Read zande Pa Geda Aboro 14 Bible Online

Pa Geda Aboro 14 - zande bible

Pa Geda Aboro 14

¹Rimbasa aboro ki poi ku ari dunduko, ki nikpari; aboro ki nikpari ni aume ni gu yuru re.

²Awiri aYisaraere dunduko ki nigumba rimo Mose na rimo Arona; rimbasa aboro dunduko ki ya fu yo, “Ako, ka Mbori aidi he ani kpiki kina ringara Ezipeta yo! watadu ka ani akpiki kina rogo gi ngbakungba re!

³Tipagine Yekova aye na ani ti ni ku rogo gi ringara re, ani kpiki be basape? Adiarani na gaani rukutu agude ki du ni úzia; si angba nga ki susi ani karaga tirani ku Ezipeta yo te?”

⁴Gu ni ki niya fu kurani, “Ani moi barumbatayo fu rani, ani ki karaga tirani ku Ezipeta yo.”

⁵Si du aMose na Arona ati sande ti ni ni kpakpuyo bara bangiri gbuu rimbasa dunduko nga ga awiri aYisaraere.

⁶Yosua wiri Nuna na Kareba wiri Yefune, nga agu yo nadu dagba agu yo yo namoi ringara, ki siri gayo aroko,

⁷ki gumba pai fu dungurati nga ga awiri aYisaraere dunduko, niya, “Gu ringara ani akuru rogo ka ndu ka maa rago, si nga gu ringara ngba angba ki susi.

⁸Ka ani ngba ti Yekova, ko ayé na ani ku rogo gu ringara re, ki fu he fu rani, nga gu ringara du adu na mamuanya na nzeme anyege kpaima.

⁹Ono ka ani sá nga mungu kuti Yekova ya; ka ani gúnde nga be agu aboro nga ga gu ringara yo re a ya; bambiko i nga ungba fu rani; gayo ba bata guari ti yo, Yekova du na kina rani; ka oni gúnde nga be yo ya.”

¹⁰Ono rimbasa aboro ki nikpi nyemu ka zumuda yo na ambia. Gu taarimo nga ga Yekova ki kuru ku bamburoko dungurati yo fu awiri aYisaraere dunduko.

¹¹Yekova ki ya fu Mose, “Rago adu waĩ agi aboro re ki nipayasi re? Rago adu waĩ ka i aida nga pare ya, zavura gu yuguyuguapai mangi mi ku dagba yo yo vuru?

¹²Mi nikafu kaza gberãngbi fu yo, ka i adú nga ni gimi aboro berewe ya, mi ki sa ro ni rikaaboro ni babakere yo ni airaome ki susi yo.”

¹³Mose ki ya fu Yekova, “Wa aEzipeto ka gia ha; i agúmba ha fu agu aboro naraka rogo gi ringara re, bambiko mo akusi agi aboro re ni ga ome dagba yo yo. Ako Yekova, i gi he ya mo du dagba agi aboro re; Ako Yekova, i nabi ro abi ni kina bangiriyo, ga dubo ru ku ri yo, mo nangbe ku mbata yo fu yo ni bakamikami dubo uru, na ni bakamikami we yuru.

¹⁵Awere ka mo imi agi aboro re wa boro sa, si du agu arikaaboro nagi pande rimoro agúmba ha, ki ya,

¹⁶‘Bambiko Yekova arengba nga ka ye na agi aboro re ku rogo gu ringara nga gu ko azunga he fu yo tipa ha te, si du ko imi yo du kina ngbakungba no.’

¹⁷Ono awere, mi nakpara foro, ga Yekova tandu dú ni bakere he, tipa gu pai mo akido pa ha ki ya,

¹⁸‘Yekova nga bayee boro tipa zinga, ki du na inapai kpaima, navu aboro ti irairapai na samungu, ono ko asára nga ngbanga fu aboro ingapai te, ko ambúsa wiri aboro na atitayo ti gu irairapai nga ga abayo, da kina ho rikayo ka du ni biata na biama.’

¹⁹Mi nakpara foro mo mbú gu irairapai nga ga agi aboro re, kuti ga bakere inapai, a wa mo avu agi aboro re Ezipeta yo ki da ku awere.”

²⁰Yekova ki ya, “Mi mbu pai fu yo kuti sangba ro;

²¹ono ni rengo wa du mi ni ungare, na wa kpotosende dunduko nikahi be ga Yekova taarimo;

²²agu aboro dunduko bi gi taarimo, na gi yuguyuguapai, nga gu mi amangi rogo Ezipeta yo na ngbakungba no, ki niasadi re kindi wa bara bawe, ka i agia nga fugore ya,

²³ni rengo i abi nga gu ringara mi azunga he fu abayo tipa ha wa sa te; a nga gu ni sa dagba agu yo payasi re nikabi he a te

²⁴Ono gi moyambu nga Kareba, bambiko wa du toro ti ko akia, ko ki nipeke re na kpotoko yo dunduko, ko mi akandu na ko ku rogo gu ringara ko andu ku rogo, angbatungako nikadia ha.

²⁵Awere wa aAmareko na aKanano naraka ngboongboorago yo, oni ária tironi gba, ki ndu ku ngbakungba yo ngba gu gene ndu ku Zamba Baime yo.”

²⁶Yekova ki ya fu Mose na fu Arona,

²⁷“Rago adu waĩ mi nimbu be gi gbegberẽ rimbasa aboro re, nga agu yo nagumba rimore? Mi gi gu gumbarimo nga ga awiri aYisaraere, nga gu i agumba rimore na ni.

²⁸Mo yá fu yo, ya Yekova wẽ. ‘Ni rengo wa du mi ni ungare, gu pai gumba oni ku ture yo, kina wo mi akamanga fu roni;

²⁹kangba roni atíwa atiwa rogo gi ngbakungba re; agu yo dunduko i agedi yo dagba roni yo, kuti gedigedi roni dunduko, du garãyo tona ti 20 na ka ndu ku mbata yo, nga agu yo gumba rimore,

³⁰ni rengo oni adá nga ku rogo gu ringara, nga gu mi atumba bere ku ari tipa ha ya mi aída ha fu roni oni raki rogo ho te, kina Kareba wiri Yefune, na Yosua wiri Nuna.

³¹Ono gaoni rukutu agude, oni aya i nikadu ni ũzia, i mi ka ye na vo ku rogo ho, i nikaina gu ringara oni agindiga.

³²Ono tipa roni, kangba roni atíwa kina rogo gi ngbakungba re.

³³Awironi aráka wa ababanda anya ngbakungba no tipa garã 40, i ki nimbu mbugo gaoni mangaapai du wa sino pa bari, daho kangba roni ka pika ni dunduko ngbakungba no.

³⁴Oni ambú mbugo gaoni irairapai tipa agarã 40, kuti gedigedi agu arame oni amoi gu ringara na ni re, nga 40 arame, garã sa tipa rame sa, oni ki ini gu pai gberẽ ti re.’

³⁵Mi nga Yekova gumba ha; ni rengo gere nga gu mi akamanga fu gi gbegberẽ rimbasa aboro dunduko re, nga agu yo dungura tiyo wa sa kuti re: i anyasa kina rogo gi ngbakungba re, no i ka kpika ni dũ.”

³⁶Ono agu akumba Mose akedi yo i ndu ka maa ringara, nayega ka zingisa rimbasa awiri aYisaraere dunduko i gumba rimoko, wa yega yo na gbegberẽ tingidapai tipa gu ringara re,

³⁷kina agu akumba natingidi gbegberẽpai tipa gu ringara re ki kpiki be kaza gberãngbi ku bangiri Yekova.

³⁸Ono kina Yosua wiri Nuna, na Kareba wiri Yefune, ki nye ni ungayo dagba agu akumba yo naandu ka maa gu ringara re.

³⁹Mose ki gumba agi apai re dunduko fu awiri aYisaraere, aboro ki nikpari bakere kpe gbe.

⁴⁰I ki guari kina ngbawiso, ki biti ku ri abaagangara yo, niya, “Mo ngére, ani du re, ani andú ki da kina rogo gu ringara Yekova akido he tipa ha; bambiko ani ingi pai.”

⁴¹Mose ki ya, “Tipagine oni agu auru sangba Yekova ti ni awere, ni rengo si au nga te?

⁴²Ka oni bíti nga ya, i ka amanga roni bambiko Yekova dagba roni te.

⁴³Bambiko aAmareko na aKanano du ku mbata yo, oni akpíka be basape; bambiko oni sa tironi ku sa yo ti peka fuo Yekova, si du Yekova akadu nga ti ni na oni ya.”

⁴⁴Ono i ki biti ni ruka kina ku ri abaagangara yo kindi, ono ga Yekova sanduki mokido na Mose aguari nga bataya yo te.

⁴⁵Si du aAmareko ki ye, na aKanano nga agu yo naraka rogo gu ringara abaagangara re, ki mangi yo ki di be yo, ki do fuo yo ki da kina ku Oruma yo.