Read zande Yona 3 Bible Online

Yona 3 - zande bible

Yona 3

¹Sangba Yekova ki ye koyo du Yona ni ni ue he, niya,

²“Mo gúari, ki ndu ku Nineve yo, nga gu bakere bakporo re, ki tungusi gu tungusapai fu yo nga gu mi aka gumba ha foro.”

³Si du Yona ki guari ka ndu ku Nineve yo kuti sangba Yekova. Ono Nineve angia bakere bakporo gbe, rame nduge rogo ho adu biata.

⁴Yona ki rimi ku bakporo yo, ki tona nduge tipa uru sa. Ko ki ta paa ku ari niya, “Rame koyo kina 40, i ki gbarasi Nineve!”

⁵Aboro Nineve ki idi pa Mbori; i ki taki pande pa gina riahe, ki nivo mbuzaroko, tona ti bakikindigi yo ki da ti umba pa yo.

⁶Pandehe ki da koyo du bakindo aboro Nineve ni, ko ki guari auru gako mbatabakindo, ki uru gako gbanga baukadi, ki vo mbuzaroko, ki nisungu kuke yo.

⁷Ko ki taki pande pai i ki tungusi he fu aboro Nineve yo dũ, “Ni gu ndika nga ga bakindo na gako abaakumba: Ka boro rí nga riahe ya, anya, na rimbasa abagara na rimbasa akandoro a ya; ka i rígi nga tiyo wa sa ya, watadu mbira ime a ya,

⁸ono aboro vódi kina mbuzaroko dũ, i úkadi anya na ni a, ki nikpari kpe ni ome fu Mbori. Ii, aboro sá tiyo ni ba sa sa ti gayo gbigbitapai na ti gu zuu du ti yo.

⁹Da ini he, si ngia Mbori abírã tiko ki za tiko ti gako ngariangaria zinga, ya ka ani kpiki nga ya?”

¹⁰Ho Mbori abi gu pai ni i amangi he, Mbori ki sa tiko ti manga gu gbigbitapai, nga gu ko aya ko amanga yo na ni; ka ko amanga nga ha ya.