Read zande Pa Geda Aboro 25 Bible Online

Pa Geda Aboro 25 - zande bible

Pa Geda Aboro 25

¹AYisaraere ki niraki Sitimi yo. Aboro ki tona ka manga pa sino bari na awiri aMoabo nga ade.

²Agu aboro re ayambu aYisaraere tipa gayo amotumo nga ga gayo ambori, aboro ki niri he, ki ninugadi ku sande fu gayo ambori.

³AYisaraere ki kodi tiyo kuti Bara-peoro. Ga Yekova zinga ki rungudi kuti aYisaraere;

⁴Yekova ki ya fu Mose. “Mo rogo agu abaakumba dunduko du ku ri aboro, ki asi yo ku ari uru yo bara bangiri Yekova, ya gu kere zinga nga ga Yekova guari ku sa yo ti awiri aYisaraere.”

⁵Mose ki ya fu agu abasaringbanga nga ga aYisaraere yo, “Aboro ni ba sa sa ími gu gayo aboro naakodi tiyo na Bara-peoro.”

⁶Oni ngére, boro Yisaraere sa ki ye na de Midiano koyo du gani aborokporo ni Mose ki ini he, na rimbasa awiri aYisaraere dunduko a, ho i akpara ni na aume pangbadimo bamburoko dungurati yo.

⁷Ho Finasa nga wiri Erazara abi he ni, Erazara wiri Arona boromotumo. Finasa ki guari ku an dagba rimbasa yo, ki di baso ku beko,

⁸ki ndu fuo gu boro Yisaraere re ku dimo yo, ki rupu yo ue ti vuyo puu, boro Yisaraere nga kumba na gu de re a ti vuri. Si du awiri aYisaraere ki zeredi be kaza gberãngbi.

⁹Ono agu yo nakpiki be kaza gberãngbi adu wa 24,000.

¹⁰Yekova ki gumba pai fu Mose, ki ya,

¹¹“Finasa nga wiri Erazara, du titako nga Arona nga boromotumo, ai gi zinga ti awiri aYisaraere ku sa yo, wa ko adu na zinga wa kina gu mi adu na ni dagba yo, si du mi aba nga tunga awiri aYisaraere kpakava ni gi zinga te.

¹²Si du mo yá, ‘Oni ngére, mi fu gi zungahe fu ko nga pa zereda;

¹³si adú fu ko na fu angbatungako fuo ko, ni gu zungahe nga ga nyenye sunge boromotumo; bambiko ko azingi tipa gako Mbori, ki mangi pa dada ingapai tipa awiri aYisaraere.’ ”

¹⁴Rimo gu boro Yisaraere i aimi ni na de Midiano angia Zimiri, wiri Saru, nangia bazogo ku ri ga Simona arika.

¹⁵Rimo gu de Midiano i aimi ri angia Kozebí, wiri Sura, nangia bazogo ku ri agu aboro nangia ga arikayo ku Midiana yo.

¹⁶Yekova ki ya fu Mose.

¹⁷“Morúngosi aMidiano, ki mangi yo;

¹⁸mbiko i rungosi ro tigamo na gayo biriki, nga gu i anangi ro na ni rogo gu pai nga ga Peoro, na rogo gu pai nga ga Kozebi, wiri bazogo aMidiano, nga dawiriyo, nga gu ri i aimi ri ti gu uru kaza gberãngbi nadu tipa ga Peoro pai.”