Read zande Pa Geda Aboro 4 Bible Online

Pa Geda Aboro 4 - zande bible

Pa Geda Aboro 4

²“Oni gédi bange awiri Koata dagba awiri Revi yo, wa du arikayo, wa du ku abayo,

³tona u agu yo du garãyo 30 ki da ti agu yo du garãyo 50, nga agu yo dunduko rengbe ka rima ku rogo sunge, ka amanga pa sunge rogo bamburoko dungurati yo.

⁴Gere nikangia gu sunge nga ga awiri Koata bamburoko dungurati yo; tipa agu ahe du ziazia ki susi.

⁵Ho bataya ka niguari ni, Arona ki rimi, na awiriko ki rogo roko kparaba ki dadi sanduki dezirepai na ni;

⁶i amáa gu kpoto dadahe du wa kpoto agbodi ku ri he, ki gbaragi gu roko auru he du ni gbaya ha, ki moi angbongboho ku rogo ho.

⁷Ono i agbáraga roko ni gbaya ha auru mnisa nga ga kpokuta yugopai, ki moi akurungbu ku auru he, na abaarikare, na akambu na ainga tipa uka ahe ku rogo; gu kpokuta i ka amaa ha na uru kindi nikadu auru he;

⁸i agbáraga zamba roko auru he, ki nidadi he na kpoto dãdahe du wa kpoto agbodi, fuo gure i ki nimoi angbongboho ku rogo ho.

⁹I adía roko ni gbaya ha, ki dadi baduawe na ni nga gu nikahasa rago, na ggha awe, na gaha awaza, gaha asaani kingiriwe, na gaha apere nzeme dunduko, nga gu i namanga sunge he na ni:

¹⁰i amáa ha na agu aũsunge dunduko nga gaha ku vuru kooto dadahe yo du wa kpoto agbodi, ki moi he ku auru gbaraga ka tinda ha ti ni.

¹¹Ono auru bamotumo dahabu i agbáraga roko ni gbaya ha, ki dadi he na kpoto dadahe du wa kpoto agbodi, ki moi angbongboho ku rogo ho;

¹²i aróga aũsunge dunduko nga ga manga paha, nga gu i namanga sunge rogo ho rogo kparakpara ba, ki momoi he ku rogo roko ni gbaya ha, ki dadi he na kpoto du wa kpoto agbodi, ki moi he ku auru gbaraga ka tinda ha ti ni.

¹³I andúkuda gu kuke nga ga bamotumo ku sa yo, ki gbaragi roko ni ngungungu he auru he;

¹⁴i ki moi aũsunge dunduko nga gaha ku auru he, nga gu i namanga sunge he rogo ho, auzokingire, angorã tipa pasio, aũndukuda ahe na akurungbu, na agu aũsunge dunduko nga ga bamotumo; i adáda ha na kpoto dadahe du wa kpoto agbodi, ki moi angbongboho ku rogo ho.

¹⁵Ho aArona na awiriko ka nidigisi pa dada kparakpara ba ni, na aũkparakpara ba dunduko, wa bataya ka aguari ku mbata yo, fuo gure awiri Koata nikaniye ka aka ha, ono i azáda nga kparakpara ahe te, i ka kpika. Agi ahe re nga ga bamburoko dungurati awiri Koata ka atinda ha.

¹⁶“Gu sunge nga ga Erazara wiri Arona nga boromotumo nikangia pa gu nzeme du tipa we, na wene fuõngua, na gu motumo riahe du adu kindi, na nzeme mbeda; gu sunge nga ga banye dunduko, na agu ahe dunduko du vuru he yo, kparakpara ba na aũhe dunduko.”

¹⁷Yekova ki ya fu aMose na Arona,

¹⁸“Ka oni kpára nga agu arika nga ngbatunga Koata ku sa yo ti aRevi ya;

¹⁹ono were oni ka manga fu yo, ya i nye ni ungayo, ka i akpika nga ya, ho i ka nimbedi ni na agu ahe du ziazia ki susi: AArona na awiriko nikanirimi ku dimoyo, ka ringbisa pa gayo asunge fu yo ni ba sa sa na gayo atindiro,

²⁰ono i anirimi nga ku dimoyo ka bi kparakpara ziazia ahe te zavura tipa guru rago vurũ, i ka kpika.”

²¹Yekova ki ya fu Mose,

²²“Mo gédi bange awiri Gerusona a, wa du ku abayo, wa du arikayo;

²³tona ti agu yo du garãyo 30 ki da ti agu yo du garãyo 50, i mo ka geda yo, nga agu yo dunduko rengbe ka rima ku rogo sunge a, ka amanga pa sunge rogo bamburoko dungurati yo.

²⁴Gere nga gu sunge nga ga arika Gerusona yo, rogo manga sunge na rogo pa tinda atindiro:

²⁵i nikatinda agu aroko nga ga banye, na bamburoko dungurati, na agu ahe nadada ha, na gu kpoto dadahe du wa kpoto agbodi nga gu nidu ku auru he, na asiasi roko kparaba tipa ngbadimo bamburoko dungurati,

²⁶na gu asiasi roko i naasa ha vurukporo ho, na asiasi roko kparaba tipa ngbadimo vurukporo, nga gu du pati banye na pati bamotumo kirikiri, na agiri he, na agu ahe du tipa sunge he dunduko; i ka manga agu asunge dunduko du tipa manga pa agu ahe dunduko re.

²⁷Gu sunge awiri Gerusona ka manga ha si adú dunduko kuti sangba Arona na awiriko; rogo pa gayo tinda atindiro, na rogo gayo sunge, oni aríngbisa pa gayo atindiro fu yo dunduko nga gu i ka atinda.

²⁸Gere nga gu sunge nga ga agu arika nga ga awiri Gerusona yo rogo bamburoko dungurati yo, gayo sunge adú tii be Itamara nga wiri Arona nga boromotumo.

²⁹“Ono tipa awiri Merari, mo agéda yo wa du pa arikayo, wa du ku abayo;

³⁰tona ti agu yo du garãyo 30, ki da ti agu yo du garãyo 50, i mo ka geda yo, nga agu yo rengbe ka rima ku rogo sunge, ka amanga pa sunge rogo bamburoko dungurati.

³¹Gere nikangia gayo sunge tindiro, kuti pa gayo asunge dunduko bamburoko dungurati yo: agu agbaraga nga ga banye, na angbongboho, na adangbaha, na andu mburuhe;

³²na agu adangba du pangba vurukporo kirikiri, na andu mburuhe, na anerihe, na agirihe na aũhe dunduko, na aũsungehe dunduko; oni aríngbisa agu aũsunge re kina ti rimoho fu yo nga gu i ka atinda ha.

³³Gere nga gu sunge nga ga agu arika nga ga Merari yo, kuti pa gayo asunge dunduko rogo bamburoko dungurati yo, ku tii be Itamara nga wiri Arona nga boromotumo.”

³⁴AMose na Arona na agu abazogo nga ga rimbasa yo ki gedi awiri Koata wa du arikayo, wa du ku abayo,

³⁵tona ti agu yo du garãyo 30 ki da ti agu yo du garãyo 50, nga agu yo rengbe ka rima ku rogo sunge, ka amanga pa sunge rogo bamburoko dungurati;

³⁶agu yo i agedi yo dagba yo wa du arikayo i adu wa aboro 2,750.

³⁷Agi yo re i agedi yo dagba ga Koata arika, nga agu yo dunduko namanga sunge bamburoko dungurati yo, aMose na Arona agedi yo kuti sangba Yekova ku ngba Mose.

³⁸Agi yo re i agedi yo dagba awiri Gerusona yo, wa du arikayo, na wa du ku abayo,

³⁹tona ti agu yo du garãyo 30 ki da ti agu yo du garãyo 50, nga agu yo dunduko rengbe ka rima ku rogo sunge ka amanga pa sunge bamburoko dungurati―

⁴⁰agu yo i agedi yo dagba yo, wa du arikayo, wa du ku abayo, i adu wa aboro 2,630.

⁴¹Agi yo re i agedi yo dagba ga awiri Gerusona arika, nga agu yo dunduko namanga sunge bamburoko dungurati yo, nga agu yo aMose na Arona agedi yo kuti sangba Yekova.

⁴²Agu yo i agedi yo dagba ga awiri Merari arika, wa du ku abayo,

⁴³tona ti agu yo du garãyo 30 ki da ti agu yo du garãyo 50, nga agu yo rengbe ka rima ku rogo sunge, ka amanga pa sunge bamburoko dungurati―

⁴⁴agu yo i agedi yo dagba yo wa du pa arikayo, i adu wa aboro 3,200.

⁴⁵Agi yo re i agedi yo dagba ga awiri Merari, arika, nga agu yo aMose na Arona agedi yo kuti sangba Yekova ku ngba Mose.

⁴⁶Agu yo dunduko i agedi yo dagba aRevi yo, nga agu yo aMose na Arona na agu abazogo nangia ga awiri aYisaraere yo agedi yo, wa du arikayo, wa du ku abayo,

⁴⁷tona ti agu yo du garãyo 30 ki da ti agu yo du garãyo 50, nga agu yo rengbe ka rima ku rogo sunge, na gu sunge nga sunge tinda tindiro bamburoko dungurati yo,

⁴⁸agu yo i agedi yo, i adu wa aboro 8,580.

⁴⁹Mose agedi yo kuti sangba Yekova, aboro ni ba sa sa wa du pa gayo sunge, na wa gayo atindiro adu; were Mose agedi yo, wa Yekova arugu ko na ni.