Read zande Mika 2 Bible Online

Mika 2 - zande bible

Mika 2

¹Na gberẽ he fu agu yo nasanga irairapai ki niberẽ pa manga gbigbitapai ho piki yo ni ri gayo abarame! Ho rago nagira ni, i namanga ha, bambiko si rogo gu ome du ti beyo.

²I ki nikpi aati, ki nizi he; na abambu, ki nirogo ho ku sa yo; i narungosi boro na gani aborokporo, boro na gani mosoro.

³Si du ya Yekova ti ni: Oni ngére, mi nasanga gbigbitapai kuti agi arika ngbatunga aboro re, nga gu oni ka dia nga ha ti goroni ya; oni atá nga na ruka te, bambiko si nikadu ni gbigbita rago.

⁴Ti gu rago re i abí bia sengahe kuti roni, ki nikpari na kere kpenunga, niya, “I gbarasi rani Kpakaya; ko nasa agu ahe nga ga gimi aboro he; ko di he be re ku sa yo! Ko nakparaka gaani aati dagba asamungu.”

⁵Si du oni adú nga na boro na giri ringbisahe dagba roni tipa ringbisa he rogo ga Yekova gbuu yo te.

⁶“Ka oni túngusi nga pai ya” —were i atúngusa pai— “ka boro atungusa nga ngbatunga pai wa gu re ya; pa zee adúsia nga rani te.”

⁷Ako ga Yakoba rika ngbatunga aboro, ka i gumba gere? Ga Yekova Toro nahi pai te? Agi apai re nga gako mangaapai te? Gimi apai namanga nga wenepai fu gu ni nata ni ruru ni te?

⁸Ono oni zingi kuti gimi aboro wa avurayo; oni uru gbanga roko ti agu yo ra zezeredi, ti agu yo a nasusa zezeredi zanga kida kuti berã pa sovura.

⁹Oni bafu ga gimi aboro ade ku zegi yo rogo gayo wene abambu yo; oni di gi taarimo ku sa yo ti paranga awiriyo nye anye kindi.

¹⁰Oni gúari ki ga, bambiko gere nga ba gaoni ongoda te; bambiko gu birikobiriko pai nagbarasa ahe ni kere gbarasa he.

¹¹Ka boro ata kirikiri ki gumba kungba apai na pa zire, niya, “Mi atúngusa pa imekakue fu roni na baripiro,” ko adú ni batungusipai fu agi aboro re!

¹²Ako Yakoba, mi adúngura roni dunduko ni rengo, mi adúngura gu yangara yo nga ga aYisaraere yo; mi amáa yo kina sa wa akandoro rogo ndugu ra, wa rimbasa akandoro rogo gaami banambu, baworo adú mbiko ngenge aboro.

¹³Gu ko nasara gene nikangbe mbata fu yo; i agbada koyo ki susi ngbadimo bakporo, nikuru ku zegi yo ngba ha. Gayo bakindo nikangbe ku mbata yo yo fu yo, Yekova ki du ku mbata yo fu yo.