Read zande Zekaraya 5 Bible Online

Zekaraya 5 - zande bible

Zekaraya 5

¹Mi atuka bangire berewe ki bi, mo ngére kaĩkaĩ waraga ki nigu!

²Ko ki ya fere, “Gini he mo abi?” Mi ki karaga ha, “Mi bi kaĩkaĩ waraga si nigu; bagizaha wa bagiza mbiribe 20, na bakia patihe wa bagiza mbiribe bawe.”

³Ko ki ya fere, “Gere nga gu motiwa nga gu nandu ku ri aringara dunduko; bambiko agu aboro dunduko nadĩ he i aroga yo ku sa yo tona awere ku sangba ha yo, agu aboro nazunga he ni zire i aróga yo ku sa yo tona awere ku sangba ha yo a.

⁴Miakédahakumbatayo, wo poi Yekova nga ga arimbasa ko, si ki rimi ku dimo ku iradĩ yo, na ku dimo ku gu ni yo nazunga he ni zire ti rimore. Si ki nye dimo kpuni yo daho si ka nyasa ha ni dunduko, angua bambu na ambia a.”

⁵Si du gu maraika nafura na mi ki gbisi ku mbata no ki ya fere, “Mo túka nga bangiro, ka bi gine nga gu nakura re.”

⁶Mi ki ya, “Gini he nga ha?” Ko ki ya, “Si nga úringbisahe nakura rengbe na aritere 37.” Ko ki ya, “Gere nga kpia gu irairapai du rogo ringara dunduko.”

⁷Mo ngére, I ki ukua pipi ngba ha du ni kpano, mo ngére, de ki sungu vuru uringbisahe yo!

⁸Ko ki ya, “Gere nga Gbegberẽpai.” Ko ki ba ri ku vuru uringbisahe yo berewe, ki gbingbida pipi ngba ha du ni kpano ku ngbaha.

⁹Mi ki tuka bangire ki bi, mo ngére, ade ue ki niye ku mbata no! Bayuge adu ti pupoyo; i adu na apupo wa pupo gonyo, i ki tumba gu uringbisahe ku dagba kpotosende na ngbangbaturũ.

¹⁰Mi ki ya fu gu maraika nafura na mi, “Wari i andu na uringbisahe ku ho ni?”

¹¹Ko ki ya fere, “Ku ringara Sinara yo, ka dua bambu tipa ha; ho i ka mbakada ha ni, i amáa uringbisahe sande ni mburuhe.”