Read zande Pa Geda Aboro 31 Bible Online

Pa Geda Aboro 31 - zande bible

Pa Geda Aboro 31

²“Mo íribapeawiri aYisaraere ti aMidiano; fuo gure mo ki ga koyo du atitaro ni.”

³Mose ki ya fu aboro, “Oni fú auvura fu akumba dagba roni tipa sovura, ya i ndu sa aMidiano, ka sara ngbanga ga Yekova irabape kuti aMidiano.

⁴Angbatunga aYisaraere ni ba sa sa afú aboro wa 1,000, oni ki kedi yo sa so vura.”

⁵Si du i ki kusi aboro 1,000 ni ga ngbatunga ni ba sa sa, dagba agu akutu nga ga awiri aYisaraere, wa aboro 12,000 na aũvura beyo tipa so vura.

⁶Mose ki kedi yo sa vura, aboro 1,000 ni ga ngbatungayo ni ba sa sa, i na Finasa wiri Erazara nga boromotumo, na aũsunge nga ga kparakpara ziazia ba ku beko na ambanya tipa fugapai.

⁷I ki so vura kuti aMidiano, wa Yekova arugu Mose na ni, ki imi akumba dunduko.

⁸I ki imi abakindo nga ga aMidiano yo na agu yo, na agu abakindo bisue nga ga aMidiano yo, nga Evi, na Rekeme, na Sura, na Uru na Reba. I ki imi Birama a nga wiri Beora ni basape.

⁹Awiri aYisaraere ki zi ade nga ga aMidiano yo na rukutu awiriyo a; na gayo zogozogo anya dunduko, gayo rimbasa akandoro dunduko, na gayo ahe dunduko, i arogo ho ni zizi ahe.

¹⁰I ki zokodi gayo abaakporo dunduko rogo agu aba i araka rogo ho, na gayo abataya vura dunduko,

¹¹i ki rogo gbugbu ahe dunduko, na zizi ahe dunduko, aboro na anya a.

¹²I ki yega na zizi aboro, na zizi ahe, na gbugbu ahe, fu Mose na fu Erazara boromotumo, na fu rimbasa awiri aYisaraere, ku bataya yo nadu rogo kpasakpasa arago du ringara Moaba yo, nga gu nadu pangba Yaradene ku Yereo yo.

¹³Mose na Erazara boromotumo, na abazogo nga ga rimbasa yo dunduko, i ki ndu ka gbia yo gii bataya yo.

¹⁴Ono Mose adu na zinga fu siasia akumba du ku ri rimbasa aborosovura yo, na abairarivura nga ga akutu yo na abairarivura nga ga akama yo, nayega ti sunge sovura yo.

¹⁵Mose ki ya fu yo, “Oni batasi ade ni ungayo dunduko?

¹⁶Oni ngere, agi yo re mangi awiri aYisaraere, bambiko gu rugahe nga ga Birama, ka ti ga Yekova ndika rogo gu pai nga ga Peoro, si du kaza gberãngbi aye ti ni ku dagba ga Yekova rimbasa.

¹⁷Si du awere oni ími akumbagude ni ba sa sa dagba gu rukutu yo, ki imi agu ade ni ba sa sa ini pa akumba.

¹⁸Ono agu agude nga ade, nga agu yo aina nga pa akumba ya, oni bánda yo ni ungayo tipa roni.

¹⁹Oni ki zi bataya kina zegi gii bataya yo tipa rame saba; gu ni naimi boro, na gu ni zadi kangba, oni girisi tironi ti biata uru na ti saba uru, oni na gaoni zizi yo.

²⁰Oni ki gírisi aroko ni ba sa sa, na gu ahe i amangi rogo kpoto nya, na agu ahe dunduko i amangi rogo mange meme, na agu ahe dunduko i amangi rogo ngua.”

²¹Erazara nga boromotumo ki ya fu abasovura nga agu yo nandu sa vura: “Gere nga gu rugapai nga ga rugute nga gu Yekova arugu Mose na ni:

²²ono kina dahabu, na feda, na sirigi, na marã, na kpano, na dongo,

²³nga agu ahe nanye be we, oni amánga ha si kuru rogo we, si nikadu gigiri. Ono i agírisa ha na ime kparatise a; ono agu ahe dunduko ka we arita nga ha ya, oni ki moi he ku rogo ime kparatise ki kusi he yo.

²⁴Oni azúnda gaoni aroko ti saba uru, oni ki du gigiri; fuo gure oni nikarima ku bataya yo.”

²⁵Yekova ki ya fu Mose,

²⁶“Mo gédi bange zizi ahe nga gu i arogo, aboro na zogozogo anya, mo na Erazara nga boromotumo, na agu yo du ku ri ga abayo kporo nga ga rimbasa yo;

²⁷ki kparaka zizi ahe ku rogo ho ue, dagba abaini pa sovura, nga agu yo nandu ka so vura, na rimbasa dunduko.

²⁸Mo ki dungura rũhe fu Yekova be abasovura nandu ka so vura, sa dagba 500, nga ga aboro, ga zogozogo anya, ga adongi, na dagba ga rimbasa anya a;

²⁹mo rógo ho bebere gu ki fu he fu Erazara nga boro motumo tipa ga Yekova tumbatumba gamahe.

³⁰Ga awiri aYisaraere ki ngia gu kura bebere he, mo ki rogo sa dagba bisue rogo ho, nga aboro na abaabagara, na adongi, na rimbasa akandoro, na zogozogo anya, ki fu ra fu aRevi, nga agu yo naruga pa ga Yekova banye.”

³¹AMose na Erazara nga boromotumo ki mangi wa Yekova arugu Mose na ni.

³²Were gu zizi ahe nanye ku ri agu ahe abasovura azi he adu wa akandoro 675,000,

³³zogozogo anya wa 72,000,

³⁴adongi wa 61,000

³⁵na aboro wa 32,000 dunduko, nga agu ade naina nga pa akumba ya.

³⁶Na gu bebere he, nga ga bete ga agu yo nandu ka so vura, gedigedihe adu wa akandoro 337,500,

³⁷ono ga Yekova ruhe adu wa akandoro 675.

³⁸Zogozogo anya ki du wa 36,000; ga Yekova ruhe adu dagba ra yo wa 72.

³⁹Adongi ki du wa 30,500; ga ga Yekova rũhe adu dagba ra yo wa 61.

⁴⁰Aboro ki du wa 16,000; ga Yekova rũhe adu dagba yo yo wa aboro 32.

⁴¹Mose ki fu gu rũrũhe nga ga Yekova fu Erazara nga boromotumo tipa tumbatumba gamahe, wa Yekova arugu Mose na ni.

⁴²Na gu bebere he nga ga awiri aYisaraere, nga gu Mose akpara ha ti gu nga ga agu aboro nandu ka so vura―

⁴³gu bebere he nangia ga rimbasa adu wa akandoro 337,500,

⁴⁴na zogozogo anya wa 36,000,

⁴⁵adongi wa 30,500,

⁴⁶aboro ki du wa 16,000―

⁴⁷Mose ki di sa dagba 50 a, dagba ga awiri aYisaraere bebere he, aboro na zogozogo anya a, ki fu he fu aRevi, nga agu yo naruga pa banda pa ga Yekova banye; a wa Yekova arugu Mose na ni.

⁴⁸Gu siasia akumba nga agu yo nadu ku ri rimbasa aborosovura wa akutu, na abairarivura nga ga akutu yo, na abairarivura nga ga akama yo, i ki ye ki mbedi na Mose,

⁴⁹ki ya fu Mose, “Gamo amoyambu gedi bange abasovura nga agu yo du tii be rani, a nga boro sa kpa te.

⁵⁰Ani ki ye na ga Yekova gamunihe mbedisatise a, nga gu aboro ni ba sa sa abi he, nga afongo dahabu, azogbo ku ndue yo, na abenge, atongo wirinzaga, na afongo tue, na kura afongo, ka manga pa dada ingapai tipa rani ku bara bangiri Yekova a.”

⁵¹AMose na Erazara nga boromotumo ki rogo daha bu beyo, na mangimangi afongo a dunduko.

⁵²Agu adahabu dunduko nga ga tumbatumba gamahe nga gu i afu he fu Yekova, nga ga abairarivura nga ga akutu, na ga abairarivura nga ga akama, barõa asekerehe adu wa akiro 275.

⁵³Bambiko abasovura arogo zizi ahe, aboro ni ba sa sa ki nirogo kina gayo.

⁵⁴AMose na Erazara nga boromotumo ki rogo dahabu nga ga abairarivura nga ga akutu yo na ga akama yo, ki ye na ni ku bamburoko dungurati yo, tipa tingidapai tipa awiri aYisaraere ku bara bangiri Yekova.