Read zande Abakuka 2 Bible Online

Abakuka 2 - zande bible

Abakuka 2

¹Si du mi arú ka kparia pai, ki ru ti ngbaho kirikiri gbata, ka ngera ku mbata yo ka bi gu pai ko ka gumba ha fere, na gu pai mi ka karaga tipa gu pai ko naruga re ku ti ni.

²Yekova ki karaga pai fere ki ya: “Mo ké pa gu yuguyugupai; mo ké he nzunzu ti kpasakpasa he, si du gu ni nikaageda ha aora aora.

³Bambiko yuguyugupai nasunguda ragoho kindi; si naipisa tihe sa digidaha ― si aré nga zire te. Ka si du wa si ayé yee, mo súngudi he; si ayé aye ni rengo, si aíma nga te.

⁴Mo ngére, gu ni adu nga toroni ni ruru he ya ni atí bungudu, ono ruru boro aráka mbiko gani idapase.

⁵Ku ri gere, imekakue nga ũnangahe; iraenda anyé nga te. Gani kpinyemuhe ni bakikii he wa Baatoro kpikpi aboro; si wa kina kpio a, ka he adú nga be ni rengbe ya. Ni nadungura arikaaboro dunduko tipa kina ni, ki dungura aboro dunduko wa kina gani yo.”

⁶Agi aboro re azúba nga na fugo sengahe kuti ni te? rogo pa sira ni na moma ni, niya, “Na gberẽ he fu gu ni nadungura agu ahe adu nga ni gani ya― tipa gbanga rago waĩ?― ki vodi tini na aũido!”

⁷Gaoni aboro bape azinga nga ni ipo te? na agu yo zingi rame yo nikamanga roni oni kio te? Oni ki du wa ũ gbu ahe fu yo.

⁸Bambiko oni gbu dungu arikaa boro, gu yangara aDoro dunduko agbú roni, tipa kure aboro na gu zuu oni amangi sa kpotosende, fu abaakporo na agu yo dunduko naraka rogo ho.

⁹Na gberẽ he fu gu ni nadia gbegberẽ mokiisa tipa gani bambu, ka dua gani bambu ku ari yo gbe, ka du zezeredi yo be gbigbitapai!

¹⁰Mo asangi pa zee fu gamo aborokporo ni bafu dungu aboro ku sa yo; mo ingisi ungaro.

¹¹Bambiko mbia akpára ku ari ti vuro bambu yo, na gu wagiro ti ngua bambu akáraga pai.

¹²Na gberẽ he fu gu ni nadua kporo ni kure, ki moi mburu bakporo auru irairapai!

¹³Mo ngére a nga si ye be Yekova nga ga arimbasa ko ya aboro mangi sunge tipa kina we, arikaaboro ki nimbusi tiyo gbua te?

¹⁴Bambiko kpotosende ahí na ina pa gu taarimo nga ga Yekova, wa aime nahisa gango baime.

¹⁵Na gberẽ he fu gu ni namanga akurani i mbiri he ti ngba gu inga nga ga gani zinga, ki mangi yo i kpi he, ya ni ngere ku ri gayo zee!

¹⁶Mo ambí be wasiro ku ba taarimo. Mo mbiri he a, mo ni tiro, ki nindu ni kundiri ro! Gu inga du rogo kumbabe Yekova― si ayé koyo du mo ni, zee ki ye ku ri ga taarimo!

¹⁷Gu zuu i amangi fu Rebanona adáda ro; pa gbarasa anya agúndesi ro, tipa gu kure nga ga aboro na gu zuu i amangi kpotosende no, fu abaakporo na agu yo naraka rogo ho dunduko.

¹⁸Gini u du ti sese kpiahe ho bamangi he nise he ni, ni zaragasizaragasi kpiahe, du ni bayugu pa azire? Bambiko boro sunge nakida kuti kina gani mangimangi ahe ho ni nimangi akpiahe ni afura nga ya!

¹⁹Na gberẽ he fu gu ni naya fu sese he ni ngua, Mo zíngi; na fu gu mbia afura nga ya, Mo gúari! Gere rengbe ka fu yuguyugupai? Mo ngére, i dadi he na dahabu na feda, ka ome onga adu nga rogo ho wa sa ya.

²⁰Ono Yekova du rogo gako kparakpara ziazia yekaru; kpotosende dunduko óngo kii bara bangiriko.