Read zande Pa Geda Aboro 20 Bible Online

Pa Geda Aboro 20 - zande bible

Pa Geda Aboro 20

¹Awiri aYisaraere ki ye ku ngbakungba Zina yo rogo bambata diwi, wa gayo rimbasa adu dunduko, aboro ki nye Kadesa yo; Miriama ki kpi yo, i ki kpisidi ri kina yo.

²Ime adu nga yo tipa rimbasa te; i ki vo gbuu yo wa sa kuti Mose na kuti Arona.

³Aboro ki nidari kangu na Mose, ki ya, “Ako, ka Mbori aidi he ani kpiki ho awirinarani akpiki ni bara bangiri Yekova!

⁴Tipagine oni aye na gi gbuu nga ga Yekova ti ni re ku ngbakungba no, ya ani kpiki no, ani na gaani rimbasa anya?

⁵Tipagine oni akusi rani ti ni ba rani Ezipeta yo, ka ye na ani ku rogo gi gbegberẽ ba re? Ba tunga ahe nga ha te, watadu sende rũ vurumo a te, watadu bakakue, watadu zuzu ngua wa ndavu a te; ime ho tipa mbira ha a te.”

⁶AMose na Arona ki ndu ku bangiri gbuu ku ngbadimo bamburoko dungurati yo, ki ti ku sande ni kpakpuyo. Ga Yekova taarimo ki kuru fu yo,

⁷Yekova ki ya fu Mose,

⁸“Mo dí gu ngbondo re, mo ki dungura rimbasa, mo na Arona nga unvuruamo, ki gumba pai fu mbia ku bangiriyo dũ, si fu ime; mo ki kusi ime fu yo nga gu nakura ti mbia; si du mo ka fu ime ti ni fu rimbasa i mbiri he na fu gayo anya a.”

⁹Mose ki di gu ngbondo re nidu bara bangiri Yekova, a wa ko arugu ko na ni.

¹⁰AMose na Arona ki dungura gbuu wa sa ku barangba mbia, ko ki ya fu yo, “Oni gí he awere, oni airasamungu; ani kusi ime fu roni ti gi mbia re?”

¹¹Mose ki tumba beko ku ari, ki nari mbia na ngbondo bara ue; ime ki gbadi kpaima, rimbasa ki mbiri he, na gayo rimbasa anya a.

¹²Yekova ki ya fu Mose na Arona, “Bambiko wa oni aida nga pa re ya, ka kpara re ziazia ku bangiri awiri aYisaraere ya, si du oni ayé nga na gi gbuu re ku rogo gu ringara nga gu mi afu fu yo te.”

¹³Gere nga agu aime nga ime Meriba; bambiko awiri aYisaraere adari kangu na Yekova yo, ko ki yugu tiko ni kparakpara ko fu yo.

¹⁴Mose ki kedi asunge Kadesa yo koyo du gu bakindo ni nangia ga Edome ko, “Were poi wirinamo nga Yisaraere: Mo aima ina gu mbusa mangi rani dunduko:

¹⁵pa ndu abarani ku Ezipeta yo, ani ki raki ku ringara Ezipeta yo tipa gbanga rago; aEzipeto ki nimangi rani gbegberẽ, na abarani;

¹⁶ho ani akpari ni fu Yekova, ko ki gi fugorani, ki kedi maraika, ki kusi rani ringara Ezipeta yo; ani du kina Kadesa no, nga gu bakporo du kina ti bangbanda ga ringara.

¹⁷Mi nakpara foro, mo mbú rani ani susi rogo ga ringara. Ani asusa nga rogo ati watadu rogo ati bakakue te, ani ambíra nga gamo aguga a te; ani andú kina ngba ga Bakindo Bagene, ani asá nga tirani ku kumbabe na ku garebe yo a te, daho ani ka susa ga bangbanda ringara ni.”

¹⁸Ono Edome ki ya fu ko, “Oni asúsa nga rogo gi rago te, mi ka ye sa roni na basape.”

¹⁹Awiri aYisaraere ki ya fu ko. “Ani andú ngba kina bagene; ka ani mbíri ga ime, ani na gaani rimbasa anya, ani afú marã tipa ha; mo mbú kina rani ani susi ho ni ndurani, zanga manga wiri pai berewe.”

²⁰Ono ko ki ya. “Oni asúsa nga ho te.” Edome ki ye kuti yo na kina badungu aboro, na nyanyaki beko.

²¹Were Edome aka ya ko afu nga gene fu awiri aYisaraere rogo gako bangbanda ringara te; si du awiri aYisaraere ki aria tiyo ku bani.

²²I ki ndu gayo nunguro ngba gene Kadesa yo, awiri aYisaraere, nga kina rimbasa dungurati dunduko a, ki ye ku Bagangara Oro yo.

²³Yekova ki poi fu Mose na fu Arona Bagangara Oro yo, ti bangbanda ringara Edome, ki ya,

²⁴“Arona nikaga koyo du atitako ni; bambiko ko aríma nga ku rogo gu ringara nga gu mi afu fu awiri aYisaraere te, bambiko oni asa mungu kuti gi pat pati aime Meriba yo.

²⁵Mo rogo Arona na Erazara nga wiriko, ki ye na yo ku ri Bagangara Oro no;

²⁶mo ki uru ga Arona aroko ti ko, ki ukadi Erazara na ni nga wiriko; Arona ki ga koyo du atitako ni, yo ko ka kpi ni.”

²⁷Mose ki mangi wa Yekova arugu ko na ni; i ki ndu ku ri Bagangara Oro yo ku bangiri rimbasa du.

²⁸Mose ki uru ga Arona aroko ti ko, ki ukadi Erazara na ni nga wiriko; Arona ki kpi ri oagangara yo. AMose na Erazara ki zorõ ri bagangara yo.

²⁹Ho rimbasa dunduko abi he ni ya Arona kpi, i ki kpari Arona tipa rame 30, nga ngbatunga awiri aYisaraere dunduko.