Read zande Zekaraya 6 Bible Online

Zekaraya 6 - zande bible

Zekaraya 6

¹Mi ki tuka bangire berewe ki bi, mo ngére, angbagidavura biama ki kuru dagba abaagangara yo ue; agu abaagangara re adu wa abaagangara sirigi.

²Gu bambata ngbagidavura adu na afarasi ti ni ni zamba ra, gu ue he ki du na afarasi ti ni ni bi ra,

³gu biata ha ki du na afarasi ti ni ni pusi ra, gu biama ngbagidavura ki du na afarasi ti ni ni kenekene ra.

⁴Si du mi ki ya fu gu maraika nafura na mi, “Gi gbia, gini ahe nga agere?”

⁵Maraika ki karaga ha fere ki ya, “Agi yo re nakura ka ndu sa gu biama abaayuge nga ga ngbangbaturũ, fuo yugo yo tiyo ku bangiri Yekova nga ga kpotosende ko dunduko.

⁶Gu ngbagidavura nadu na afarasi ti ni ni bi ra andu ku ringara nodiyo, agu ra nadu ni pusi ra andu ku ringara ku dioyo, gu kenekene ra ki nindu ku ringara sudiyo.”

⁷Ho afarasi akuru ni, ami aipisi tira ka ndu ka kparia pa kpotosende kirikiri. Ko ki ya, “Oni ndú, ka kparia pa kpotosende kirikiri.” Si du ami ki kparia pa kpotosende kirikiri.

⁸Ko ki kpari fere, ki ya “Mo ngére, agu ra nandu ku ringara nodiyo ami zeresi Torore rogo ringara ku nodiyo.”

⁹Sangba Yekova ki ye kono du mi ni niya;

¹⁰“Mo rogo agu yo du ni zizi yo nga Eredai, na Tobiya, na Yedaya, nayega Babera yo; ki ndu ni kina gu uru re ku Yosiya yo, nga wiri Sefanya.

¹¹Mo rogo feda be yo na dahabu, ki mbakadi kpakpari bakindo rogo ho, ki moi he ku ri Yosua yo, nga wiri Yosadaka, nga gbiamotumo;

¹²mo ki ya fu ko, ‘Ya Yekova nga ga arimbasa ko wẽ, “Mo ngére, gu kumba du rimoko nga Bengua: bambiko ko asóna rogo gako ba, ko adúa ga Yekova yekaru.

¹³Ko nga gu ko nikadua ga Yekova yekaru, ki du na gu irisa nga ga abakindo, ki sungu ri gako mbatabakindo ka zoga rago. Boromotumo ki du pati gako mbatabakindo, zezeredi rugatinapai ki du dagba yo yo wa du yo ue.” ’

¹⁴Kpakpari bakindo ki du vuru ga Yekova yekaru yo ni ũtingida fu Eredai, na Tobiya, na Yedaya, na Yosiya wiri Sefanya.

¹⁵“Agu yo du gii ngbi yo i aye ka unda pa dua ga Yekova yekaru. Oni ki ini he ya Yekova nga ga arimbasa ko nakedi re kono du oni ni. Si adú wo, ka oni gi sangba Yekova ni ngarã nga gaoni Mbori.”