Read zande Pa Geda Aboro 10 Bible Online

Pa Geda Aboro 10 - zande bible

Pa Geda Aboro 10

¹Yekova ki ya fu Mose,

²“Mo mángi ambanya ue rogo feda; mo amánga ha rogo tata marã; ono gaha sunge nikangia yamba dungurati, na tipa guari aboro bataya sa nunguro.

³Ho i ka nivudi he ue ni, aboro dungurati dunduko ki nitiria koyo du mo ni ku ngbadimo bamburoko dungurati yo.

⁴Ono ka i vu gu sa, kina abazogo nga agu yo du ku ri agu arimbasa nga ga aYisaraere yo, i ki nidungura tiyo koyo du mo ni.

⁵Ho i ka nivu he ni ni fugapai, gu bataya du ku uroyo ki nitona gaha nunguro.

⁶Ho i ka nivu he ni ni fugapai ni uehe, gu bataya du ku sudiyo ki nitona gaha nunguro. I anivu mbanya avu ni fugapai tipa gayo nunguro dunduko.

⁷Ono ho gbuu ka nidungura tihe ni wa sa, oni ki nivu he, ka oni avú nga ha ni ga fugapai ya.

⁸Ono awiri Arona nga aboromotumo, nikangia abavudi agu ambanva re. Pa ambanya adú wa ndika fu roni dagba arika ngbatungaroni ku mbata yo kindi.

⁹Ono ho oni ka nindu ni ka so vura rogo gaoni ringara kuti avuraroni nga agu yo narungosi roni, oni anivudi agu ambanya re ni fugapai, Yekova ki tingidi pa roni nga gaoni Mbori, oni anibati abata be avuraroni.

¹⁰Si anidu a wo ti gu uru du oni pusiapusia, na rago manga oni gaoni ringbisiringbisi apumbo, na rago tonatona gaoni adiwi, oni anivudi ambanya ku ri gaoni zozo amotumo, na ku ri agu amotumo nga ga amotumo zereda; si anidu tipa tingidapai fu roni bara bangiri gaoni Mbori: Mi nga Yekova nga gaoni Mbori.”

¹¹Rogo ue garã, ti ue diwi, ti ue bawe rame rogo gu diwi ue, Yekova ki di dubo ku ari yo ri banye nga ga dezirepai,

¹²awiri aYisaraere ki guari ka ndu gayo nunguro ku mbata yo kuti pa gayo nunguro ngbakungba Sinai yo; dubo ki nye ngbakungba Parana yo.

¹³Ono i ki guari na gayo bambata nunguro kina kuti sangba Yekova wa ko aringbisi he fu Mose.

¹⁴Gu rika nga ga gu bataya nga ga awiri Yuda angbe ku mbata yo a wa pa gayo rimbasa aborosovura adu; Nasona nadu ku ri gayo rimbasa aborosovura nangia wiri Aminadaba.

¹⁵Netanere wiri Sua ki du ku ri gu rimbasa nga ga ngbatunga awiri Yisasakara.

¹⁶Eriaba wiri Erono ki du ku ri gu rimbasa nga ga ngbatunga awiri Zeburuna.

¹⁷I ki zaki banye, awiri Gerusona na awiri Merari nanatinda banye, ki ngbe ku mbata yo.

¹⁸Gu rika nga ga gu bataya nga ga Rubena ki ngbe ku mbata yo a wa arimbasayo adu; Erisura wiri Sedeura ki du ku ri gayo rimbasa.

¹⁹Serumiere wiri Surisadai ki du ku ri gu rimbasa nga ga ngbatunga awiri Simona.

²⁰Ereyasafa wiri Duere ki du ku ri gu rimbasa nga ga ngbatunga awiri Gada.

²¹AKoata ki ngbe ku mbata yo, ki aka kparakpara ba; ono akura yo adua banye nisungudi pa da yo.

²²Gu rika nga ga gu bataya nga ga awiri Efuraima ki ngbe ku mbata yo a wa pa gayo rimbasa aborosovura adu; Erisama wiri Amiuda ki du ku ri gayo rimbasa.

²³Gamariere wiri Pedasura ki du ku ri gu rimbasa nga ga ngbatunga awiri Manase.

²⁴Abidana wiri Gidoni ki du ku ri gu rimbasa nga ga ngbatunga Benyamina.

²⁵Gu rika nga ga gu bataya nga ga awiri Dana, nga gu nadu ti mburu sa abataya yo dunduko, ki guari ka ndu ku mbata yo a wa pa gayo rimbasa aborosovura adu; Aiyezere wiri Amisadai ki du ku ri gayo rimbasa.

²⁶Pagiere wiri Okerana ki du ku ri gu rimbasa nga ga ngbatunga awiri Asera.

²⁷Aira wiri Enana ki du ku ri gu rimbasa nga ga ngbatunga awiri Nafatari.

²⁸Were pa anunguro nga ga awiri aYisaraere adu, a wa pa gayo arimbasa aborosovura adu, ho i aguari ni ka ndu ku mbata yo.

²⁹Mose ki ya fu Obaba wiri Ruere boro Midiana, nangia bagbio Mose, “Ani nandu nunguro sa gu rago nga gu Yekova aya, ‘Mi atu he fu roni’; mo yé ani ndu na mo, ani amánga wenepai foro; bambiko Yekova gumba wenepai tipa aYisaraere.”

³⁰Ono ko ki ya fu ko, “Mi andú nga te, ono mi agá kina ku rogo gi ringara, koyo du ngbatungare ni.”

³¹Mose ki ya, “Mi nakpara foro, ka mo mbú nga rani ya, bambiko wa ini mo ho waĩ ani akazia bataya ngbakungba no, mo ki nidu fu rani ku ba bangirise.

³²Si du, ka mo ndu na ani, gu wenepai Yekova ka manga ha fu rani, kina ha ani ka manga foro a.”

³³I ki guari ri ga Yekova bagangara yo ka ndu ku mbata yo, na nunguro tipa uru biata; sanduki mokido nga ga Yekova ki nindu ku mbata yo fu yo tipa uru nunguro biata, ka gbata baongoda fu yo.

³⁴Ga Yekova dubo ki du ku ri yo uru, ho i aniguari ni bataya yo.

³⁵Si ki ta du wa gere, ho sanduki aningbe ni ku mbata yo, Mose ki niya, “Ako Yekova, mo gúari ku ari, avuraro gbándaka; agu yo nasoga ro óro barangba ro.”

³⁶Ho si aniru ni, ko ki niya, “Ako Yekova, mo káraga tiro fuo gu bawe kutu akutu nga ga aYisaraere yo.”