Read zande Obadaya 1 Bible Online

Obadaya 1 - zande bible

Obadaya 1

¹Gu yuguyugupai Obadaya abi he. Were poi Yekova tipa aboro Edome: Ani gi pangbanga ngba Yekova, ko kedi mokedi ku dagba arikaaboro yo ki ya, “Oni gúari ke! ani gúari kuti yo ni vura!”

²Oni ngére, mi asá roni ni umba roni dagba arikaaboro yo, i apáyasi pa roni dunduko.

³Gu ruka nga ga kpotoroni yo nangi roni, agu roni naraka rogo sapusapu ambia, du gaoni baraka ku ari, naya ku kpotoroni yo, “Da nikazoga rani ku sande?”

⁴Ka oni vura gu ku ari yo wa dingimo vurũ, ka oni vura maa gaoni bambu dagba akerekuru yo, mi azóga roni azoga yo ku sande, wo poi Yekova.

⁵Ka airadĩ aye koyo du mo ni, ka ngia abatuka yuru― ati i adĩ he rengbe tipa kina yo te? Na gbarasa yo roni! Ka abadungura bakakue aye koyo du oni ni, i mbu nga bete futu bakakue fu roni te?

⁶Na gbu yo ga Esau ahe! i gbata gako igiigi kikiipaahe!

⁷Agu aboro dunduko oni amangi mokido na yo, i do roni kina ku bangbandarago yo; agu aboro oni angba na yo i nangi roni ki di be roni; agu yo nari riahe na oni, i re gbina kuti roni― boro ho rugu tini na pa ha wa sa te.

⁸Ati mi amánga pai ni gu rago re? wo poi Yekova, ki gbarasi airatatamana Edome yo, na pa rugatinapai Bagangara Esau yo?

⁹Ako Temana, gamo airanyaka ayúngura, si du i ka roga aboro ti ni dunduko ku sa yo Bagangara Esau yo ni imo yo.

¹⁰Bambiko gu pai i amangi he ni zuu fu tamero nga Yakoba, kina zee nikamanga ro tipa ha, i adía ro ku sa yo nye anye kindi.

¹¹Ni gu rago re mo akpara tiro ki ru ku sa yo, ni gu rago re akare atindi gako ahe ku sa yo, kungba aboro ki rimi ti gako angbadimo bakporo ki ba ake tipa Yerusarema, mo adu wa gu ni sa dagba yo yo.

¹²Ono si arengba nga mo sambua tiro tipa pa tamero rago gako rungo te; ka mo angi nga ku ri awiri aYudo rago gbarasa yo yo te; ka mo afura nga ni ruka rago gayo fudifudipai te.

¹³Ka mo arimi nga rogo ngbadimo bakporo nga ga gimi aboro rago gayo gberãngbi te; ka mo asambua nga tiro tipa gu gbigbita pai namangi yo rago gayo gberãngbi te; ka mo amoi nga bero ti gayo ahe rago gayo gberãngbi te.

¹⁴Ka mo aru nga ngba sangi gene, ka do agu yo ku sa yo nga gako yo namefe te; ka mo akusi nga agu yo nga gako yo nabati rago fudifudipai a te.

¹⁵Bambiko gu rago nga ga Yekova du mbembedi ku ri arikaaboro dunduko. Wa mo amangi he, kina wo si ka manga foro a, ga mangaapai akaraga tihe kina ku ri ro.

¹⁶Mbiko wa mbiri oni he ri gi kparakpara ziazia bagangara yo, wo arikaaboro pati roni kirikiri dunduko ka mbira he; i ambíra he, ki nindu nzokinzoki, i adú wa ka i adu nga ho ya.

¹⁷Ono ri Bagangara Siona yo agu yo nikadu ni nabati, si ki du ni kparakpara ba ziazia; ngbatunga Yakoba aróga gayo arago.

¹⁸Ngbatunga Yakoba adú wa we, ngbatunga Yosefa ki du wa mirãwe, ngbatunga Esau ki du wa katakpa he; i azó yo, we ki riti yo, ka gu ni anyé nga sa dagba ngbatunga Esau yo ya; bambiko Yekova gumba ha.

¹⁹Agu yo du Negebe yo adiía Baga ngara Esau ni gayo; agu yo du Ngboongboorago yo adía ringara aFereseto ni gayo; i adía gu ringara nga ga Efuraima na gu ringara nga ga aSomorono ni gayo, Benyamina ki di Girada ni gako.

²⁰Gu zizi yo nga ga gi rimbasa re du ni awiri aYisaraere, i adía rago Kanana yo daku Sarefata yo ni gayo; na gu zizi yo nga aboro Yerusarema du Sefarada yo i adía agu abaakporo du Negebe yo ni gayo.

²¹Ababatasi aboro andú ku Baga ngara Siona yo ka sara ngbanga ri Bagangara Esau yo; ngbi ki du ni ga Yekova.