Read zande Pa Geda Aboro 24 Bible Online

Pa Geda Aboro 24 - zande bible

Pa Geda Aboro 24

¹Ho Birama abi he ni ya si angba ti Yekova ka fu maku fu aYisaraere, ka ko andu nga, wa ti kura arago ka ngera ti úsoroka ya, ono ko ki sa kpakpuko ku ngbakungba yo.

²Birama ki tumba bangiriko ku ari, ko ki bi aYisaraere i niraki kina kuti angbatungayo. Ga Yekova Toro ki ye ku ri ko,

³ko ki gumba gako sanza, niya. “Were Birama wiri Beora naya gu kumba bangiriko adu ni zaza ha,

⁴nga gu ko nagia agu apai nga ga Mbori, nabi gu yuguyuguhe nga ga gu Ko du na tandu apai dũ, nati sande, bangiriko ki du ni zaza ha:

⁵Ako Yakoba, na ngbaki gamo abamburoko, Ako aYisaraere, gaoni abanye!

⁶Si gbandaka tuturu wa angboo ngboorago, na aati pangba di, wa gu ngua nga aroi Yekova arú he, wa akedara pangba baime.

⁷Ime afú afu rogo gako akoro yo, gako atunga adú rogo dungu aime, gako bakindo akia akia ki susi Agaga, gako ngbi adú ni kiisikiisi pa ha.

⁸Mbori kusi ko Ezipeta yo; ome du ti ko wa kina ome gbẽe, ko aríta agu arikaaboro dũ nga avurako, ki sapu memeyo rukutu, ki nofo yo puu ni gako aguanza.

⁹Ko anugadi, ko ki pi sande wa bahu na wa nabahu a; da nikazingisa ko? Maku dú fu agu aboro dunduko nafu maku foro, motiwa dú fu agu aboro dunduko natiwa ro.”

¹⁰Ga Baraka zinga ki rungudi kuti Birama, ko ki nari beko; Baraka ki ya fu Birima, “Mi ayambu ro mo tiwa avurare, mo ngére, mo fu maku fu yo dunduko bara biata ha du re.

¹¹Si du mo óro awere ku ba ro yo; mi niya, ‘Mi akíisa pa ro ni rengo,’ ono Yekova ka na irisa be ro.”

¹²Birama ki ya fu Baraka, “Ati mi agumba pai fu gu gamo asunge mo akedi yo kono du mi ni? ki ya,

¹³‘Ka Baraka vura kpi nyemu ka fu gako bambu fere hi ahi na feda na dahabu vurũ, mi arengba nga ka gu auru sangba Yekova te, ka manga wenepai ka ngia gbegberẽpai ni gi berã te; gu pai Yekova nagumba, kina ha mi agúmba.’

¹⁴Mo ngére, mi nandu koyo du gimi aboro ni awere; mo yé, mi ayúgo pa agu apai foro agi aboro re ka manga fu gamo aboro giza.”

¹⁵Ko ki gumba gako sanza, niya, “Were Birama wiri Beora naya, gu kumba bangiriko adu ni zaza ha,

¹⁶gu ko nagia agu apai nga ga Mbori, naina gu inahe nga ga gu Ko du ni Bahe ki susi, nabi gu yuguyuguhe nga ga gu Ko du na tandu apai dũ, nati sande, bangiriko ki du ni zaza ha:

¹⁷Mi bi ko, ono awere te; mi ngere ka bi ko, ono mbembedi te: kerekuru akúra yo du Yakoba ni, ngau bakindo ki guari yo du aYisaraere ni; ki mangi kpakpu Moaba, ki kuadi awiri Sete ku sande dunduko.

¹⁸Edome adú ni gayo. Seira ki du a ni gayo, nga agu yo nadu ni avurayo, ho aYisaraere amanga pai ni ni nyaka.

¹⁹Ono Yakoba azóga rago, ki gbarasi yangara yo rogo abaakporo!”

²⁰Ono ko angere ku ri aAmareko, ki gumba gako sanza, niya. “AAmareko nangia gu bambata rikaaboro, ono digida gayo pai adú ni gbarasahe.”

²¹Ko ki ngere ku ri aKeno, ki gumba gako sanza, niya, “Gaoni baraka du ni nyanyaki he, gaoni bambu ki du simbia yo;

²²ono i arúnasi aKeno arunasi. Rago adú waĩ Asura ka ga na oni ni zizi aboro?”

²³Ko ki gumba gako sanza, niya. “Ako, da nikanye ni ungani ho Mbori ka manga gere ni?

²⁴Ono abaakurungba ayé Dangbandarago Kupurio yo i nikarungosi Asure, na Ebere a; Ko ayé ka du ni gbarasigbarasi ko a.”

²⁵Birama ki ru ku ari, ki niga ki karaga tiko ku ba ko yo. Baraka ki ga tigako a.