Read zande Pa Geda Aboro 12 Bible Online

Pa Geda Aboro 12 - zande bible

Pa Geda Aboro 12

¹AMiriama na Arona ki tona gumba rimo Mose bambiko ko adi de Kusa ni diako, bambiko ko di de Kusa;

²i ki ya, “Yekova nafura na kina Mose tigu sa? Ko nafura nga na ani a wo te?” Yekova ki gi he.

³Were Mose angia bayee boro ni rengo, ki susi agu aboro nadu ri kpotosende no dunduko.

⁴Yekova ki gumba pai ni ba sa fu Mose, na fu Arona, na fu Miriama, ki ya, “Oni yé wa du oni biata ku bamburoko dungurati yo.” I biata ki ndu.

⁵Yekova ki zorõ rogo bakamikami dubo, ki ru pangbadimo bamburoko, ki yambu Arona na Miriama; i ue ki kuru.

⁶Ko ki ya, “Oni gí sangbare awere: Ka nebi du ho dagba roni yo, mi Yekova ka yugu tire fu ni tigimi rogo yuguyugupai yo, mi afúra na ni rogo musumo.

⁷Gi moyambu nga Mose ko wo te; ko du ni irarengo rogo gi kporo dunduko.

⁸Mi nafura na ko kina ku ngbako gbayaga, na rogo masaku yo a te; ko ki nibi kpia Yekova abi. Tipagine tie, oni agunde nga ti gumba pai ti ni kuti gi moyambu nga Mose ya?”

⁹Ga Yekova zinga ki rungudi kuti yo, ko ki guari;

¹⁰ho dubo aguari ni ri bamburoko; oni ngére, Miriama ki ngia kinaku ngbataka du, kpau wa kina moro gumba. Arona ki ngere ki bi Miriama, oni ngére, ri ki du nga kinaku ngbataka.

¹¹Arona ki ya fu Mose, “Ako gi gbia, mi nakpara foro, ka mo mói nga ingapai ku ri rani wa mangi ani pai ni mungo kuti ro ya, na tipa gu pai ingi ani a ya.

¹²Mi nakpara foro, ka ri dú nga wa gu boro ni kpi akpi ya, nga gu ni pasioni nitona nyasa anyasa ho ni nikuru ni rukumbu nani yo.”

¹³Mose ki kpari fu Yekova, ki ya, “Ako Mbori, mi nazungadi ro, mo húsi ri.”

¹⁴Yekova ki ya fu Mose, “Ka bari asuku sure ku kpakpuri yo, ri adú nga na zee tipa uru saba te? I kísi ri ku gii bataya yo tipa rame saba, fuo gure i ki ye na ri berewe ku vuru bataya yo.”

¹⁵I ki kisi Miriama ku gii bataya yo tipa rame saba; ka aboro andu nga nunguro ya daho i arimisi Miriama ni berewe.

¹⁶Fuo gure aboro ki niguari Aserota yo ka ndu gayo nunguro, ki zi bataya rogo ngbakungba Parana yo.