Read zande Naum 3 Bible Online

Naum 3 - zande bible

Naum 3

¹Na gberẽ he fu bakporo kure, nahi na pa zire na pa zuu― ũmozi adiga nga yo te!

²Woro giri dupo du, na woro ndu ngbagida, woro agu afarasi nagitikpa na woro agu angbagida naguka!

³Abanduri afarasi zuba, abasape nakĩ na taataa baso, rimbasa kpikpi aboro, guguda akangba ni bahe, ka bageda akangba adú nga ti ni ya― i nakotoka ti akangba!

⁴Bambiko gu ngenge bari nga ga gu debari, du na wene ngbaya ri nga nairasoroka, nabaga arikaaboro mbiko gari pa bari, na arika ngbatunga aboro mbiko gari soroka.

⁵Mo ngére, mi gbarasi rimoro, wo poi Yekova nga ga arimbasa ko, mi abá ga roko kina ku riro yo, mi ayúgo kundiri ro fu arikaaboro na ga pa zee fu angbi.

⁶Mi abá gbegberẽ kere ahe ku ri ro ki payasi paro, ki sa ro wa yuguyugu he gbayaga.

⁷Si adú wa gere ya agu yo dunduko nikabi ro i aóra be ro ki ya, Nineve du ni kungba rago; da nikakpara ha? wari ka mi gbata abangarãsi he ni?

⁸Mo ngba susi No-amona nadu ti ngba Nire? aime ki du pati he kirikiri, gaha bangbadarago ki ngia baime, gaha ngapa ki ngia baime a.

⁹Etiopia adu ni gaha baome, Ezipeta a, digidaha adu nga ti ni te; Puta na aRibue adu ni gaha amounda.

¹⁰Ono i adi he ku sa yo, si andu ni zizi he; i abafu gaha rukutu agude, i ki kuadi rukutu ba ri agene bakporo dunduko; i aba ake tipa gaha irisiirisi akumba, i avodi gaha abaakumba ni azogbo.

¹¹Mo akpí imekakue a, i ki oko ro; mo agbáta nyanyaki bagbuko be vuraro.

¹²Gamo nyanyaki aba nadu wa avurumo dunduko na zamba bambata zuzu he ti ni ka i wo ti ni si atí kina ku ngba bari he yo.

¹³Mo ngére gamo arikaavura dagba roni du wa kina ade. Angbadimo gamo ringara du ni zaza ha gbagaza fu avuraro; we ariti gamo angbongbo angbadimo.

¹⁴Mo tú ime mbiko i ru nguru, ki nyakasi gamo nyanyaki aba; mo ndú ku ba pere yo, ki si he tipa dika he na ni, ki nyakasi bazobiriki!

¹⁵Yo we ka rita ro ni, basape adéwa ro ku sa yo. Si aríta ro wa abakirigba narita he. Oni ngéesi tironi wa abakirigba, oni ngéesi tironi a wa ayere!

¹⁶Mo angeesi gamo ababagiahe ki susi akerekuru ngbangbaturũ yo. Abakirigba nagbarasa ahe ki nigu ka ga.

¹⁷Gamo awiri abakindo i du wa ayere, gamo abakeapai du wa wangu anzede nasunga ri andugu rago zere― ono ho uru nakura ni, ami nigu ki ga; ka boro aina nga barara wari du ami ni ya.

¹⁸Ako bakindo aAsurio, gamo ababanda akandoro nara, gamo irisiirisi aboro naongoda. Gamo aboro du ni gbandakagbandaka yo ku ri abaagangara yo ka boro adu nga ho ka dungura yo ya.

¹⁹I arengba nga ka zeresa ga imisiri pai te, ga oro du ni kere he. Agu yo dunduko nagia pande gamo apai i ta be yo ku ri ro. Bambiko ga gbigbitapai mo ambu nga ha te da si ada nga ti ni ya?