Read zande Pa Geda Aboro 28 Bible Online

Pa Geda Aboro 28 - zande bible

Pa Geda Aboro 28

¹Vekova ki ya fu Mose,

²“Morúgu awiri aYisaraere, ki ya fu yo, ‘Gi gamunihe mbedisatise, gi riahe tipa gimi amotumo i namanga ha ni we, gi guzuguzu fuõhe, oni akamaa bangironi tipa ha ka ye na ni ti ringbisiringbisi ragoho.’

³Mo ki ya fu yo, Gere nga gu motumo i namanga ha ni we nga gu oni ka ye na ni fu Yekova; wiri akandoro ue du ni abara du garãra sa zanga serõ, na uru na auru, ni motumo i ka atumo na ni kindi.

⁴Wiri kandoro sa mo ka atumo na u na awiso, na gu kurai sa na anyemu;

⁵na fufurũ ngungo wa aritere biata na bebere he tipa motumo riahe, ni kodikodi he na gu nzeme i asuka ha asuka wa aritere sa na bebere he.

⁶Si du ni zozo motumo i ka atumo na ni na uru kindi, nga gu Yekova aru ndika tipa ha ri bagangara Sinai yo nga guzuguzu fuõhe, nga gu motumo i amanga ha ni we fu Yekova.

⁷Gaha mbirimbiri amotumo anidu wa ritere sa na bebere he tipa wiri akandoro ni ba sa sa; mo kaniuka mbirimbiri motumo rogo kparakpara ziazia ba, nga eerẽ mbirimbiri he fu Yekova.

⁸Gu kura wiri kandoro mo anitumo na u nyemu; mo amánga pai na u wa kina gu motumo riahe nga ga wiso, na wa gaha mbirimbiri motumo, mo nikamanga ha ni gu motumo i amanga ha ni we, ni guzuguzu fuõhe fu Yekova.

⁹“Ono ti rago saoiti mo anitumo na wiri akandoro ue ni abara du garãra sa zanga serõ, na fufurũ ngungo wa aritere saba tipa motumo riahe, kodi yo ho na nzeme, na gaha mbirimbiri motumo.

¹⁰Gere nga zozo motumo tipa asabiti dunduko, ku ri gu zozo motumo i ka atumo na ni na uru kindi, na gaha mbirimbiri motumo.

¹¹“Ono ti tonatona rago fogo diwi oni anifu zozo motumo fu Yekova; paranga abagara ni abara ue, na bakandoro sa, wiri akandoro ni abara saba du garãra sa zanga serõ;

¹²na fufurũ ngungo wa aritere bawe na bebere he tipa motumo riahe, kodi yo ho na nzeme, tipa abaabagara ni ba sa sa; na fufurũ ngungo wa aritere biata na bebere he tipa motumo riahe, kodi yo ho na nzeme, tipa gu bakandoro du sa;

¹³na fufurũ ngungo wa aritere biata na bebere he kodi yo ho na nzeme tipa motumo riahe tipa win akandoro ni ba sa sa; tipa zozo motumo ni guzuguzu fuõhe, ni motumo i amanga ha ni we fu Yekova.

¹⁴Gaami mbirimbiri amotumo anidu ni imekakue wa aritere biata tipa babagara sa, na aritere ue tipa bakandoro, na ritere sa na bebere he tipa wiri kandoro; gere nga zozo motumo tipa adiwi ni ba sa sa rogo garã sa.

¹⁵Wiri bameme sa a tipa motumo ingapai fu Yekova; i anitumo na u ku ri gu zozo motumo i ka atumo na ni na uru kindi, wa sa na gaha mbirimbiri motumo.

¹⁶“Ti bambata diwi ti rameru 14, ga Yekova pumbo susiri ka nidu

¹⁷Ti 15 rame nga ga gu diwi re pumbo ki du; oni aniri gu kpokuta adu nga na agbooro ti ni ya, tipa rame saba.

¹⁸Ti bambata uru kparakpara uru dungurati nikanidu: oni animangi nga nyanyaki sunge wa sa te,

¹⁹ono oni ki nifu gu motumo i amanga ha ni we, nga zozo motumo fu Yekova: paranga abaabagara ue, na bakandoro sa, na wiri akandoro ni abara saba du garãra sa; ami adú zanga serõ ti ra;

²⁰na gaami motumo riahe, fufurũ ngungo kodi yo ho na nzeme; oni anifu he wa aritere bawe na bebere he tipa babagara sa, na wa aritere saba tipa bakandoro sa;

²¹na wa aritere biata na bebere he tipa wiri akandoro ni ba sa sa wa du ami saba;

²²na bameme sa tipa motumo ingapai, ka manga pa dada ingapai tipa roni.

²³Oni anitumo na agi anya re ku ri gu zozo motumo nga ga wiso, nga gu du ni zozo motumo i ka atumo na ni na uru kindi.

²⁴Oni afú motumo na uru wa gere tipa uru saba, gu nga ga motumo riahe i namanga ha ni we, ni guzuguzu fuõhe fu Yekova. Si i nikafu he ku ri gu zozo motumo i ka atumo na ni na uru kindi, na gaha mbirimbiri motumo a.

²⁵Ono ti saba rame oni ki nimangi kparakpara dungurati; oni animangi nga nyanyaki sunge te.

²⁶“Kina wo oni ka manga ti uru gaoni bambata zuzu ahe, ho oni ka nitumo ni ni motumo riahe na vovo zende ahe fu Yekova rago gaoni pumbo nga ga aposo. Oni ki nimangi kparakpara dungurati; oni animangi nga nyanyaki sunge te,

²⁷ono oni ki nifu gu zozo motumo ni guzuguzu fuõhe fu Yekova: paranga abaabagara ue, bakandoro sa, wiri akandoro ni abara saba du garãra sa;

²⁸na gaami motumo riahe, nga fufuru ngu go kodi yo ho na nzeme, wa aritere bawe na bebere he tipa abaabagara ni ba sa sa, na aritere saba tipa bakandoro sa,

²⁹na wa aritere biata na bebere he tipa wiri akandoro ni ba sa sa wa du ami saba,

³⁰bameme sa, ka manga pa dada ingapai tipa roni.

³¹Ku ri gu zozo motumo i ka atumo na ni na uru kindi, na gu motumo riahe oni atúmo na ami na gaoni mbirimbiri amotumo. Ami adú zanga serõ ti ra.