Read zande Pa Geda Aboro 32 Bible Online

Pa Geda Aboro 32 - zande bible

Pa Geda Aboro 32

¹Were awiri Rubena na awiri Gada adu na bakere rimbasa zogozogo anya be yo ki susi. I abi ringara Yazera na ringara Girada ya gu ba re du ni ba tipa zogozogo anya.

²Awiri Gada na awiri Rubena ki ye ka fura na Mose, na Erazara boromotumo, na agu abazogo nga ga rimbasa, ki ya,

³“Atarota, na Dibona, na Yazera, na Nimera, na Esebona, na Erare, na Sebama, na Nebo, na Bone,

⁴nga gu ringara Yekova amangi he barangba rimbasa nga ga awiri aYisaraere, si du ni ringara tipa zogozogo anya, gamo amoyambu du na zogozogo anya be yo gbe.”

⁵I ki ya, “Ka ani ngba bangiro, mo fú gi ringara re fu gamo amoyambu ni gayo; ka mo ndú nga na ani ku mbiti Yaradene yo ya.”

⁶Mose ki ya fu awiri Gada na fu awiri Rubena, “Awirinaroni andú ka so vura, ho oni ka sunga ni kina erẽ tigaoni?

⁷Tipagine oni arungburasi kpoto awiri aYisaraere yo ti ni tipa ndu ku mbiti yo ku rogo gu ringara Yekova afu fu yo?

⁸Kina wo abaroni amangi, ni gu rago mi akedi yo Kadesa-baranea yo i ndu ka bi gu ringara re.

⁹Bambiko ho i andu ni ki da rogo gu ngboongboorago du Esekore yo, ki bi gu ringara re, i arungburasi kpoto awiri aYisaraere yo, ya ka i ndu nga ku rogo gu ringara nga gu Yekova afu fu yo ya.

¹⁰Ga Yekova zinga ki rungudi ni gu uru re, ko ki zunga he, ki ya,

¹¹‘Ni rengo a nga boro sa dagba agu akumba nayega ringara Ezipeta yo, du garãyo tona ti 20 na ka ndu ku mbata yo nikabi gu ringara mi azunga he fu Abarayama tipa ha, na fu Yisaka, na fu Yakoba te, bambiko i apeka nga re na kpotoyo yo dunduko te;

¹²kina Kareba wiri Yefune boro Keneze, na Yosua wiri Nuna, bambiko i napeka Yekova na kpotoyo yo dunduko.’

¹³Ga Yekova zinga ki kĩ kuti awiri aYisaraere, ko ki mangi yo i nita ata koyo na kono ngbakungba yo tipa garã 40, daho rika ngbatungayo dunduko, nga agu yo namangi gbegberẽpai ku bangiri Yekova anyasi ni dũ.

¹⁴Oni ngére, oni du ku ba abaroni, zugazuga aboro ingapai, ka kiisa gu kere zinga kindi nga ga Yekova koyo du awiri aYisaraere ni!

¹⁵Bambiko ka oni sa tironi ku sa yo ti peka fuo ko, ko ambú yo kindi ku ngbakungba no; oni ki gbarasi agi aboro dunduko re.”

¹⁶I ki ye ki mbedi koyo du ko ni, ki ya, “Ani nikadua andugu akandoro erẽ tipa gaani zogozogo anya, na abaakporo tipa gaani rukutu yo,

¹⁷ono ani adú ni mbakadimbakadi tirani na aũvura ka ndu ku mbata yo fu awiri aYisaraere, daho ka ani da ni na yo ku rogo gayo ba. Gaani rukutu yo ki niraki rogo agu abaakporo ngapa, bambiko agu aboro naaraka rogo gu ringara re.

¹⁸Ani akáraga nga tirani ku kpurani no te ki da kina ho awiri aYisaraere ni ba sa sa ka roga gayo ringara ni.

¹⁹Bambiko ani adía nga ringara na yo ku mbiti Yaradene yo, na ku mbata yo te; bambiko gaani ringara ti ku be rani ku mbiti Yaradene ku uro no.”

²⁰Mose ki ya fu yo, “Ka oni kpi nyemu ka manga gi pai re, ka oni úkadi aũvura ti roni ka ndu ku mbata yo fu Yekova ka so vura,

²¹aboro ni ba sa sa nga gaoni yo úkadi ũvura, ka si Yaradene ku barangba Yekova, daho ka ko dandi avurako ni barangba ko,

²²gu ringara re ki du ni zogozogo ho ku bara bangiri Yekova; fuo gure oni ki karaga tironi tie, ka pai adú nga ku ri roni yo du Yekova ni ya, na yo du awiri aYisaraere ni a ya; gi ringara re ki ngia gaoni he ku bara bangiri Yekova.

²³Ono ka oni amánga nga ha wo ya, oni ngére, oni mangi ingapai kuti Yekova; oni ki ini ni rengo ya gaoni ingapai amánga kina roni.

²⁴Oni dúdua abaakporo tipa gaoni rukutu yo, na andugu tipa gaoni akandoro; ki mangi agu apai kuru ngbaroni yo.”

²⁵Awiri Gada na awiri Rubena ki gumba pai fu Mose, ki ya, “Gamo amoyambu amánga a wa gaani gbia agumba ha.

²⁶Gaani rukutu yo na adiarani, gaani rimbasa akandoro, na gaani zogozogo anya dunduko, anyé rogo agu abaakporo du Girada yo;

²⁷ono gamo amoyambu nikasi ku mbiti yo, agu aboro ni ba sa sa ukadi aũvura tipa so vura, ku barangba Yekova ka so vura, wa gaani gbia agumba ha.”

²⁸Mose ki rugu pai tipa yo fu Erazara boromotumo, na fu Yosua wiri Nuna, na fu agu yo nadu ku ri ga abayo akporo nga ga angbatunga awiri aYisaraere.

²⁹Mose ki ya fu yo, “Ka awiri Gada na awiri Rubena súsi na oni ku mbiti Yaradene yo, agu aboro ni ba sa sa úkadi aũvura ka so vura, ku barangba Yekova, ringara ki du ni zogozogo ho barangba roni, si du oni ki fu gu ringara nga Girada fu yo ni gayo ukumbo.

³⁰Ono ka i así nga na oni ku mbiti yo ni ukadiukadi yo na aũvura ya, i ki du na gayo aũkumbo kina ringara Kanana yo.”

³¹Awiri Gada na awiri Rubena ki karaga ha, ki ya, “Wa Yekova agumba ha fu gamo amoyambu, kina wo ani akamanga.

³²Ani asi tigaani ku mbiti yo ni ukadiukadi tirani na aũvura ku barangba Yekova ku ringara Kanana yo, ono gaani ringara anye fu rani kina mbiti Yaradene no.”

³³Mose ki fu he fu yo, fu awiri Gada na fu awiri Rubena, na fu bebere ngbatunga Manase wiri Yosefa, nga gu ngbi nga ga Siona nga bakindo aAmoro, na gu ngbi nga ga Ogo bakindo Basana, gaha ringara na gaha abaakporo na abangbandaha, nga kina agu abaakporo du rogo ho dunduko.

³⁴Awiri Gada ki dua Dibona, na Atarota na Aroere,

³⁵na Aturotasofana, na Yezera, na Yogeba,

³⁶na Betenimera, na Betarana, nga abaakporo ngapa na andugu tipa akandoro.

³⁷Awiri Rubena ki dua Esebona, na Erara, na Kiria-taima,

³⁸na Nebo, na Bara-mona, ono i ki saki rimoho, na Sibema; i ki fuku kura rimo fu agu abaakporo nga gui adudua ha.

³⁹Awiri Makira wiri Manase ki ndu ku Girada yo, ki di he, ki kusi agu aAmoro naadu yo.

⁴⁰Mose ki fu Girada fu Makira wiri Manase, ko ki sungu yo.

⁴¹Yaira wiri Manase ki ndu ka dia gaha akporo, ki yambu rimoho nga Avota-yaira.

⁴²Noba ki ndu ki di Kemata, na gaha akporo, ki yambu rimoho nga Noba, ti kina rimoko.