Read zande Mika 6 Bible Online

Mika 6 - zande bible

Mika 6

¹Oni gí gu pai Yekova nagumba: Oni gúari, oni pé pa gaoni ngbanga fu abaagangara, agangara gí fugoroni.

²Oni nga abaagangara, oni gí ga Yekova pai kuti aboro, na oni nga nyenye amburu kpotosende a; bambiko Yekova du na pai kuti gako aboro, ko adárã pai na aYisaraere.

³“Ako gimi aboro, gini pai mangi mi fu roni? Na gini pai mbusi mi roni na ni? Oni káraga pai fere!

⁴Bambiko mi akusi roni ringara Ezipeta yo, ki tumo roni rogo kporo akanga yo; mi kedi Mose ku mbata yo fu roni, na Arona, na Miriama a.

⁵Ako gimi aboro, oni tíngidi pa gu pai Baraka asangi nangia bakindo aMoabo, na gu pai Birama wiri Beora akaraga ha fu ko, na gu pai namangi tona Sitimi yo daku Girigara yo, ya oni ini gu manga pa rurupai nga ga Yekova.”

⁶“Mi ayé na gine ku bara bangiri Yekova, ka tumusa ku bara bangiri Mbori du ari yo gbe? Mi ayé ku bara bangiriko na zozo amotumo, na awiri abagara nga ga gu garã ra?

⁷Rago angbá ti Yekova mbiko abaakandoro kutu kutu, na badungu nzeme nafu wa adi kutu bawe? Mi afú bambata wire tipa gi samungu, na zuzu borore tipa gu ingapai nga ga mbisimore?”

⁸Ako boro, ko yugu gu he foro ngba angba; gine Yekova aida be ro? a nga kina manga pai ni ruruhe, na ka kpi nyemu weneringise, na ka ta ni umbasitise na ga Mbori, te?

⁹Fugo Yekova napaa apaa fu bakporo― ndikidi tatamana nga ka gunde ti rimoro: “Oni gí pai ngba ngbondo, na ngba gu ni naasia pai fu he!

¹⁰Ka bangire rengbe na go ti pa kikiipaahe nga ga gbegberẽpai ku gbegberẽ boro yo? na ti gu ũringbisahe nakpa du ni tiwatiwa ha?

¹¹Mi rengbe ka sara ngbanga fu gu boro du na gbegberẽ ũringbisaahe be ni na mangu aũringbisaahe ni biriki?

¹²Gaoni aboro kumuko hi be zuu; gaoni aborokporo nagumba azire, mirãyo du ni úbiriki ngbayo yo.

¹³Si du mi tona ka ta roni, ki nisa roni wa kungba he bambiko gaoni ingaapai.

¹⁴Oni arí he, ono ka oni ambí nga ya, gomoro ki du rogo agu aparoni du ku vuroni yo; oni aíga ahe, ono ka oni adú nga na ahe ya, gu oni ka iga ha mi afú he sa basape.

¹⁵Oni aúruga ahe, ono oni aké nga ha te; oni apíra zuzu ngua aeraya, ono oni ambéda nga tironi na nzemehe te; oni apíra rindi abakakue, ono oni ambíra nga imehe te.

¹⁶Bambiko oni ka kuti ga Omeri rugaapai, na gu mangaapai nga ga ngbatunga Aba; oni apeka fuo gayo rondo; ya mi sa roni ni ũkiga, na gaoni aborokporo ni úpayasihe; si du oni ambú mbugo payasi pai be aboro.”