Read zande Abakuka 3 Bible Online

Abakuka 3 - zande bible

Abakuka 3

¹Ga Abakuka kpetambuahe nangia nebi, ku ti woro Siginoto.

²Ako Yekova, mi gi pa tingida pa ro, na pa ga mangaapai, Ako Yekova, mi ki gunde. Mo niúngasi ga mangapai berewe na agarã; mo nimangi he i ini pa ha na agarã; rago zinga mo tíngidi pa inapai.

³Mbori aye Temana yo, na gu Kparakpara Ziazia Ko Bagangara Parana yo. Gako taarimo adadi angbangbaturũ, kpotosende ahi be tambua ko.

⁴Pa kĩko adu wa imarago, imahe ki niikpira be ko yo; ko ki oko gako tandu koyo.

⁵Gberãngbi ki nindu ku mbata yo fu ko, mirãwe ki nikĩ pati nduko.

⁶Ko aru ki ringbisi pa kia kpotosende; ko ki ngere ki nizigizo arikaaboro; gu nyenye abaagangara ki gbandaka, gu nyenye ago ki rinda. Gako asino adu wa gu naadu bakuru yo.

⁷Mi ki bi irairapai rogo ga Kusana abamburoko yo; agu aroko dadahe nangia ga ringara Midiana ki niwo.

⁸Ako Yekova, ga rungudirungudi zinga adu kuti adi? Ga zinga adu kuti adi, watadu ga dingidingi ngbaduse kuti baime, ho mo aoro ni ri gamo afarasi, ri ga ngbagidavura diabese?

⁹Mo adarĩ ga mboto tipa no ahe na ni, ki gbe guanza. Mo asapu kpotosende na adi.

¹⁰Abaagangara abi ro, ki nisaki tihe; rikita aime ki nifu afu; dudungura aime ki kusi woro ho, si ki tumba tihe ku ari yo gbe.

¹¹Uru na diwi ki ru kindi kina ku rogo gu baha kuti nzere gamo aguanza wa ami asusi, kuti ikpira ga imaima baso.

¹²Mo adarĩ nduro ri kpotosende ni nzengerenzengere zinga, mo asimbi arikaaboro rogo zinga.

¹³Mo andu ku mbata yo tipa batasa gamo aboro, tipa batasa ga mbedimbedi aboro. Mo agbingbida ri barukuri kporo gbegberẽ aboro, ki sa mburu kporo ni kungba he ki da ti ngapaha.

¹⁴Mo akofo ri gani barukuri abasovura na kina gamo apara baso, wa ni aye wa gugugu yuge ka gbandaka re, ningi wa ni nikarita rungorungo boro ni gbuko.

¹⁵Mo asadiga baime na gamo afarasi, nangia sungburasungbura aime du na bakere ome.

¹⁶Mi agi he, kpotore ki nikio, kpotongbare ki nikio be woro ho; zirã ki rimi ku rogo amemere yo, ndure ki niwo awo tii re yo. Mi asúnguda rago fudifudipai zezeredi si ye ku ri agu aboro naye ka manga rani.

¹⁷Ka vurumo avura nga mbumbo ya, ka zuzu bakakue adu nga ti ni ya, zuzu aeraya ki kpa, ka aati azu nga riahe ya, rimbasa akandoro ki du ni bafu-bafu ra ku sa yo ti ndugu ra ka zogozogo anya adu nga rogo bambu ra yo a ya,

¹⁸ono mi tigimi, mi angí rogo Yekova yo, mi adú na ngbarago rogo Mbori yo nga gi bata.

¹⁹MBORI nga Gbia, ko nga gi ome; ko namanga andure wa andu nzungba, ko nagasa re mi ndu ri gimi tumbatumba aba. Fu bagasi abibia: na gu ũworo ahe du na agirihe.