Read zande Zekaraya 9 Bible Online

Zekaraya 9 - zande bible

Zekaraya 9

¹Gu pa rungo nga ga sangba Yekova si du kuti ringara Adaraka, si adá ku ri Damaseke a. Bambiko agu abaakporo nga ga Arama si nga ga Yekova, a wa du angbatunga aYisaraere dunduko a:

²Amata a, du bangbandaha yo, Tura na Sidona, ka si vura du na bakere tatamana vuru.

³Tura adua nyanyaki aba tipa tihe, ki ba guta feda wa nvutu, na dahabu wa agu aguguda zirĩ ahe du pangba gene bakporo.

⁴Ono mo ngére, Yekova aróga gaha aúkporo be he, ki bafu gaha ũkumuko ku baime tikpo yo, we ki riti bakporo tigaha.

⁵Asekerona abi he, ki gunde mbiko ho; Gaza a, si ki niimi aima gbe; Ekerone a, bambiko i mungosi gaha maabangirise. Bakindo akpi Gaza yo; Asekerona adú ni bate;

⁶kodikodi ngbatunga aboro aráka Asedodo yo; mi ki digisi gu ruka nga ga aFereseto.

⁷Mi adia kure amotumo ngbayo yo ku sa yo, na gayo kere gbegberẽ asino dagba rindiyo yo; gayo ringara anyé tipa gaani Mbori a; si adú wa gbia dagba Yuda, Ekerone ki du wa aYebuso.

⁸Mi tigimi adú pati gimi aborokporo wa babandarago, ka boro atá nga pati gi kporo ku bani na ku bani ya; barungosi aboro agbárasa nga yo berewe te, bambiko mi bi he ni bangire awere.

⁹Ako aboro Siona, oni dú pusiapusia gbe! Ako aboro Yerusarema, oni tá wawa! Oni ngére, gaoni bakindo naye koyo du oni ni; irarengo nga ko du na diabese, du na umbasitise nisungu auru badongi, nga kina paranga wiri nadongi.

¹⁰Mi adia ngbagidavura be Efuraima ku sa yo, na farasivura Yerusarema yo; ki di mbotovura ku sa yo, ko arúga pa zereda fu arikaaboro; gako zogarago atona ti gu baime tikpo sa gu baime tikpo, ki tona ti gu Di sa digida kpotosende.

¹¹Tipa ro a, bambiko gu kure nga ga gi zungahe na mo, mi akúsa gamo zizi yo zezeredi rogo gu due zanga ime.

¹²Ako zizi aboro du na maabangi rise, oni káraga tironi sa gaoni nyanyaki ba; areme taki mi pande he ya mi akaraga ahe fu roni wa bara ue.

¹³Bambiko mi nuga Yuda wa gi mboto; mi sa Efuraima ni gaha guanza. Ako Siona mi avúgumo awiro, ku ri awiro, Ako Era, mi asáka ro wa ga iranyaka basape.

¹⁴Yekova akúra ku ba ri yo, gako guanza ki kuru wa ikpira gumba; Gbia Mbori avúda mbanya, ki nidanga ku mbata yo rogo gugugu yuge naye sudiyo.

¹⁵Yekova nga ga arimbasa ko nikabanda yo, i ki nyasi avurayo ki simbi yo wa wiri mbia barioko ku sande; i ki nimbiri he ki nifura wa akpiimekakue, ki hi be he wa hi kurungbu be gu kure du ti atukpu bamotumo.

¹⁶Ti gu rago re Yekova gayo Mbori abátasa yo, bambiko i nga gako rimbasa aboro; bambiko wa agu ambia fongo du ti kpakpari bakindo wo i ka kĩ rogo gako ringara.

¹⁷Ii, na ngba pa gu rago re, si adú ni bawene he ki susi! Zende ahe amánga paranga akumba, kpotoyo aúa be he, vovo imekakue ki mangi paranga ade a wo.