Read zande Maraki 2 Bible Online

Maraki 2 - zande bible

Maraki 2

¹“Ako aboromotumo, awere, gi rugute re du tipa roni.

²Ka oni adéga nga turoni sa ni ya, ka oni amáa nga ha ku kpotoroni yo sa fu taarimo fu rimore a ya, wo poi Yekova nga ga arimbasa ko, mi akéda motiwa ku ri roni mi ki rogo gaoni amaku; mi ima roga ha ni rengo, bambiko oni amaa nga gi pai ku kpotoroni yo te.

³Oni ngére, mi azá awironi, mi ki be regbo nya kpakpuroni yo, nga kina regbo gaoni amotumo, mi ki rogo roni ku sa yo bara bangire

⁴Si du oni ka ina ti ni ya mi nakedi gi rugute re fu roni, ya gi mokido na Revi nye anye, wo poi Yekova nga ga arimbasa ko.

⁵Gi mokido na ko nangia mokido unga na zereda, mi ki fu he fu ko, ya ko gunde; ko ki gunde ti re, ko ki du na gunde ti rimore a.

⁶Ndikidi rugahe adu ngbako yo, irairapai adu nga ngbako yo te. Ko ata na mi rogo zereda na rurupai, ko ki sa dungu aboro ti irairapai.

⁷Bambiko ngba boromotumo ka abanda inahe, aboro ki nigbata rugapai ngbako, bambiko ko nga ga Yekova mokedi nga ga arimbasa ko.

⁸Ono oni sa tironi ku bani ti gu pai re; oni kotosi dungu yo ni gaoni rugapai; oni wasi gu mokido nga ga Revi, wo poi Yekova nga ga arimbasa ko,

⁹mi ki mangi roni a oni du ni wasiwasi roni ni umbasiumbasi roni ku bangiri aboro dunduko, bambiko wa oni aka nga kuti gimi apai ya ono oni ki yugu kparakparapai rogo gaoni rugapai.”

¹⁰A nga barani sa dunduko te? A nga Mbori sa fu rani te? Tipagine tie zanga ani manga pa akuarani ti ni, ki nigbarasi ga abarani mokido?

¹¹Yuda ki zanga pa manga ha, gbegberẽ kere pai ki du ni mangimangi he dagba aYisaraere na ku Yerusarema yo; bambiko Yuda gbarasi gu ziazia ba nga ga Yekova, nga gu ko akpi nyemu he, Yuda ki di de dagba agu yo yo nairisa kungba mbori.

¹²Yekova rogo agu yo ku sa yo ti abamburoko nga ga Yakoba, ka du ni adezire, bambiko gu boro mangi gere, watadu gu ni ka karaga pai, watadu ka ye na motumo nga ga riahe fu Yekova nga ga arimbasa ko!

¹³Gere nga gu oni namanga ha a. Oni naukadi ga Yekova bamotumo na aume, na kpe na uko bambiko ko aberã nga pa motumo watadu dia ha na inapai be roni te.

¹⁴Oni sana he, “Tipagine ko adia nga ha ti ni ya?” Bambiko Yekova adu ni dezire tipa gu mokido naadu dagba roni na de parangaroni, nga agu yo oni ambu yo ka i vura du ni gaoni badiata vuru ni diaroni rogo pa ndika a vurũ.

¹⁵A nga gu bangisa Mbori nasongoda gu toro nga ga unga fu rani te? Gini he ko akpi nyemu he? Si nga tungaroni du ni agunde ti Mbori. Si du oni bánda tironi, ka boro du nga ni gu ni mbu de parangani ya.

¹⁶“Bambiko mi nasoga pa mbu de, wo poi Yekova nga ga aYisaraere Mbori, na pa dada ga boro roko ni zuu, wo poi Yekova nga ga arimbasa ko. Si du oni bánda tironi ka oni adú nga ni aboro zire ya.”

¹⁷Oni mbusi Yekova ni fugoroni. Ono oni naya, “Waĩ mbusi ani ko?” Mbiko ya oni, “Agu yo dunduko namanga gbigbitapai i ngba bangiri Yekova, rago angba ti ko mbiko yo.” Watadu ni sana he, “Wari du Mbori ni nasara ngbanga ni ruru he?”