Read zande Mika 7 Bible Online

Mika 7 - zande bible

Mika 7

¹Na gberẽ he fere! Bambiko mi sa tire wa rago dungura yo zuzu ngua nga ga faarago, wa ho regbo dungura zuzu bakakue nida ni: kpuraha ho ka i ri he te, na bambata zuzu vurumo nga gu ka mbisimore akpi nyemu he a te.

²Boro sinombori nyasi kpotosende no, ka ruru boro adu nga ho dagba aboro ya; i dunduko nasunguda uka kure, i ni ba sa sa ki nigbata awirinayo na pio.

³Beyo du ti gu he du ni gbigbita ha, ka amanga ha sirisiri; bazogo na basaringbanga nasana he tipa marã mobirimo, gu bakere boro ki gumba pa gu gbigbita nyemuhe nga ga mbisimoni; were i zi beyo sa.

⁴Gu ni ngba susi dagba yo du wa nguruza, gu ni du ni ruru ni susi dagba yo du wa ndugu kiwe. Rago gayo ababandarago, nga ga gayo mbusa, si da; awere rago gayo baka bangirise nada.

⁵Ka mo kída nga kuti kuaro ya, ka mo dú nga zukazuka rogo ga badiangbaro pai ya; mo bánda kpotongbaro be gu ri pi ti ngbaduro;

⁶bambiko wiri boro napayasi pa bani, degude ki zingi kuti nari, dia wiri de ki zingi kuti nakumbari; avura boro angia kina gani aborokporo.

⁷Ono tipa re, mi angéra koyo du Yekova ni, mi asunguda Mbori nga gi bata; gi Mbori agía pa re.

⁸Ako vurare, ka mo ngí nga ku ri re ya, ho ti mi ni, mi agúari aguari; ho sungu mi ni rogo bitimo, Yekova adú ni imarago fere.

⁹Mi akpída gu imisiri ngbaduse nga ga Yekova bambiko mi ingi pai kuti ko, daho ko ka zungadi pai ni tipa gi pai ki sari ngbanga fere. Ko akúsa re ku imarago yo; mi abí gako bata.

¹⁰Si du vurare abí he, zee azía gu ri naaya fere, “Wari du Yekova ni nga ga Mbori?” Bangire abí ri abi; i nikasimba ri awere wa fuka ngba agene bakporo.

¹¹Rago du tipa dua gamo angapa! Ni gu rago re i agbísa bangbandarago tuturũ.

¹²Ni gu rago re i ayé koyo du oni ni, tona Asura yo ki da ku Ezipeta yo, na Ezipeta yo ki da ku Di yo, tona ti gu baime sa gu baime na ti gu bagangara sa gu bagangara.

¹³Ono kpotosende adú ni vurubate bambiko agu yo araka rogo ho, mbiko gu zuzuhe nga ga gayo mangaapai.

¹⁴Mo bánda gamo aboro na ga ngau babanda anya, gu rimbasa aboro nga gamo yo, naraka ni sa yo rogo birengua rogo ringara aati; i rígi tiyo Basana yo na Girada yo wa u agu arago naadu bakuru yo,

¹⁵Wa ti agu arago ho oni aye ni ringara Ezipeta yo a wa mi nikayugo iiriwo apai fu yo.

¹⁶Arikaaboro abí he ki du na zee mbiko gayo ngarã dunduko; i amáa beyo ti kina ngbayo; tuyo adú ni kisikisi he;

¹⁷i asíra nvutu wa wo, wa agu agbiro nagbe tira nga ga kpotosende ra; i ayé na kio rogo gayo nyanyaki abaagbata yo, i ki gunde mbiko ro.

¹⁸Da du ni Mbori wa mo, navu aboro ti irairapai ki mbu pa samungu mbiko pa yangara gako aboro? Ko azada nga gako zinga nye anye kindi te bambiko rago angba ti ko ho ko aina pai ni.

¹⁹Ko adú adu na nunga rani ti ko berewe, ko asímba gaani irairaapai ku tii nduko yo. Mo abá gaani ingaapai dunduko ku dudungura baime yo.

²⁰Mo ayúgo rengo fu Yakoba na inapai fu Abarayama, wa mo azunga he fu abarani tona ti agu arago naadu bakuru yo.