Read zande Pa Geda Aboro 17 Bible Online

Pa Geda Aboro 17 - zande bible

Pa Geda Aboro 17

¹Yekova ki ya fu Mose,

²“Mo gúmba pai fu awiri aYisaraere, ki rogo ngbondo beyo, ngbondo sa tipa angbatunga abayo ni ba sa sa wa du ku abayo, nga ga abazogo yo dunduko kuti ku abayo, wa angbondo 12. Mo ki ke rimo aboro ni ba sa sa ti gayo angbondo,

³mo ki ke rimo Arona ti ga Revi ngbondo. Bambiko ngbondo adú sa tipa ri ga abayo kporo.

⁴Mo ki mamoi he bamburoko dungurati yo barangba dezirepai, yo mi nangbisa ro ni.

⁵Gu boro mi ka sia ni, ni gani ngbondo ka funa; mi anyása pa gu gumbarimo ti re nga ga awiri aYisaraere, nga gu i nagumba kuti ro.”

⁶Mose ki gumba pai fu awiri aYisaraere; gayo abazogo dunduko ki fu gayo angbondo, tipa bazogo sa ngbondo a sa, wa du ku abayo, si adu wa angbondo 12; ga Arona ngbondo ki du dagba gayo angbondo yo.

⁷Mose ki mamoi agu angbondo re ku bara bangiri Yekova bamburoko dezirepai yo.

⁸Si ki ta du wa gere fuo girarago, wa Mose andu ku bamburoko dezirepai yo; oni ngére, gu ngbondo nangia ga Arona du tipa ngbatunga Revi ki funa, ki moi kpe he, ki kusi mbumbuda ha, ki kusi zuzuhe ni kina zamba ha.

⁹Mose ki ye na agu angbondo dunduko re yo du Yekova ni koyo du awiri aYisaraere ni dunduko; i ki ngere, ki nirogo gayo angbondo ni ba sa sa.

¹⁰Yekova ki ya fu Mose, “Mo káraga gu ngbondo nga ga Arona ku barangba dezirepai yo, si du ni bandabanda ha ni ngbaanga kuti asamungu, mo dígisi gayo gumbarimo kuti re, ka i akpíka nga ya.”

¹¹Wo Mose amangi he; a wa Yekova arugu ko, kina wo ko amangi he.

¹²Awiri aYisaraere ki gumba pai fu Mose, ki ya, “Mo ngére, ani nakpika, ani arengba nga ka manga pai te, ani dunduko ka manga nga pai ya.

¹³Agu aboro dunduko naye mbembedi koyo, nga agu yo naye mbembedi ku pati banye nga ga Yekova, nikakpika. Ani akpíka akpika wa du ani dunduko?”