Read zande Pa Geda Aboro 19 Bible Online

Pa Geda Aboro 19 - zande bible

Pa Geda Aboro 19

¹Yekova ki ya fu Mose na fu Arona,

²“Gere nga gu rugapai nga ga rugute nga gu Yekova arugu he: Mo gúmba pai fu awiri aYisaraere, ki ya i yé na paranga nabagara ni zamba ru du ni teketeke ru, adu nga serõ ti ru ya, nga gu ru i ata maa nga gonga sunge mbata ku gorõru ya.

³Oni ki fu ru fu Erazara boromotumo, i ki ndu na u ku gii bataya yo, boro ki imi ru ku bangiriko;

⁴Erazara ki di bete kureru na wirinzagako, ki migidi bete kureru koyo du bamburoko dungurati ni wa bara saba ku barangba ha.

⁵I ki zo gu paranga nabagara re kina ku bangiriko; kpotoru, na pasioru, na kureru, na regboru i ka nizo ho dunduko;

⁶boromotumo ki di gu ngua du wa kedara, na usopo, na ngungungu gire, ki bafu he ku ri gu gbitiri paranga nabagara yore.

⁷Boromotumo ki zundu gako aroko, ki zundu tiko a ni ime, fuo gure ko ki ye ku bataya yo; boromotumo anidu ni birikobiriko ko ki da ku nyemu.

⁸Gu ni nazo ru ni ki zundu gani aroko ni ime, ki zundu tini ni ime a, ni ki du ni birikobiriko ni ki da ku nyemu.

⁹Gu boro du ni gigiri ni nikanindukudi akuke gu paranga nabagara re, ki uka ha ku gii bataya yo ku rogo gigiri ba yo; si anidu ni bandabanda ha tipa gu rimbasa nga ga awiri aYisaraere tipa ime kparatise, si tipa motumo ingapai.

¹⁰Ono gu ni nikanindukudi gu akuke paranga nabagara re ni anizundu gani aroko, ni ki du ni birikobiriko ni ki da ku nyemu. Si ki du fu awiri aYisaraere, na fu gu kungba aboro sungu ku dagba yo, ni nyenye rugapai kindi.

¹¹“Gu ni ka zadi kangba boro ni anidu ni birikobiriko ni tipa rame saba;

¹²ni anigirisi tini na ime rogo biata rame, na rogo saba rame, ni ki du gigiri; ono ka ni agirisa nga tini rogo biata rame na rogo saba rame ya, ni adú nga ni gigiri ni te.

¹³Gu boro ka zadi kangba boro, nga kangba gu ni nikpi, ka ni agirisa nga tini ya, ni nabirikosi ga Yekova banye, i anikpara gu boro re akpara ku sa yo ti aYisaraere; bambiko i amigida nga ni ni ime kparatise te, ni anidu ni birikobiriko ni; gani biriko ki du kina ku ri ni kindi.

¹⁴“Gere nga gu rugute du tipa agu apai ka du ho boro nikpi ni rogo bamburoko: agu aboro dunduko naye ku rogo gu bamburoko re, na agu aboro dunduko du rogo gu bamburoko re, i anidu ni birikobiriko yo tipa rame saba.

¹⁵Agu aakoro dunduko du na ngbaha ha, adu nga pipihe ti ngbaha ya, si ni bibiriko ho.

¹⁶Gu boro nikanidu pangba rago yo ki zadi gu boro i niimi ni ni basape, watadu kangba boro, watadu meme boro, watadu murã, ni anidu ni birikobiriko ni tipa rame saba.

¹⁷Ono tipa birikobiriko boro i anirogo bete gu akuke nga ga gbitiri motumo ingapai, ki uka fufu ime ku rogo akoro yo;

¹⁸gigiri boro ki di usopo ki mogo ho ku ime yo, ki migidi he ku ri bamburoko, na ku ri aũsunge dunduko, na ku ri agu aboro nadu yo, na ku ri gu ni nazadi meme, watadu gu ni i aimi ni, watadu kangba boro, watadu murã;

¹⁹gu gigiri boro re nikanimigidi he ku ri birikobiriko boro rogo biata rame na rogo saba rame; ti saba rame gu ni du ni birikobiriko ni ki girisi tini, ki zundu gani aroko, ki zundu tini ni ime a, ni ki du gigiri ku nyemu.

²⁰“Ono gu boro nikanidu ni birikobiriko ni, ka ni agirisa nga tini ya, i anikpara gu boro akpara re ku sa yo ti gbuu, bambiko ni birikosi gu kparakpara ba nga ga Yekova; bambiko i amigida nga ni na ime kparatise te, ni ni birikobiriko ni.

²¹Si ki du ni nyenye rugapai fu yo. Gu ni namigida ime kparatise anizundu gani aroko; gu ni ka zadi ime kparatise anidu ni birikobiriko ni ki da ku nyemu.

²²Ono gu he birikobiriko boro ka nizadi he si anidu ni kina birikobiriko ho; gu boro nikanizadi he ni anidu ni birikobiriko ni ki da ku nyemu.”