Read zande Pa Geda Aboro 35 Bible Online

Pa Geda Aboro 35 - zande bible

Pa Geda Aboro 35

¹Yekova ki ya fu Mose rogo gu kpasakpasa arago du Moaba yo pangba Yaradene ku Yereo yo,

²“Mo rúgu awiri aYisaraere, ya i fú abaakporo rogo gayo angbi fu aRevi i niráki rogo ho; na aringara banambu pati abaakporo kirikiri oni ka fu he fu aRevi a.

³Agu abaakporo re nikadu ni gayo i niraki rogo ho, na gaha aringara banambu ki du tipa gayo zogozogo anya, na tipa gayo ahe, na tipa gayo anya dunduko.

⁴Agu aringara banambu nga ga agu abaakporo re, nga gu oni ka fu fu aRevi, si atóna ti vuro ngapa bakporo ku zegi yo wa bagiza mbiribe wa 1,000 pati he dunduko kirikiri.

⁵Oni ki ringbisi rago gii bakporo zegi yo ku uroyo wa bagiza mbiribe 2,000, na ku sudiyo wa bagiza mbiribe 2,000, na ku dioyo wa bagiza mbiribe 2,000, na ku nodiyo wa bagiza mbiribe 2,000, bakporo ki du bebere he yo; gere nikangia aringara banambu fu yo nga ga gayo abaakporo.

⁶Agu abaakporo nga gu oni ka fu fu aRevi, si adú ni gu sita abaakporo nga ga bagbuko, nga gu oni ka ida ha fu abaimi aboro i nioro koyo, ku ri gere, oni ki fu abaakporo 42 fu yo berewe.

⁷Agu abaakporo dunduko oni ka fu he fu aRevi si adú wa abaakporo 48, na gaha aringara banambu.

⁸Ono tipa agu abaakporo nga gu oni ka fu rogo agu angbi nga ga awiri aYisaraere, be ngenge ngbatungayo oni adía ha ni dungu he, be zogoro ngbatungayo oni adía ha ni umba ha; be angbatunga ni ba sa sa kina kuti pa gayo angbi nga gu du be yo, wo i ka fu he dagba gayo abaakporo fu aRevi.”

⁹Yekova ki ya fu Mose,

¹⁰“Mo gúmba pai fu awiri aYisaraere, ki ya fu yo wẽ, Ho oni ka si Yaradene ni ku rogo ringara Kanana,

¹¹si du oni asia abaakporo si du ni abaakporo bagbuko tipa roni, ya gu baimiboro nikaniimi boro ni bino ni ki oro koyo.

¹²Agu abaakporo re adú fu roni tipa gbuko be abairibape, ya ka gu boro niimi boro kpi nga ya, daho ni ka ru ni barangba rimbasa tipa sarangbanga.

¹³Agu abaakporo oni ka fu si adú tipa roni nga abaakporo bagbuko sita.

¹⁴Oni afú abaakporo biata ku mbiti Yaradene yo, na abaakporo biata oni ka fu he ku ringara Kanana yo, si nikadu ni abaakporo bagbuko.

¹⁵Agi abaakporo du sita re adú tipa bagbuko tipa awiri aYisaraere, na tipa kungba aboro, na tipa agu aboro sungu ku dagba yo, gu boro nikaniimi boro ni bino ni ki oro koyo.

¹⁶“Ono ka ni nari ni ni he wa marã, ni ki kpi, baimiboro nga ni; i aniimi gu baimbiboro re aimo.

¹⁷Ka ni nari ni na mbia ka du be ni, nga gu ka imi boro, ni ki kpi, baimiboro nga ni; i aniimi gu baimiboro re aimo.

¹⁸Watadu ka ni nari ni na ngua ka du ba ni, nga gu ka imi boro, ni ki kpi, baimiboro nga ni; i aniimi gu baimibororeaimo.

¹⁹Kinabairibapetiganinikaniimi gu baimiboro re; ho ni ka nigbia ni ni, ni ki imi ni.

²⁰Ono ka ni turã ni ni soga ni watadu zumo he ni ome sa ni, ki gbu ka pida ni, ni ki kpi be he,

²¹watadu ni ki nari ni ni beni ni soga ni, ni ki kpi, si du gu ni nanari ni i ki imi ni aimo; baimiboro nga ni. Bairibape aniimi ni aimo, ho ni ka nigbia ni ni.

²²“Ono ka ni turã ni aturã gbagbaigba zanga sogote dagba yo mbata, watadu zumo he ni ome zanga pida ni na ni,

²³watadu na mbia, nga gu ka imi boro, ka ni abi nga ha ya, ni ki kpi, ka ni adu nga mbata ni vurani ya, watada ka gbata pai ku ti ni a ya;

²⁴si du rimbasa ki sari ngbanga dagba baimiboro na bairibape kuti agi asarangbanga re.

²⁵Rimbasa ki batasi baimiboro be bairibape, rimbasa ki karaga ni ku rogo gani bakporo bagbuko yo, yo ni aoro ku ho ni, ni ki niraki yo kindi ki da kina ti kpio gu gbiamotumo, du ni mbedimbedi ni na kparakpara ziazia nzeme.

²⁶Ono ka baimiboro guari ni gu rago ka kura ti bangbanda gani bakporo bagbuko, yo ni aoro ku ho ni;

²⁷bairibape ki bi ni gii bangbanda gani bakporo bagbuko yo, bairibape ki imi baimiboro, ni adú nga na pai ku ri ni nga bape imoboro te.

²⁸Bambiko ka ni anye kina rogo gani bakporo bagbuko dati kpio gbiamotumo; ono fuo kpio gbiamotumo baimiboro ki karaga tini ku rogo ringara gani ũkumbo.

²⁹“Agi apai re adú ni ndika tipa sarangbanga rogo arika angbatunga roni dunduko rogo gaoni abaraka dunduko.

³⁰Gu boro ka imi boro, i aniimi gu baimiboro re ku ngba adezire yo; ono i aniimi nga boro ku ngba dezire yo sa te.

³¹Ku ri gure ka oni adía nga motumo tipa batasa unga baimiboro ya, nga gu ni ingi pai sa kpio; i aniimi ni aimo.

³²Oni anidi nga motumo tipa gu ni naoro ku rogo gani bakporo bagbuko, ya ni ye berewe ka araka rogo gu ringara re, mbata fu kpio gbiamotumo te.

³³Si du oni agbárasa nga gu ringara du oni rogo ho te; bambiko kure nga gu he nagbarasa ringara agbarasa, ka i túmo nga gu ringara tipa uka kure nga gu uka yo rogo ho te, ono kina kure gu ni nauka kure.

³⁴Ka oni bírikosi nga gu ringara oni araka rogo ho ya, nga gu mi araka rogo ho; bambiko mi nga Yekova naraka dagba awiri aYisaraere.”