Read zande Pa Geda Aboro 18 Bible Online

Pa Geda Aboro 18 - zande bible

Pa Geda Aboro 18

¹Yekova ki ya fu Arona, “Mo na awiro na ga bamo aborokporo dũ nikambu mbugo gu irairapai du tipa kparakpara ba; mo na awiro nikambu mbugo gu irairapai du tipa pa gaoni sunge aboromotumo.

²Awirinamo a, nga ngbatunga Revi, nga ngbatunga bamo, mo yé na yo mbembedi ku pati ro, ya i kódi tiyo na mo, ka manga pa ro, ho mo na awiro nikadu ni ku barangba bamburoko dezirepai yo.

³I aúnda pa ga sunge, na pa agu asunge nga ga bamburoko dunduko; ono i ka aye nga mbembedi ku pati aũsunge kparakpara ba na koyo du bamotumo ni ya, i ka kpika na oni a.

⁴I akóda tiyo na mo ka banda pa sunge bamburoko dungurati, tipa gu sunge nga ga bamburoko dunduko; ka kungba boro niyé nga mbembedi ku pati roni ya.

⁵Oni ki banda pa asunge kparakpara ba, na pa agu asunge nga ga bamotumo: ya ka zinga adu nga berewe ku ri awiri aYisaraere ya.

⁶Oni ngére, mi rogo awirinaroni nga aRevi dagba awiri aYisaraere yo; i nga gamahe tipa roni, ni fufu yo fu Yekova, ka amanga sunge bamburoko dungurati.

⁷Mo na awiro du na mo oni nikabanda pa gaoni sunge aboromotumo tipa agu ahe dũ nga ga bamotumo, du gii roko kparaba yo; oni amánga pa sunge he. Mi fu sunge aboromotumo fu roni wa gu sunge nga ga gamahe, gu kungba boro nikaniye mbembedi ku pati he i aniimi ni aimo.”

⁸Yekova ki ya fu Arona, “Mo ngére, mi fu pa banda tumbatumba gamahe foro, nga gu kparakpara ahe nga ga awiri aYisaraere; mi fu he foro ni gamo ahe, na ga awiro a, ni gaoni he nye anye kindi.

⁹Gere nikangia gamo dagba kparakpara ziazia ahe yo, ni bandabanda ha be we; gayo gamunihe mbedisatise dunduko, nga gayo motumo riahe, na gayo amotumo ingapai dunduko, na gayo amotumo tiandika dunduko, nga gu i ka fu he fere, si anidu ni kparakpara ha ziazia tipa ro na tipa awiro.

¹⁰Oninikarigu kparakpara ziazia ahe re; akumba dunduko nikari he; si adú foro ni kparakpara he ziazia.

¹¹Gere nga gamo a, gu tumbatumba gamahe nga ga gayo gamahe, wowoti amotumo dunduko nga ga awiri aYisaraere; mi fu he foro, na fu awiro, na fu agu awiro nga ade du na mo, ni gaoni he nye anye kindi; agu aboro dunduko du gigiri rogo ga kporonikariaguahengagaha.

¹²Gunzeme dunduko du ni bawene he, na gu imekakue dunduko du ni bawene he na gu wene zende ahe dunduko nga gu bambata zuzuhe nga gu ka i afu fu Yekova, mi fu he foro.

¹³Gu bambata zamba zuzuhe du rogo gayo ringara dunduko, nga gu i aye na ni fu Yekova, si nikadu ni gamo; agu aboro dunduko du gigiri rogo ga kporo nikari agu ahe nga gaha.

¹⁴Agu ahe dunduko i akpara ha ringara aYisaraere nikadu ni gamo.

¹⁵Agu ahe dunduko naza rukumbu nga borose dunduko nga gu i afu he fu Yekova, ga aboro na ga anya, si nikadu ni gamo; ono gu bambata vungu nga ga aboro si mo ka tumo ho ni rengo, na gu bambata wiri anya nga anyakorokpa mo ka tumo ra.

¹⁶Agu ra mo akanitumo ra, nga agu ra du diwi ra sa mo aríngbisa marã tumo ra nga feda barõa asekerehe adu wa agarama 82, ringbisi he na pa gu sekere nga ga kparakpara ba, si nga agera 20.

¹⁷Ono bambata wiri nabagara, watadu bambata wiri kandoro, watadu bambata wiri meme, mo anitumo nga ra te; ami ni kparakpara ra ziazia. Mo animigidi kurera amigida ku ri bamotumo, ki nizo nzemera tipa motumo nga gu i namanga ha ni we, ni guzuguzu fuõhe fu Yekova;

¹⁸ono pasiora nikaningia gamo, a wa du wowoti ngbaduanya na gu kumbambosora du ni gamo.

¹⁹Gu tumbatumba gamahe dunduko nga ga kparakpara ahe, nga gu awiri aYisaraere nafu fu Yekova, si nga gu fu mi foro, na fu awiro na fu agu awiro nga ade du na mo, ni gaoni he nye anye kindi; si nga nyenye ngbaanga nga ga tikpo ku bara bangiri Yekova foro na tipa agu awiro du na mo.”

²⁰Yekova ki ya fu Arona, “Mo adú nga na ngbi rogo gayo ringara te, mo adú nga na kparakpara he dagba yo a te; mi nga ga kparakpara he na ga ngbi dagba awiri aYisaraere.

²¹“Ono fu awiri Revi, mo ngére, mi fu gu sa dagba bawe ni gayo mosoro nga gu fu awiri aYisaraere dunduko, tipa gu sunge i namanga, nga sunge bamburoko dungurati.

²²Ono awere na ku mbata yo a awiri aYisaraere ayé nga ki mbedi ku pati bamburoko dungurati te, i ka manga ingapai ki kpiki.

²³Ono kina aRevi nikamanga sunge bamburoko dungurati, i nikambu mbugo gayo irairapai; si nikangia nyenye rugapai dagba arika ngbatungaroni dunduko; i adú nga na mosoro dagba awiri aYisaraere yo te

²⁴Bambiko gu sa dagba bawe fu awiri aYisaraere, nga gu i natumo na ni ni tumbatumba gamahe fu Yekova, mi fu he fu aRevi ni gayo mosoro; si du ya mi ti ni fu yo i adú nga na mosoro dagba awiri aYisaraere yo te.”

²⁵Yekova ki ya fu Mose,

²⁶“Ku ri agi apai re mo nikagumba pai fu aRevi, ki ya fu yo, ‘Ho oni ka roga gu sa dagba bawe ni be awiri aYisaraere nga gu fu mi fu roni ni gaoni mosoro, oni ki nifu tumbatumba gamahe dagba ha yo fu Yekova, nga sa dagba bawe nga ga bawe he.

²⁷Ono gaoni tumbatumba gamahe si adú ni gedigedi he fu kina roni, wa si angia gu zende ahe nga ga bataka ahe, na wa gu he nihisi rago bapira imekakue yo.

²⁸Were oni ka nifu tumbatumba gamahe a ni gaoni fu Yekova nga ga gaoni sa dagba bawe dunduko, nga gu rogo oni he be awiri aYisaraere; dagba ha yo oni ka nifu gu tumbatumba gamahe ni nga ga Yekova, fu Arona nga boromotumo.

²⁹Oni afú tumbatumba gamahe nga ga Yekova dagba agu ahe gamu yo fu roni dunduko, nga kina gu ngba angba ki susi dagba ha yo, gu bete he du ni kparakpara he a dagba ha yo.’

³⁰Si du mo aniya fu yo, ‘Ho oni ka nifu gu bawene he ni dagba ha yo, i ki nigedi gu ka nye fu aRevi wa gu he kusi yo ho bataka zendehe yo, wa gu he kusi yo bapira imekakue yo;

³¹oni ari he kina rogo gu ba rengbe, oni na gaoni aborokporo; bambiko si nga gaoni mosoro tipa gu sunge oni namanga ha bamburoko dungurati yo.

³²Oni adú nga na ingapai ku ri roni mbiko pa ha te, ho oni ka nitumba gu bawene he ni nga gaha. Ono ka oni agbárasa nga pa gu kparakpara ahe nga ga awiri aYisaraere ya, oni ka kpika.’ ”