Read zande Pa Geda Aboro 21 Bible Online

Pa Geda Aboro 21 - zande bible

Pa Geda Aboro 21

¹Ho boro Kanana nga bakindo Arada, nanaraka ku Negebe yo agi he ni ya aYisaraere naye ngba ga Atara gene yo, ko ki so vura kuti aYisaraere, ki zi bete yo ni zizi aboro.

²AYisaraere ki kido he fu Yekova, ki ya, “Ka mo fu agi aboro re ku be rani, ani agbárasa gayo abaakporo kpakaya.”

³Yekova ki gi fugo aYisaraere, ki fu aboro Kanana ku be yo; i ki gbarasi yo kpakava na gayo abaakporo; si du i ayambu rimo gu rago re ti ni nga Oruma.

⁴I ki ndu gayo nunguro Bagangara Oro yo ngba gu gene ndu ku Zamba Baime yo, ka ke pati gu ringara nga ga Edome; aboro ki mbu ngba gu gene re.

⁵Aboro ki tona ka gumba pai kuti Mbori, na kuti Mose, ki niya, “Tipagine oni akusi rani ti ni ringara Ezipeta yo ani ye ka kpika ngbakungba no? Bambiko riahe ho te, ime a te, ani nasoga gi kere riahe asoga re.”

⁶Yekova ki kedi kere awo wa we ku dagba aboro, ami ki nidewe aboro, badungu aboro nga ga aYisaraere yo ki kpiki

⁷Aboro ki ndu koyo du Mose ni, ki ya. “Ani mangi ingapai, bambiko ani gumba gbegberẽ pai kuti Yekova, na kuti ro a; mo kpári fu Yekova, ko di awo ti rani ku sa yo.” Si du Mose akpari tipa aboro ti ni.

⁸Yekova ki ya fu Mose. “Mo mángi kpia kere wo wa we, ki moi he ri nguaha; si adú wa gere, agu aboro dunduko awo ka dewa yo, ho ni ka nibi he ni, ni ki bati.”

⁹Mose ki mangi kpia wo rogo sirigi, ki moi he ri nguaha; si ki du wa gere, ka wo de gu boro, ho ni ka ningere ni koyo du kpia wo sirigi ni, ni ki nibati abata.

¹⁰Awiri aYisaraere ki nindu gayo nunguro ki zi gayo bataya Oboto yo.

¹¹I ki guari Oboto yo, ki zi bataya Iyeabarima yo, rogo gu ngbakungba du barangba Moaba, bara koyo uru nakura ni.

¹²Yo i andu nunguro ni, ki zi batava rogo Ngooongboorago Zereda.

¹³Yo i andu nunguro ni, ki zi bataya ku bani pavuru Arunona yo du rogo gu ngbakungba naye ti gu bangbanda rago nga ga aAmoro; bambiko Arunona nga gu bangbanda rago nga ga Moaba, dagba Moaba na aAmoro.

¹⁴Si du i niya ti ni rogo gu Kitabu Pa A vura nga ga Yekova, wa gere, “Waeba Sufa yo, na agu angboongboorago du Arunona yo,

¹⁵na gu zorõzorõ angboongboorago nga gu zorõ koyo Ara naraka ni, ki ndu sa gu bangbandarago nga ga Moaba.”

¹⁶I ki guari yo ki nindu gayo nunguro kindi ku Bera yo; guga adu yo nga gu Yekova aya fu Mose tipa ha. “Mo dungura aboro wa sa, mi ki fu ime fu yo.”

¹⁷Si du aYisaraere ki bi gi bia re: “Ako guga! ― mo bá ku ari no, Oni bí bia fu he!―

¹⁸gu guga awiri abakindo age, nga gu weneringi aboro age, kuti sangba bafurugute, na gayo angau.” I ki ndu nunguro ngbakungba ku Matana yo,

¹⁹ki guari Matana yo ka ndu ku Nariere yo, ki guari Nariere yo ka ndu ku Bamota yo,

²⁰ki guari Bamota yo sa gu ngboongboorago du rogo gu ngbi nga ga Moaba, ku ri Pisega yo, nga gu nangera ku ngbi ngume yo.

²¹AYisaraere ki kedi asunge koyo du Siona ni nga bakindo aAmoro, ki ya,

²²“Mo mbú rani ani susi rogo ga ringara; ani asúsa nga ku bani ku rogo ga ati te, watadu ku rogo ga ati bakakue a te; ani ambíra nga gamo aguga te; ani andú kina ngba ga Bakindo Bagene, daho ani ka susa bangbanda ga ringara ni.”

²³Ono Siona aida nga fu aYisaraere i susi rogo gako ringara te. Ono ko ki dungura gako aboro dunduko ki ndu sa aYisaraere ku ngbakungba yo, ki da ku Yasa yo, ki so vura kuti aYisaraere.

²⁴AYisaraere ki mangi ko na rindi basape, ki di gako ringara tona Arunona yo ki da ti di nga Yaboka, ki ndu dati kina aboro aAmona; bambiko ga aooro aAmona bangbanda ringara adu ni nyanyaki he.

²⁵AYisaraere ki rogo agi abaakporo aroga re dunduko, ki niraki rogo agu abaakporo dunduko nga ga aAmoro, rogo Esebona, na gaha wiri akporo dunduko.

²⁶Bambiko Esebona nangia gu bakporo nga ga Siona bakindo aAmoro, nga gu ko naso vura na gu bakindo naadu mbata nangia ga Moaba, ki rogo gako aringara aroga be ko dunduko, da kina ku Arunona yo.

²⁷Bambiko gi pai re abayango abi bia sanza ti ni, ki ya, “Oni yé ku Esebona no, i dúa ha ki nyakasi he gu bakporo nga ga Siona.

²⁸Bambiko we kuru Esebona yo, mirãwe ti ga Siona bakporo. Si riti Ara nga ga Moaba bakporo, na agbia nga ga gu tumbatumba aba nga ga Arunona.

²⁹Ako, nagberẽ he foro Moaba! Ako aboro Kemose, gaoni pai gberẽ! Ko fu awiriko wa merẽsimerẽsi aboro, na awiriko nga ade wa zizi yo, fu Siona bakindo aAmoro.

³⁰Ani ba ngbatungayo Esebona, yo ki da ku Dibona yo, ani gbarasi rago ki da ku Nofa yo, ki da ku Medeba yo a.”

³¹Were awiri aYisaraere araki rogo gu ringara nga ga aAmoro.

³²Mose ki kedi abamoirago ku Yazera yo; i ki rogo gaha wiri akporo, ki do agu aboro Amora nadu yo.

³³I ki aria tiyo ki ndu ngba gu gene ndu ku Basana yo. Ogo ki mo kuti yo nga bakindo Basana, ko na gako aboro dunduko, ka so vura Ederei yo.

³⁴Yekova ki ya fu Mose, “Ka mo gúnde nga be ko ya; bambiko mi fu ko ku be ro, ko na gako aboro dunduko, na gako ringara; mo amánga fu ko a wa mo amangi fu Siona bakindo aAmoro, naaraka Esebona yo.”

³⁵Si du i ki imi ko, ko na awiriko nga akumba; na gako aboro dunduko, daho boro anye nga ni kina sa fu ko ya; i ki rogo gako ringara ni gayo.