Read zande Pa Geda Aboro 22 Bible Online

Pa Geda Aboro 22 - zande bible

Pa Geda Aboro 22

¹Awiri AYisaraere ki nindu gayo nunguro kindi, ki zi bataya rogo gu kpasakpasa arago du ringara Moaba yo mbiti Yaradene ku Yereo yo.

²Baraka wiri Sipora ki bi agu apai dunduko nga gu aYisaraere amangi fu aAmoro.

³Moaba ki nigunde be agu aboro re ki susi, bambiko i adu ni badungu aboro gbe; gunde awiri aYisaraere ki di be Moaba.

⁴Moaba ki ya fu abaakumba nga ga Midiana yo, “Awere agi aboro re nikarita agu ahe dunduko du pati rani, wa babagara narita nvuo banambu.” Baraka wiri Sipora nadu ni bakindo Moaba ti gu rago re,

⁵ko ki kedi asunge koyo du Birama ni wiri Beora ku Petora yo nadu pavuru Di, rogo gu ringara nangia ga wiri gako aboro, ka yamba ko, ki ya, “Mo ngére, aboro gu du no naye Ezipeta yo; i dadi kpakpu kpotosende adada du, i naraka pati re ku bani.

⁶Si du mi nakpara foro mo yé awere ka tiwa agi aboro re fere, mbiko i nyaki ki susi re; ka si du wa mi adía be yo, ani ki mangi yo, ki do yo ku sa yo rogo gi ringara re; bambiko mi ini he ya gu ni ka mo fu maku fu ni ni ima du na maku, na gu ni tiwa mo ni ni ima du ni tiwatiwa boro.”

⁷Ga Moaba abaakumba na ga Midiana abaakumba ki guari na mosoro tipa soroka be yo; i ki ye koyo du Birama ni, ki gumba sangba Baraka fu ko.

⁸Ko ki ya fu yo, “Oni rá erẽ ni gi yuru re, mi ayé na pai fu roni berewe, wa Yekova akagumba ha fere;” si du abazogo nga ga Moaba yo ki sungu na Birama.

⁹Mbori ki ye koyo du Birama ni, ki ya, “Agini aboro nga agi yo du na mo re?”

¹⁰Birama ki ya fu Mbori wẽ. “Baraka wiri Sipora, bakindo Moaba kedi asunge kono du mi ni, niya,

¹¹‘Mo ngére, agu aboro naye Ezipeta yo, i dadi kpakpu kpotosende adada dũ; mo yé awere ka tiwa yo tere; ka si du wa ka mi rengbe ka so vura kuti yo, ki do yo ku sa yo’ ”

¹²Mbori ki ya fu Birama, “Ka mo ndú nga na yo ya; ka mo tiwa nga agu aboro re a ya, bambiko aboro maku nga yo.”

¹³Birama ki guari wiso, ki ya fu abazogo nga ga Baraka yo. “Oni gá ku rogo gaoni ringara; bambiko Yekova ka na gene be re ka mi ndú nga na oni ya.”

¹⁴Abazogo nga ga Moaba yo ki guari, i ki ndu koyo du Baraka ni, ki ya, “Birama ka aka ya ko ayé nga na ani te.”

¹⁵Baraka ki kedi kura abazogo berewe, nange ti agu yo nadu mbata du na irisa ki susi yo a.

¹⁶I ki ye koyo du Birama ni, ki ya fu ko, “Were Baraka nipoi nga wiri Sipora: ‘Mi nakpara foro, ka pai díngisa nga ro ti ye kono du mi ni wa sa ya;

¹⁷bambiko mi akíisa pa ro na bakere irisa, gu pai mo ka nigumba ha fere mi animangi he amanga; si du mi nakpara foro mo yé, ka tiwa agi aboro re fere.’ ”

¹⁸Ono Birama ki karaga ha ki ya fu ga Baraka amoyambu wẽ, “Ka Baraka vura kpi nyemu ka fu gako bambu fere hi ahi be feda na dahabu vurũ, mi arengba nga ka gu auru sangba Yekova gi Mbori te, ka manga pai toni watadu ki susi he te.

¹⁹Si du awere, mi nakpara fu roni, oni rá erẽ ni gi yuru re a, ya mi ini gu pai Yekova ka gumba ha fere ku ri gi pai re.”

²⁰Mbori ki ye koyo du Birama ni yuru, ki ya fu ko. “Ka ngia agu akumba re niye ka yamba ro, mo gúari, ki ndu na yo; ono kina gu pai gumba mi he foro, kina ha mo ka manga.”

²¹Birama ki guari wiso, ki moi basunga ku ri gako nadongi, ki ndu na agu abazogo Moaba re.

²²Ga Mbori zinga ki rungudi bambiko wa ko andu; ga Yekova maraika ki ru ni vura kuti ko ngba gu gene ko andu ngba ha. Ko ki nioro ri gako nadongi, na gako amoyambu ue nadu na ko.

²³Nadongi ki bi ga Yekova maraika ko ru bangiri gene, na gako basape ko agbe beko na ni; nadongi ki kpara ku bani ti gene, ki merẽ ku rogo ati; Birama ki nari nadongi, ka sa ru kuti gene.

²⁴Si du ga Yekova maraika ki da ru ngba umba gene dagba aati bakakue, kina ngapa ki du ku bani na ku bani a.

²⁵Ho nadongi abi ga Yekova maraika ni, u ki gbia tiru kuti vuro ngapa, ki gbingbida ndu Birama kuti vuroho; ko ki nari ru berewe.

²⁶Ga Yekova maraika ki ndu ku mbata yo, ki ru rogo fitikiri rago, yo gene adu nga ni ba satise ku kumbabe na ku gare a ya.

²⁷Ho nadongi abi ga Yekova maraika ni berewe, u ki nipi api ku sande tii Birama; ga Birama zinga ki rungudi arunguda, ko ki nari nadongi na gako ngau.

²⁸Yekova ki za ngba nadongi, u ki ya fu Birama wẽ. “Gini pai mangi mi kuti ro, mo nanaki re ti ni, bara biata ha du re?”

²⁹Birama ki ya fu nadongi, “Bambiko mo nawia re awia. Ako ka basape nidu bere, ka mi imi ro awere.”

³⁰Nadongi ki ya fu Birama, “A nga ga nadongi nga mi te, mo naora auru re wa du mo ni ungaro dati gi uru te re? Mi amangi pai mbata wo foro?” Ko ki ya, “Oó.”

³¹Si du Yekova ki za bangiri Birama, ko ki bi ga Yekova maraika ko ru bangiri gene, ko na gako basape ko nagbe beko na ni; ko ki zogo riko, ki ti ni kpakpuko.

³²Ga Yekova maraika ki ya fu ko, “Tipagine naki mo ga nadongi ti ni bara biata? Mo ngére, ye mi sa ro ni vura, bambiko ga pai sa tihe wa kango bangire;

³³ono nadongi nibi re, ki aria tiru bara bangire wa bara biata. Ka u nasa nga tiru ku bani ti re ya, ni rengo ka mi imi ro kina awere, ki mbu ru tigau ni ungaru.”

³⁴Birama ki ya fu ga Yekova maraika, “Mi mangi ingapai, bambiko mi naina nga ha nga mo gu ru gene ni zinga kuti re te. Si du awere tie, ka si gberẽ ti ro, mi nikakaraga tire kina ku sa yo berewe.”

³⁵Ga Yekova maraika ki ya fu Birama, “Mo ndú andu na agu akumba re; ono kina gu pai mi ka gumba foro, mo ki gumba kina ha.” Si du Birama ki nindu kindi na ga Baraka abazogo.

³⁶Ho Baraka agi he ni ya Birama ye, ko ki ndu ka ngbisa ko rogo gu bakporo nga ga Moaba, nadu ti gu bangbanda rago du ti Arunona, du pavuru rago naturũ aturã gbe ti bangbanda kporo.

³⁷Baraka ki ya fu Birama, “Mi akeda nga asunge kakaka ka yamba ro te? Tipagine mo aye nga ti ni kono du mi ni ya? Mi arengba nga ni rengo ka kiisa pa ro sa irisa te?”

³⁸Birama ki ya fu Baraka, “Mo ngére, mi naye kono du mo ni! Tandu ti re awere ka gumba wiri pai? Gu pai nga gu Mbori namaa ku ngbare, kina ha mi agúmba.”

³⁹Birama ki niga na Baraka, i ki ye ku Kiriata-uzota yo.

⁴⁰Baraka ki tumo ni abaabagara na akandoro, ki kedi bete ra fu Birama, na fu agu abazogo nadu na ko.

⁴¹Si ki ta du wa gere fuo girarago, Baraka adi Birama, ki ndu na ko ku ri Bamota-bara yo, yo ko abi digida tuturũ angbi ni nga ga agu aboro.