Read zande Zefhania 2 Bible Online

Zefhania 2 - zande bible

Zefhania 2

¹Ako rikaaboro zanga zee, oni dúngura tironi wa sa ki tona gbuu,

²mbata gu pai i aringbisi he nikada rago ki susi wa gundugundu umuhe, mbata gu ngariangaria zinga nikaye nga ga Yekova ku ri roni, mbata gu uru nikada fu roni nga rago ga Yekova zinga.

³Oni gbáta Yekova, oni dunduko nga bayee aboro ringara, namanga gako sarangbanga; oni gbáta rurupai, oni gbáta umbasitise; si ngia i aóka roni rago ga Yekova zinga.

⁴Bambiko Gaza adú ni mbusimbusi he, Asekerona ki du tigaha ni gbarasigbarasi he; Aboro Asedodo adú ni dodo yo bebere uru, Ekerone ki du ni momo ho.

⁵Na gberẽ he fu araki ti ngba gango baime, oni nga rika aKereto! Ako Kanana, ringara aFereseto, ga Yekova pai dũ kuti roni; mi agbárasa roni daho araki yo ka adu nga ni ya.

⁶Na oni, aringara ti ngba gango baime, oni adú ni abanambu, ni abaraka tipa ababanda akandoro na andugu tipa arimbasa akandoro.

⁷Ngba gango baime asá tihe ni gu he nga ga yangara aboro aYudo, yo i ka riga gayo anya ni, rogo ga aAsekerono abambu i ka pika ni sande nyemu. Bambiko Yekova gayo Mbori atingida pa yo ki karaga yo ti du ni zizi yo.

⁸“Mi gi gu soapai nga ga Moaba na gu gbegberẽ afugo nga ga awiri aAmono, wa i nagberã ngbayo yo fu gimi aboro ki kiisi pa tiyo kuti gayo ringara.

⁹Si du, wa du mi ni ungare,” wo poi Yekova nga ga arimbasa ko, nga ga aYisaraere Mbori, “Moaba asá tihe wa Sodomo, awiri aAmono ki du wa Amora, ni ringara du na akiwe rogo ho na adue tikpo, ni kungba rago nye anye kindi. Gu yangara gimi aboro agbú yo, na agu yo ka bati dagba gi rikaaboro i adia ha ni gayo.”

¹⁰Gere nikadu m gayo pai mbiko gayo ruka, bambiko i gberẽ ngbayo yo ki abia tiyo kuti ga Yekova aboro nga ga arimbasa ko.

¹¹Yekova adú ni iiriwo ko kuti yo; ii, ko amánga ambori kpotosende dunduko si du na gomoro, arikaaboro rogo aringara ti ngba gango baime yo atúmusa fu ko, rogo gayo rago ni ba sa sa.

¹²Oni a wo, Ako aEtiopio, oni adú ni imiimi roni be gi basape.

¹³Ko ki taĩ beko ku nodiyo, ki gbarasi ringara a Asuro; ko amánga Nineve ni gbarasigbarasi he, ni kungba rago wa ngbi ngume.

¹⁴Arimbasa akandoro apíka sande rogo ho, na anya nvuo dunduko a; bazire na anzingini aráka rogo gaha abakumba rago; zire abi bia ti bangiri bambu, ugure adú ti barima; bambiko i adia gu paha ku sa yo du ni ngua kedara.

¹⁵Gere nga gu bakporo ngbarago naraka zezeredi, naya fu tihe, “Mi du, kura ni ho berewe te.” Na gberẽ pa gaha pai awere, nga yaro baongoda fu anya nvuo! Agu aboro dunduko nasusa pati he napaa ki nimina beyo ki nizigizo ho.