Read zande Yona 2 Bible Online

Yona 2 - zande bible

Yona 2

¹Yona ki kpari kina vuru tĩo yo fu Yekova nga gako Mbori,

²niya, “Mi akpari fu Yekova, be gi imisiri, ko ki karaga pai fere; mi akpari Baatoro kpikpi aboro yo, mo ki gi fugore.

³Bambiko mo aba re ku dudungura rago yo, ku bebere abaime yo, hihi baime adu pati re kirikiri; ga ngiri baime na ga sungbura baime ki fu ri re.

⁴Mi ki ya, ‘I ba re bara bangiro yo ku sa yo; mi awíra pa ngera koyo du ga kparakpara ziazia yekaru ni waĩ berewe?’

⁵Aime fuku ku auru re, dudungura baime adu pati re kirikiri, nvuo ime ki tapa rire

⁶ti mburu abaagangara yo. Mi azorõ ku rogo gu ringara yo angbongboho akisi re nye anye kindi; Ako Yekova gi Mbori, ono mo akusi ungare Due yo.

⁷Ho he amaka mbisimore ni rogo re yo, mi atingidi pa Yekova; gi kpe ki da koyo du mo ni, ku rogo ga kparakpara ziazia yekaru yo.

⁸Agu yo naberã pa kungba kpiaahe, i mbu gayo ndikidi weneringise.

⁹Ono mi atúmo foro ni fugo tambuahe; mi atúmo gu kidohe mi azunga ha foro. Bata du ni ga Yekova he!”

¹⁰Yekova ki gumba pai fu gu tĩo re, u ki suku Yona ku auru ugusende.