Read zande Yona 1 Bible Online

Yona 1 - zande bible

Yona 1

¹Sangba Yekova ki ye koyo du Yona ni nangia wiri Amitai, niya,

²“Mo gúari, ki ndu ku Nineve yo, nga gu bakere bakporo re, ki kpari kuti ni; bambiko gaha gbegberẽpai da ku bara bangire.”

³Ono Yona aguari ka ora ku Tarusisa yo ti bangiri Yekova. Ko andu ku Yapo yo ki bi bakurungba yo nandu ku Tarusisa yo; si du ko afu marã nduge, ki zorõ ku bakurungba yo, ka ndu na yo ku Tarusisa yo ti bangiri Yekova.

⁴Ono Yekova akedi bavugumo yuge ku bangiri baime, baime ki nisungbura asungbura bakere gbe, si du bakurungba ki du wa si nikakua akua du.

⁵Were abasikisi bakurungba ki nigunde agunde gbe; i ki nikpari fu gayo ambori ni ba sa sa; i ki nibabafu agu aũsunge naadu vuru bakuru ngba yo ku baime yo, si akpura fu yo. Ono Yona azorõ kina ku mburu bakurungba ki pi yo, ki nira ara gbe.

⁶Si du baira bakurungba ki ye koyo du ko ni ki ya fu ko, “Ako bararame, gini pai mo aberã? Mo gúari, ki kpari fu ga Mbori! Isoke mbori abéra pa rani, ka ani kpiki nga ya.”

⁷I ki niya dagba yo fu akura yo, “Oni yé, ani bá ake, ka ina gu boro gi gbigbitapai re aye ku ri rani mbiko ni.” Si du i ki ba ake, ake ki yugu Yona.

⁸I ki ya fu ko, “Mo gúmba nga ha fu rani, ga da pai dũ ye gi gbigbitapai re ti ni ku ri rani? Ga sunge nga gine? Wari mo aye ni? Ga ringara nga gine? Ngbatunga gini boro nga mo?”

⁹Ko ki ya fu yo, “Ebere nga mi; mi nagunde ti Yekova, nga Mbori ngbangbaturũ, nga gu ko namangi baime na ugusende a.”

¹⁰Si du agu akumba re ki nigunde agunde gbe, i ki ya fu ko, “Gini pai nga gi mangi mo re!” Bambiko akumba aini he ya ko amerẽ ti bangiri Yekova, bambiko wo ko agumba ha fu yo.

¹¹I ki ya fu ko, “Gini pai ani ka manga na mo, ime zeredi fu rani?” Bambiko baime nasungbura asungbura ki susi gu nidu mbata.

¹²Ko ki ya fu yo, “Oni dí re, ki ba re ku baime yo; si baime ka zereda ti ni fu roni; bambiko mi ini he sungburasungbura baime naye sa roni mbiko gi pai.”

¹³Ono akumba aasadi ka ruga bakurungba nyanyaki, ka karaga tiyo kuti ngba pia yo, ono i arengba nga na ni te, bambiko baime asungbura asungbura kindi kuti yo ki susi gu nidu mbata.

¹⁴Si du i akpari fu Yekova, “Ako Yekova, ani nazungadi ro, ka mo hé nga rani ani kpiki tipa unga gi kumba re ya, ka mo mói nga kure boro wenesa ku ri rani ya; Ako Yekova, bambiko mo mangi he wa ngba ha ti ro.”

¹⁵Si du i ki di Yona ki ba ko ku baime yo; baime ki zeredi ti sungbura.

¹⁶Akumba ki gunde agunde ti Yekova gbe, i ki tumo ni ũmotumo fu Yekova ki zunga he.

¹⁷Yekova ki ringbisi batĩo u mbiri Yona; Yona ara ku vuru tĩo yo tipa uru biata na yuru biata a.