Read zande Mika 5 Bible Online

Mika 5 - zande bible

Mika 5

¹Ono oni du ni kisikisi roni be ngapa bakporo; i ru nguru kuti rani; i nata pangba bazogo aYisaraere ni ngbondo.

²Ako Betereme Efurata, wa du mo ni umba ro dagba angbatunga aYudo ono boro ayé yo du mo ni tipa re nikadu ni bazogo aYisaraere, naadu ho bakuru yo, ti tonatona arame.

³Si du ko ambú pa yo daho gu ri naima be vungu ka vunga ni; si du yangara awirinako ki yega fuo awiri aYisaraere.

⁴Ko ki ru ka riga gako rimbasa akandoro ni gu ome nga ga Yekova, ni gu taarimo nga ga rimo Yekova gako Mbori. I aráka ni bandabanda yo, bambiko ko adú awere ni bahe ki da ti digida kpotosende.

⁵Gere ki du nga zereda, ho aAsuro ka ye ni ku rogo gaani ringara ki ndu ri gaani sende, ya ani akúsa ababanda akandoro saba kuti yo na abazogo aboro muambi;

⁶i azóga ringara aAsuro ni basape, na gu ringara Nimeroda ni gbegbe basape; i ki batasi rani be aAsuro ho i ka ye ni ku rogo gaani ringara ki ndu ti gaani bangbandarago.

⁷Si du gu yangara yo nga ga Yakoba yo adú dagba badungu aboro wa ndomo be Yekova, wa gu mai nana gbaragbara ku ri nvuo, nga gu asunguda nga aboro ya, ka si asunguda nga awiri aboro a ya.

⁸Gu yangara yo nga ga Yakoba yo adú dagba arikaaboro, dagba badungu aboro, wa bahu dagba anya nvuo bire yo, wa paranga bahu dagba arimbasa akandoro, nga gu ru, ho u nandu koyo ni, u nasimba ra ki nisipi ra rukutu, ka boro adu nga ho ka batasa ra ya.

⁹Bero adú ni tumbatumba ha ku ri avuraro, i abá avuraro dunduko ku sa yo.

¹⁰Ni gu rago re, wo poi Yekova, mi abáfa gaoni afarasi dagba roni ku sa yo ki gbarasi gaoni angbagidavura;

¹¹mi ki kpara abaakporo rogo gaoni ringara ku sa yo ki bafu gaoni nyanyaki aba dunduko;

¹²mi ki rogo pa soroka be roni ku sa yo, ka oni adú nga na abagumba sangbaatoro dagba roni berewe ya;

¹³mi ki bafu gaoni sese kpiaahe ku sa yo na gaoni duadua kpiaahe dagba roni, oni anúngadi nga ku sande fu ũsaberoni berewe te;

¹⁴mi ki mofo gaoni aAsera nga angbama dagba roni, ki gbarasi gaoni abaakporo.

¹⁵Mi aíra bape ni zinga na ngaria ngaria zinga kuti agu arikaaboro agia nga sangba re ya.