mi abi Yekova ko ru pati bamotumo, ko ki ya: “Mo tá angua ri angbadimo daho mburu barima ka wo ni, mo kúadi he ku ri aboro dunduko; agu yo ka bati dagba yo yo mi aimo yo ni basape; gu ni aóra nga dagba yo yo ku sa yo wa sa te, ka gu ni amérã nga dagba yo yo wa sa a ya.

²“Ka i vura ge due ku Baatoro kpikpi aboro yo vurũ, bere aróga yo aroga yo; ka i vura bita ku ngbangbaturũ yo vurũ, mi azóga yo yo ku sande.

³Ka i vura oka tiyo ku ri Karumera yo vurũ, mi agbáta yo yo ki rogo yo aroga yo; ka i vura gbu ti bangire ku mburu baime yo vurũ, mi agúmba pai fu wo yo, u ki de yo.

⁴Ka i vura ndu ni zizi yo ku bara bangiri avurayo vurũ, mi agúmba pai fu basape yo, si aimo yo; mi amáa bangire ku ti yo tipa gbigbitapai, tipa wenepai te.”

⁵Gbia, nga MBORI nga ga arimbasa ko, nga gu ko nazada kpotosende si ki nizaraga, agu yo naraka rogo ho ki nikpari ni nunga, agu ahe dunduko nga gaha ki hi wa ime di nga Nire, ki ugudi berewe, wa Nire du Ezipeta yo;

⁶nga gu ko nadua gako avuru bambu du ku ari kina ku angbangbaturũ yo, ki dua gako mburuhe auru kpotosende; nga gu ko nayamba aime baime si ye ki niukaga ha ku ri kpotosende Yekova nga rimoko.

⁷“Ako awiri aYisaraere, a nga oni wa aboro Etiopia fere te?” wo poi Yekova. “A nga mi naye na awiri aYisaraere ringara Ezipeta yo te, na aFereseto Kafatoro yo, na aSurio Kiri yo te?

⁸Oni ngére, bangiri Gbia MBORI du ti gu ngbi du na ingapai, mi agbarasa ha auru kpotosende ku sa yo; ono ka mi agbárasa nga ngbatunga Yakoba kpakaya ya,” wo poi Yekova.

⁹Bambiko oni ngére, mi arúga pai, ki igita ngbatunga aYisaraere dagba arikaaboro dunduko, wa boro naigita he ti kangira, ono ka wiri nzakara ha ati nga ku auru kpotosende ya.

¹⁰Aboro ingapai dunduko dagba gimi aboro akpi ngba basape, nga agu yo naya, “Gbigbitapai adúsia nga rani ki gbia rani a te.”

¹¹“Ti gu rago re mi atúmba gu basura nga ga Dawidi nga gu nati, ki mbakadi abangirihe, ki tumba gu kurukakuruka apaha, ki dua ha berewe wa si adu ti agu arago naadu mbata;

¹²ya i di gu yangara yo nga ga Edome yo ni gayo yo, na agu arikaaboro dunduko nga agu yo i ayambu yo ti rimore,” wo poi Yekova nga gu ko namanga gere.

¹³“Oni ngére, arago naye,” wo poi Yekova, “ho basopobino ka peka fuo bakeahe ni bapiri imekakue ki peke fuo barútunga; nzinziri imekakue ki nitogo ti abaagangara, si ki nifu ti agangara dunduko a.

¹⁴Mi akáraga gu zizi yo dagba gimi aboro aYisaraere yo, i ki dua gu gbarasigbarasi abaakporo berewe ki niraki rogo ho; i arúka bakakue aati yo ki nimbiri gaha imekakue, i asópa abino ki niri zuzu ahe.

¹⁵Mi amáa yo rogo gayo ringara, ka i aróga nga yo rogo gu ringara fu mi fu yo berewe ya,” wo poi Yekova ga Mbori.