Read zande Mika 1 Bible Online

Mika 1 - zande bible

Mika 1

¹Gu pai nga ga Yekova naaye fu Mika boro Morasa ti rago Yotama, na ti rago Aza, na ti rago Izikiya, nangia abakindo aYudo, nga gu pai ko abi tipa Somorona na Yerusarema.

²Oni gí he, oni nga aboro, oni dunduko; Ako kpotosende oni dége turoni, na agu ahe dunduko du rogo ho; Gbia nga MBORI dú ni dezire kuti roni, Gbia rogo gako kparakpara ziazia yekaru yo.

³Bambiko oni ngére, Yekova nakura rogo gako ba yo, ko azórã ku sande ki nindu ri gu tumbatumba arago nga ga kpotosende.

⁴Abaagangara azáraga ku tii nduko yo angboongboorago adú ni sapusapu he, wa dada be we, wa agu aime ninafu ti bagitaime.

⁵Gi dunduko re du tipa gu samungu nga ga Yakoba na tipa gu ingaapai nga ga ngbatunga aYisaraere. Gine nga gu samungu nga ga Yakoba? A nga si nga Somorona te? Na gine nga gu ingapai nga ga ngbatunga aYudo? A nga si nga Yerusarema te?

⁶Si du mi agbarasa Somorona ti ni si du wa guguda kpasakpasa rago yo, wa ba rũka bakakue; mi ki uka gaha ambia ku rogo ngboongboorago, ki kusi mburuhe gbayaga.

⁷I akúadi gaha sese kpiaahe dunduko rukutu, i azó gaha ngbengbe ahe dunduko ni we, na gaha kpiaane dunduko mi agbárasa ha a; bambiko si adungura ha na gu marã nga ga ngbe irabari, i akáraga ha berewe fu gu ngbengbe he nga ga irabari.

⁸Mi akpára ni kpenunga ki niyoro wawa bambiko gere; mi andu zanga roko ti kpotore ni kundiri re; mi akpara wa ahúa, ki ta ngbadure ni worohe wa agu azire nga asurutio.

⁹Bambiko i arengba nga na wisa gaha oro te; si da kina ku Yuda yo, si da ti ngbadimo bakporo nga ga gimi aboro, kina ku Yerusarema yo.

¹⁰Ka oni gúmba nga ha Gata yo ya, ka oni kpári nga wa sa ya; aboro Bete-re-afura yo oni wírigi tironi nvutu yo.

¹¹Araki Safira yo, oni súsi ngba gaoni gene, ni kundiri roni na zee; araki Zanana yo ka oni Kúru nga yo ya; gu kpenunga nga ga Bete-ezere adía gaha barugo be roni.

¹²Bambiko araki Marota yo nasunguda wenepai na baka bangirise, bambiko gbigbitapai zorõ ku sende no be Yekova ki da ti ngbadimo bakporo Yerusarema.

¹³Araki Rakisa yo, oni vodi afarasi kuti ngbagidavura; oni nangia tonatona ingaapai fu aboro Siona, bambiko i abi gu samungu ti roni nga ga aYisaraere.

¹⁴Si du oni ka fu gamahe ti ni nga ga kparakatise fu Moresete-gata; aboro Akiziba adú ni abanangi he fu abakindo aYisaraere.

¹⁵Mi ayé na badibe aboro berewe ku ri roni nga araki Maresa yo; gu taarimo nga ga Yisaraere ayé ku Adurama yo.

¹⁶Oni kpe rironi ki yere mangerironi, tipa agu agude nga ga gaoni ngbarago; oni kpé rironi wa ga nguku, bambiko i agúari pati roni ki ndu ni zizi yo.