Read zande Agai 2 Bible Online

Agai 2 - zande bible

Agai 2

¹Ti gu ue garã zogarago nangia ga bakindo Darayawesa, ti saba diwi, ti rameru 21, sangba Yekova ki ye ngba Agai nangia nebi,

²“Mo gúmba pai awere fu Zerubabera wiri Saratiere, baira abazogo Yuda, na fu Yosua wiri Yosadaka nangia gbiamotumo, na fu gu yangara aboro dunduko, ki ya,

³Da i ambu ni dagba roni naabi gi bambu re ti rago gaha bambata taarimo? Oni nabi he war awere? A nga si bangironi wa kungba he te?

⁴Ako Zerubabera, ono mo dú nyanyaki awere, wo poi Yekova; Ako Yosua wiri Yosadaka nga gbiamotumo mo dú nyanyaki; oni aboro ringara dunduko, oni dú nyanyaki, wo poi Yekova; oni mángi sunge, bambiko mi du na oni, wo poi Yekova nga ga arimbasa ko,

⁵ku sangba gi kidohe nga gu mi akido fu roni ho oni aye ni ringara Ezipeta yo. Gi Toro nanye dagba roni, ka oni gúnde nga ya.

⁶Bambiko ya Yekova nga ga arimbasa ko wẽ: Mi azígizo angbangbaturũ na kpotosende na baime, na ugu sende bara sa berewe ti rago ngbutuko;

⁷mi ki zigizo arikaaboro dunduko, si du agu ahe ngba bangiri arikaaboro dunduko aye kono, mi ki hisi gi bambu re na baweneahe, wo poi Yekova nga ga arimbasa ko.

⁸Feda si nga gimi he, dahabu ki ngia gimi a, wo poi Yekova nga ga arimbasa ko

⁹Gu taarimo nikadu fu gi bambu re giza, si adú ni babakere he ti gu naadu mbata, wo poi Yekova nga ga arimbasa ko; mi ki fu zereda ku rogo gi ba re, wo poi Yekova nga ga arimbasa ko!”

¹⁰Ti rame diwi 24 nga ga ribua diwi, rogo ue garã zogarago nangia ga Darayawesa, sangba Yekova ki ye ngba Agai nangia nebi,

¹¹“Ya Yekova nga ga rimbasa ko wẽ: Mo sána aboromotumo i wisigi gi sanahe re nga,

¹²‘Ka boro tindi kparakpara pasio rogo gani gbanga baukadi, gani baukadi ki kpe tihe ti kpokuta, watadu ti kpepasio, watadu ti imekakue, watadu ti nzeme, watadu kuti gini ngbatunga riahe, gu he adú ni kparakpara he ziazia mbiko ho?’ ” Aboromotumo ki karaga ha ki ya, “Oó”

¹³Agai ki ya, “Ka gu boro du ni birikosibirikosi ni mbiko ni zadi kangba, ni ki zadi gu dagba agi ahe re, si asá tihe ni birikosibirikosi he?” Aboromotumo ki karaga ha ki ya, “Si asá tihe ni birikosibirikosi he.”

¹⁴Agai ki ya, “Kina wo du he na agi aboro re, na gi rikaaboro re ku bara bangire, wo poi Yekova; wo du he a na gu mangaapai d unduko nga ga beyo; gu he i aye na ni yo si ni birikobiriko he a.

¹⁵Mi zungadi roni awere, oni bérẽ nga pa gu pai nikaye tona ti gi uru re ki da ku mbata yo. Mbata i amoi mbia ri kura mbia rogo ga Yekova yekaru yo,

¹⁶gaoni apai adu waĩ? Ho boro ada ni ti guguda ringbisi 20, si adu yo ono kina bawe; ho boro nida ni bapira imekakue yo ka dia 50 ringbisi, si adu yo ono wa kina 20.

¹⁷Mi amangi roni na morogumba na zuzu gaoni sunge si ki ngbiimi ki kuko; ono oni akaraga nga tironi kono du mi ni te, wo poi Yekova.

¹⁸Oni bérẽ nga pa ha tona ti gi uru re ki da ku mbata yo, tona ti 24 uru nga ga ribua diwi. Tona ti gu uru nga gu i amoi mburu ga Yekova yekaru ti ni, oni bérẽ nga pa ha:

¹⁹Tunga ahe gbamu yo kindi? Bakakue nazu nga zuzu he wa sa te? na vurumo, na ngua wa ndavu, na eraya a te? Mi afú maku fu roni tona ti gi uru re ki da ku mbata yo.”

²⁰Sangba Yekova ki ye ni ue he koyo du Agai ni ti rame diwi 24 nga ga gu diwi re, niya,

²¹“Mo gúmba pai fu Zerubabera, baira abazogo Yuda, niya, Mi wa mi nikazigizo angbangbaturũ na kpotosende,

²²ka sisika ambataabakindo nga ga angbi; mi wa mi nikagbarasa ome angbi nga ga arikaaboro, ki sisika angbagidavura na abandurihe; afarasi na abandurira atíwa ku sande, gu ni be ga kurani basape.

²³Ti gu uru re, wo poi Yekova nga ga arimbasa ko, mi adía ro, Ako Zerubabera nga gi moyambu, nga wiri Saratiere, wo poi Yekova, mi ki sa ro wa tongo ido; bambiko mi sia ro, wo poi Yekova nga ga arimbasa ko.”