Read zande Agai 1 Bible Online

Agai 1 - zande bible

Agai 1

¹Ti gu ue garã zogarago nangia ga bakindo Darayawesa, ti sita diwi, ti rameru sa, sangba Yekova ki ye koyo du Agai ni nga nebi, fu Zerubabera wiri Saratiere, baira abazogo Yuda, na fu Yosua wiri Yosadaka, gbiamotumo, ki ya,

²“Ya Yekova nga ga arimbasa ko wẽ: Agi aboro re niya rago ata da nga tipa dua ga Yekova bambu berewe te.”

³Si du sangba Yekova ki ye ngba Agai nga nebi,

⁴“Si nga gu rago oni ni tironi ka raka rogo gaoni abambu du ni kendegekendege he ni ngua, ho du gi bambu ni re ni gbarasigbarasi he?

⁵Were si du ya Yekova nga ga arimbasa ko we: Oni bérẽ nga pa gaoni apai.

⁶Oni arú he bakere, ki ke he toni gbua; oni ri he, ono oni adu nga na riahe be roni rengbe wa sa te; oni mbiri he, ono oni ambi nga be he te; oni ukadi tironi, ono kpotoroni afaa nga wa sa te; gu ni nabi marã gani sunge ni nabi he ka iga ha kina rogo sipisipi mangu yo.

⁷“Ya Yekova nga ga rimbasa ko wẽ: Oni bérẽ nga pa gaoni apai.

⁸Oni bíti ku ri abaagangara yo ka ye na ngua ka dua bambu na ni, ya rago ngba ti re mbiko ho, mi ki du na gi taarimo, wo poi Yekova.

⁹Oni angere tipa ahe gbe, ono, oni ngére, si ye ni toni he gbua; ho oni ayega na ni ni ku kporo no, mi avudi he dũ ku sa yo. Tipagine? wo poi Yekova nga ga arimbasa ko. Bambiko wa du gi bambu ni gbarasigbarasi he, ono oni nake na pa manga kina sunge gaoni abambu ni ba sa sa.

¹⁰Si du angbangbaturũ du ba ri roni ka na ndomo, sende ki ka na gaha zuzu ahe.

¹¹Mi ki fu ugure ku ri ringara na ku ri abaagangara, ku ri zende ahe, ku ri vovo imekakue na ku ri nzeme, ku ri agu ahe sende nakusa ha, ku ri aboro na zogozogo anya, na ku ri gayo asunge dunduko.”

¹²Zerubabera wiri Saratiere, na Yosua wiri Yosadaka nangia gbiamotumo, ki gi sangba Yekova gayo Mbori, na gu yangara aboro dunduko a, ki gi pa Agai nangia nebi a, wa Yekova nga gayo Mbori akedi ko; aboro ki nigunde bara bangiri Yekova.

¹³Agai, gu bamokedi nga ga Yekova ko, ki gumba pai fu aboro ni sangba Yekova, “Mi du na oni, wo poi Yekova.”

¹⁴Yekova ki wo ti toro Zerubabera wiri Saratiere, baira abazogo Yuda, na ti toro Yosua wiri Yosadaka nangia gbiamotumo, na ti toro gu yangara aboro dunduko; i ki ye ka manga sunge ga Yekova bambu nga ga arimbasa ko, gayo Mbori,

¹⁵ti rame diwi 24 nga ga sita diwi.