Read zande Abakuka 1 Bible Online

Abakuka 1 - zande bible

Abakuka 1

¹Gu pa rungo Mbori ayugu he, Abakuka abi he nangia nebi.

²Ako Yekova, mi ka akpara ni gbanga ha waĩ tipa undahe, ka mo agia nga ha ya? Watadu kpara foro mbiko pa zuu; ka mo abatasa nga re ya?

³Tipagine mangi mo re ti ni mi bi irairapai ki ningere ku ri fudifudipai? Gbarasahe du bara bangire na zuu; kpata nakura na kangu.

⁴Si du rugute zere ka rurupai andu nga ku mbata yo wa sa ya. Bambiko gbegberẽ aboro ke pati ruru yo kirikiri, si du pa sarangbanga andu ti ni ni iraira ha.

⁵Oni ngére dagba arikaaboro, ka bi pai; ki baki bangironi si ki iriwosi roni. Bambiko mi namanga pai rogo gaoni arago nga gu ka oni aida nga ha ya ka i vura gumba ha vurũ.

⁶Bambiko oni ngére, mi nazingisa aKasado, gu kere rikaaboro du ni ipiipi yo, nadanga rogo bakia kpotosende, ka zia abaraka angia nga gayo ya.

⁷Iiriwohe nga yo nga ũkiga; gayo sarangbanga nakura kina beyo na pa du yo ni bahe.

⁸Gayo afarasi ipi ki susi amama, ni kere ra ki susi awaru nyemu; gayo abanduri afarasi ki ndu ku mbata yo ni ruka. Ii, gayo abanduri afarasi naye tuturũ; i nagu wa dingimo ni ipo ka rita he.

⁹I dunduko naye tipa manga pai ni zuu; kpakpuyo ni Kere he wa gu gugugu yuge naye uroyo. I nadungura zizi aboro wa ngume.

¹⁰I napayasi abakindo, i ki niumo awiri abakindo. I namoma nyanyaki aba dunduko, bambiko i naba guguda sende kuti ni ki zi abaagbata.

¹¹I ki susi he wa yuge ki nindu, nga agu aboro du na pai ku ri yo, du gayo ome nga gayo mbori!

¹²Ako Yekova gi Mbori, nga gimi Kparakpara Ziazia ko, mo adu nga kina ho mbata rago nikaenga te? Ani akpí nga te. Ako Yekova, mo namoi yo sa sarangbanga; Ako Mbia, mo nambakadi yo sa ruga yo.

¹³Mo du bangiro ni gigiri he ka si bi nga gbigbitapai ya arengba nga ka ngera ku ri fudifudipai a ya, tipagine mo nangera ti ni koyo du airabiriki ni, ki ongo aonga ho gbigbita boro narita gu boro nidu ni ruru ni?

¹⁴Bambiko mo namanga aboro wa atĩo baime, wa agu agbiro nagbe tira adu nga na bazogo ra ti ra ya.

¹⁵Ko nagbe ra dunduko na kombe, ko nazia ra na gako pio, ko nadungura ra ku rogo gako kumbamba; si du ko nangi ti ni ki du pusiapusia.

¹⁶Si du ko ki tumo fu gako pio ki zo wene fuõngua fu gako kumbamba; bambiko ko araka na kumuko mbiko ho, gako riahe ki du ni bawenehe.

¹⁷Ko ka ka kuti uka atĩo ti gako pio kindi, ki niimi arikaaboro zanga inapai nye anye kindi?