Read zande Zekaraya 12 Bible Online

Zekaraya 12 - zande bible

Zekaraya 12

¹Gu pa rungo nga ga sangba Yekova tipa aYisaraere: Ya Yekova wẽ naazaraga angbangbaturũ ki moi mburu kpotosende ki fu toro boro ku kpotoni yo:

²“Mo ngére, mi nikasa Yerusarema si du ni inga kio fu aboro dunduko du pati he kirikiri; si adú a wo kuti Yuda rago runguru kuti Yerusarema.

³Ti gu rago re mi asá Yerusarema wa rõrõi mbia fu aboro dunduko; agu yo dunduko nikatumba ha i aimisa tiyo gbe. Arikaaboro dunduko nga ga kpotosende yo amóngo ye kuti he a.

⁴Ti gu rago re, wo poi Yekova, mi afu kiga fu afarasi ni ba sa sa, na nzanga fu abandurira. Ono mi azá bangire ka berã pa angbatunga aYudo, ho mi ka fu vurari ni fu afarasi dunduko nga ga aboro ra.

⁵Agbia aYudo aya ni tiyo, ‘Araki Yerusarema yo du na ngarã bambiko Yek ova nga ga arimbasa ko, nga gayo Mbori.’

⁶“Ti gu rago re mi asá agbia aYudo wa ngariangaria akoro dagba nyake yo, wa mirãwe nzinga dagba vodivodi zende ahe; i ki riti aboro dunduko ku kumbabe na ku garebe yo pati Yerusarema kirikiri, ho Yerusarema ka du ni ku baha yo kindi na araki rogo no.

⁷“Yekova afú diabese fu agu abamburoko nga ga aYudo mbata, ya ka i abia nga pa gu taarimo nga ga ngbatunga Dawidi gu taarimo nga ga araki Yerusarema yo ki susi ku ri gu nga ga aYudo ya.

⁸Ti gu rago re Yekova abánda araki Yerusarema yo, si du gu ni du ni rurungbura ni ki susi dagba yo yo ti gu rago re, ni adú wa Dawidi, ngbatunga Dawidi ki du wa Mbori, wa gu maraika nga ga Yekova ko, du ku mbata yo fu yo.

⁹Ti gu rago re mi agbáta pa gbarasa arikaaboro dunduko nga agu yo nikaye sa Yerusarema.

¹⁰“Mi aúka toro undahe ku ri ngbatunga Dawidi na ku ri araki Yerusarema yo na kpesarawati, si du, ho i ka ngera ni koyo du gu ko ni i arú ko, i atá ngbaduyo tipa ko, wa boro nata ngbaduni tipa bangisa wirini, ki nikpari ni kere he tipa ko, wa boro nakpara tipa bambata wirini.

¹¹Ti gu rago re gu kpenunga nikadu Yerusarema yo si adú ni bakere he wa gu kpenunga nadu tipa Adadarimona rogo kpasakpasa rago Megido yo.

¹²Aboro ringara atá ngbaduyo, ngbatunga aboro ni ba sa sa ni tiyo; ngbatunga ga Dawidi aborokporo ni tiyo, na adiayo ni tiyo, ngbatunga ga Natana aborokporo ni tiyo, na adiayo ni tiyo;

¹³ngbatunga ga Revi aborokporo ni tiyo, na adiayo ni tiyo; ngbatunga ga Semaya aborokporo ni tiyo, na adiayo ni tiyo;

¹⁴na agu angbatunga dunduko nga ga agu yo naanye, agu yo ni tiyo, na adiayo a ni tiyo.