Read zande Pa Geda Aboro 15 Bible Online

Pa Geda Aboro 15 - zande bible

Pa Geda Aboro 15

¹Yekova ki gumba pai fu Mose, ki ya,

²“Mo gúmba pai fu awiri aYisaraere, ki ya fu yo, Ni gu rago oni ka da ku rogo gu ringara oni ka araka rogo ho, nga gu fu mi fu roni,

³oni ki fu motumo ni we fu Yekova, nga zozo motumo, watadu kura motumo ka digisa pa kidohe watadu wa gu gamunihe boro afu zaza ni nyemuhe, watadu rogo gaoni ringbisiringbisi apumbo, ka manga guzuguzu fuõhe fu Yekova, ni gu nya dagba rimbasa abagara, watadu dagba rimbasa akandoro;

⁴si du gu ni nikaniye na gani gamunihe mbedisatise fu Yekova nga motumo riahe nga fufurũ ngungo wa aritere biata na bebere he ni kodikodi he na nzeme wa ritere sa na bebere he;

⁵mo ki mbakadi imekakue tipa mbirimbiri motumo wa ritere sa na bebere he, na tipa zozo motumo watadu tipa kura motumo, tipa wiri akandoro ni ba sa sa.

⁶Ono tipa bakandoro sa, mo ki mbakadi he tipa motumo riahe ue dagba fufurũ ngungo wa aritere biata ni kodikodi he na nzeme wa aritere ue;

⁷tipa mbirimbiri motumo mo ki fu imekakue wa aritere ue, ni guzuguzu fuõhe fu Yekova.

⁸Ho mo ka nimbakadi babagara ni tipa zozo motumo, watadu tipa kura motumo, ka digisa pa kidohe, watadu tipa motumo zereda fu Yekova,

⁹gu ni ka ye na babagara ni ki fu motumo riahe nga fufurũ ngungo wa aritere biama na bebere he ni kodikodi he na nzeme wa aritere biata,

¹⁰mo ki fu imekakue tipa mbirimbiri motumo wa aritere biata tipa motumo i amanga ha ni we, ni guzuguzu fuõhe fu Yekova.

¹¹“Wo i ka manga tipa abaabagara ni ba sa sa, watadu tipa abaakandoro ni ba sa sa, na tipa wiri akandoro nga abara ni ba sa sa, watadu tipa paranga ameme.

¹²Kina kuti gedigedi gu mo nikambakada ha, wo mo akamanga fu aboro ni ba sa sa kuti gedigedi yo.

¹³Agu yo nga awiri ringara nikamanga agi apai re wa du pa sino ho, ni fu gu motumo nga gu i amanga ha ni we, ni guzuguzu fuõhe fu Yekova.

¹⁴Ka kungba boro sungu ku dagba roni, watadu gu boro ka du dagba arika ngbatungaroni, ni ki nikpi nyemu ka fu motumo nga gu i namanga ha ni we, ni guzuguzu fuõhe fu Yekova, wa oni namanga, wo ni ka amanga a.

¹⁵Tipa gbuu, rugute adú kina sa tipa roni, na tipa gu kungba boro sungu ku dagba roni, ni nyenye rugute kindi dagba arika ngbatungaroni; wa du oni, kina wo kungba boro ka du ku bangiri Yekova.

¹⁶Ndika sa na rugute sa nikadu tipa roni, na tipa gu kungba boro sungu ku dagba roni.”

¹⁷Yekova ki ya fu Mose,

¹⁸“Mo gúmba pai fu awiri aYisaraere, ki ya fu yo, Ho oni ka da ni ku rogo gu ringara mi aye na oni ku rogo ho,

¹⁹si ki du were, ya ho oni ka ri gu riahe ni nga ga gu ringara re, oni ki fu tumbatumba gamahe fu Yekova.

²⁰Rogo gaoni bambata ngungo zende ahe oni anifu rukutu akpokuta tipa tumbatumba gamahe; wa oni namanga na gu tumbatumba gamahe nidu tipa bataka zende ahe, wo oni ka nitumba ha.

²¹Rogo gaoni bambata ngungo zende ahe oni afú tumbatumba gamahe kindi na rika angbatungaroni dũ fu Yekova.

²²“Ono ka oni ingi, ka oni amánga nga agi andika dunduko re ya, nga gu Yekova agumba pa ha fu Mose,

²³nga kina agu apai dunduko Yekova arugu roni na ni ku ngba Mose, tona ti gu uru Yekova afu rugute ti ni, na ku mbata yo dagba ngbatungaroni,

²⁴si adú were, ka boro mangi he ki zanga ruga tini na pa ha ka rimbasa aboro aina nga pa ha ya, si du rimbasa aboro dunduko ki fu paranga babagara sa tipa zozo motumo, tipa guzuguzu fuõhe fu Yekova, na gu motumo riahe nga gaha, na mbirimbiri motumo nga gaha, kuti sangba rugute, na bameme sa tipa motumo ingapai.

²⁵Boromotumo ki mangi pa dada ingapai tipa rimbasa nga ga awiri aYisaraere dunduko, i ki vu yo; bambiko i amangi he zanga ruga tiyo na pa ha, i ye na gayo gamunihe mbedisatise a, nga motumo i amanga ha ni we fu Yekova, na gayo motumo ingapai ku bara bangiri Yekova, tipa gayo ingapai.

²⁶Ono Yekova avú rimbasa dunduko nga ga awiri aYisaraere, na gu kungba aboro sungu ku dagba yo a, bambiko gu pai nga ga aboro dunduko i amangi he zanga ruga tiyo na pa ha.

²⁷“Ono ka boro sa mangi ingapai zanga ruga tini na pa ha, ni atúmo ni wiri meme ni nara du garãru sa, tipa motumo ingapai.

²⁸Boromotumo ki mangi pa dada ingapai ku bangiri Yekova tipa gu boro mangi ingapai, ho mangi ni ingapai ni zanga ina pa ha, ka manga pa dada ingapai tipa ni; i ki vu ni.

²⁹Rugute adú be roni sa tipa gu ni mangi pai zanga ruga tini na pa ha, tipa gu ni nga wiri ringara dagba awiri aYisaraere, na tipa gu kungba boro sungu ku dagba roni.

³⁰Ono gu boro mangi pai ni abia tini watadu ni nga wiri ringara watadu kungba boro, ni gberã ngbani yo fu Yekova, i akpára gu boro re akpara ku sa yo dagba gani aboro.

³¹Bambiko ni payasi ga Yekova pai, ki gu auru gako ndika, i anikpara gu boro re akpara ku sa yo ni rengo; gani irairapai anidu kina ku ri ni.”

³²Ho awiri aYisaraere adu ni ngbakungba yo, i abi kumba ko nidungura asakiri rago sabiti.

³³Agu yo nabi ko ko nidungura asakiri i ki ndu na ko koyo du Mose ni na koyo du Arona ni, na koyo du ga awiri aYisaraere rimbasa ni.

³⁴I ki ba ko ku bambukisa yo, bambiko i agumba nga gu pai i akamanga fu ko te.

³⁵Yekova ki ya fu Mose, “I ími gu kumba re aimo ni rengo; rimbasa awiri aYisaraere sópo ko ni ambia gii bataya yo.”

³⁶Rimbasa awiri aYisaraere dunduko ki kusi ko ku zegi yo gii bataya yo, ki sopo ko ni ambia, ko bi kpi; wa Yekova agumba pa ha fu Mose.

³⁷Yekova ki ya fu Mose,

³⁸“Mo gúmba pai fu awiri aYisaraere ki ya fu yo i nimángi ngba gayo aroko ni zawizawi he wa arika ngbatungayo nikadu, i moi gbaya gire ti ngba gayo zawizawi aroko ni ba sa sa;

³⁹si adú fu roni ni zawizawi he, oni ka abi he, ka atingida pa agu andika dunduko nga ga Yekova, ka amanga ha, ka oni amérã nga fuo agu apai nga ga kpotoroni yo na ga bangironi a ya, nga gu oni anandu fuo ho ni nyemuhe ni sino pa bari.

⁴⁰Oni nitíngidi pa gimi andika dunduko ki nimangi he, ki du ni kparakpara roni ziazia fu gaoni Mbori.

⁴¹Mi nga Yekova nga gaoni Mbori, nakusi roni ringara Ezipeta yo, ka du ni gaoni Mbori: Mi nga Yekova nga gaoni Mbori.”