Read zande Maraki 1 Bible Online

Maraki 1 - zande bible

Maraki 1

¹Gu pa rungo nga ga sangba Yekova fu aYisaraere ku ngba Maraki.

²“Mi nakpi nyemu roni,” wo poi Yekova. Ono ya oni, “Waĩ kpi mo nyemu rani?” “A nga unvuru fu Yakoba nga Esau te?” wo poi Yekova. “Mi ta kpi nyemu Yakoba

³ono Esau mi asoga ko; mi gbarasi gako ringara abaagangara ki mbu gako ngbi fu ahúa nga ga ngbakungba ra.”

⁴Ka Edome ya, “Ani ni rungorungo rani ono ani adúa gu gbarasigbarasi he adua berewe,” ya Yekova nga ga arimbasa ko, “I adúa ha adua, ono mi asípa ha asipa ku sande, daho i ka yamba ha ni ni gbigbita ringara, nga agu aboro du Yekova na zinga kuti yo nye anye kindi.”

⁵Boro bangironi abí gere, oni ki niya, “Yekova du ni kiisikiisi pako, gii bangbanda ringara Yisaraere yo!”

⁶“Gude nairisa bani, moyambu ki niirisi bairani. Ka si du tie nga mi nga baroni, wari du irisa re ni? Na ka mi ngia bairaroni, wari du gunde ti re ni? wo poi Yekova fu roni nga ga arimbasa ko, Ako aboromotumo, napayasi rimore. Oni niya, ‘Waĩ ani apayasi rimoro?’

⁷Ni fu birikobiriko riahe ri gi bamotumo. Oni ki ya, ‘Waĩ ani agbarasa ha?’ Ni berẽ he ya aboro rengbe na payasi ga Yekova mbisa.

⁸Ho oni nifu agu anya ni du na vurari ni motumo, a nga gure nga gbigbitapai te? Na ho oni nifu agu ra ni du ni gbarĩgbarĩ ra watadu ga kaza ra, a nga gure nga gbigbitapai te? Ka oni fu gure fu gaoni baira abazogo; rago angbá ti ko fu roni watadu ko ayúgo inapai fu roni? wo poi Yekova nga ga rimbasa ko.

⁹Awere oni zungadi Mbori tipa inapai, ya ko du na inapai fu rani. Tipa gu ngbatunga gamahe du be roni, ko ayúgo inapai fu gu ni dagba roni yo? wo poi Yekova nga ga arimbasa ko.

¹⁰Ako, ka boro du dagba roni yo sa nakpi nyemu ka kisa angbadimo, ya ka oni ginda nga we ri gi bamotumo gbua ya! Ngbarago ti re fu roni te, wo poi Yekova nga ga arimbasa ko, mi adia nga motumo nga ga riahe be roni te.

¹¹Bambiko ho uru nakura ni dati ti he rimore du ni bakere he dagba arikaaboro, na rogo arago ni ba sa sa i nazo wene fuõngua ti rimore, na gigiri motumo nga ga riahe; bambiko rimore du ni bakere he dagba arikaaboro, wo poi Yekova nga ga arimbasa ko.

¹²Ono oni nagbarasa ha ho oni niya ni ga Yekova mbisa gberẽ, na gu riahe du tipa ha si ni payasipayasi he.

¹³Oni niya, ‘Gini mbugo nga gure,’ oni ki niumo re ti ni, wo poi Yekova nga ga arimbasa ko. Oni naye na agu anya i aroga ra ni zuu watadu gbarĩgbarĩ anya watadu ga kaza ra, gere nga gu oni aye na ni wa gaoni motumo nga ga riahe! Mi adía gure be roni? wo poi Yekova.

¹⁴Boro motiwa nga gu irabiriki nadu na nya ni bara dagba gani rimbasa anya yo, ki zunga he, ono ni ki tumo fu Yekova na gu nya du na serõ ti ru; bambiko mi nga bakere Bakindo, wo poi Yekova nga ga arimbasa ko, i nagunde ti rimore dagba arikaaboro.