Read zande Zekaraya 10 Bible Online

Zekaraya 10 - zande bible

Zekaraya 10

¹Oni sána Yekova tipa mai ti regbo mamu garã, kina Yekova ninamanga aikpira gumba, nafu moromoro mai fu aboro, na kpepasio fu aboro ni ba sa sa aati yo.

²Bambiko aterafima nagumba apai ni sawia, airasoroka ki nibi apai ni zire; abarari musumo ki nigumba sangba amusumo ni zire, ki ningarãsi aboro ni kungba apai a. Si du aboro ki nita ata ngba gayo agene wa kina akandoro; i ni rungosirungosi yo bambiko i zanga babanda yo.

³“Gi zinga nakĩkuti ababanda akandoro, mi ambúsa kina abarumbatayo; bambiko Yekova nga ga arimbasa ko natingida pa gako rimbasa aboro nga ngbatunga aYudo, ko asá yo wa gako irisiirisi farasi rago vura.

⁴Mbia tukpu bambu akúra dagba yo yo, ngua bamburoko akúra dagba yo yo, mbotovura akúra dagba yo yo abazogo ni ba sa sa akúra dagba yo yo.

⁵I amongo du wa nyanyaki aboro rago vura, nidekpera avurayo ku rogo fuka agene bakporo yo; i asó vura bambiko Yekova du na yo, i abá zee ku ri abanduri afarasi.

⁶“Mi anyákasa ngbatunga aYudo, mi ki batasi ngbatunga Yosefa. Mi ayega na yo berewe bambiko mi naina pai fu yo, i ki du wa mi agindiga nga yo agindiga te; bambiko mi nga Yekova nga gayo Mbori mi akáraga pai fu yo.

⁷Si du Efuraima ka du ti ni wa nyanyaki kumba, kpotoyo yo ki du na ngbarago wa be imekakue. Awiriyo abi he rago ki ngba ti yo, kpotoyo yo ki du pusiapusia mbiko Yekova.

⁸“Mi ayámba yo ki dungura yo, bambiko mi tumo yo, i angé berewe wa i adu mbata.

⁹Wa mi avura gbandaka yo ku dagba arikaaboro yo, ono i atingida pa re rogo agu aringara turu aturã, i ki niraki na awiriyo ki karaga tiyo kono.

¹⁰Mi ayéga na yo ringara Ezipeta yo ku kporo no, ki dungura yo Asura yo; mi ki ye na yo ku ringara Girada yo na ku Rebanona yo a, daho ba ka adu nga ni tipa yo yo ya.

¹¹I asúsa rogo dungu fudifudiapai, angiri baime ki du ni fõfõ ho, na gu dudungura angirimo nga ga Di aúguda du. Mi azógosa gu ruka nga ga aAsuro ku sande, gu ngbondo bakindo nga ga Ezipeta agúari.

¹²Mi asá yo ni nyanyaki aboro rogo Yekova yo, i ki nita na rimoko,” wo poi Yekova.