Read zande Matayo 10 Bible Online

Matayo 10 - zande bible

Matayo 10

¹Yesu ki yambu gako abawiriki nanidu bawe na ue fuo ko, ki asia pa kusa gbigbita atoro fu yo i nido ra, ki nihusi ngbatunga akaza dunduko, na ngbatunga awokote du.

²Were agu amokedi nanidu bawe na ue rimoyo nga gere: bambata ko, nga Simona, i aya ti ko Petero, na Andarea nga wirinako; Yakoba wiri Zebedayo, na Yoane nga wirinako;

³Firipo, Barutoromayo; Toma, na Matayo nangia barogo marã ngbeti; Yakoba wiri Arafayo, Tadayo;

⁴Simona nangia Kanano, na Yuda Keriota, gu ko nakusi Yesu.

⁵Agi yo bawe na ue re Yesu akedi yo, ki ta ruga yo niya, “Ka oni ndú nga ngba ga aGendiria gene ya, ka oni rimi nga ku rogo bakporo nga ga aSomorono wa sa ya;

⁶ono oni ndú sa gu ingiingi akandoro nga ngbatunga aYisaraere.

⁷Wa oni ka ndu, oni ta tungusa pai, niya, ‘Gu ngbi nga ga ngbangbaturũ si mbedi.’

⁸Oni husi akaza, ki nizingisi kangba aboro, ki nigirisi aboro ngbataka, ki nidandi adaimona. Wa i nafuku ahe fu roni gbe, oni fúku he tigaoni kina wo.

⁹Ka oni moi nga dahabu, na feda, na tara ku rogo gaoni amangu ya;

¹⁰ka oni rogo nga mangu tipa gaoni nunguro ya, baukadi ue a te, rakata te, na ngbondo a te; bambiko bamangisunge re na gani riahe.

¹¹Gu bakporo na gu kporo oni ka rima ku rogo, oni gbáta gu boro du ho rengbe na dia roni ku gume, oni ki sungu yo daho oni ka guari ni.

¹²Oni ki ta rima ku bambu yo, nipoi kuti aboro.

¹³Ka gu bambu rengbe tipa roni, gaoni zereda ki ye ku ri he. Ono ka si arengba nga tipa roni ya, gaoni zereda ki karaga tihe fu roni.

¹⁴Gu ni ka dia nga roni ku gume ya, ka ni agia nga sangbaroni ya, ho oni ka kura ni rogo gu bambu re na bakporo a, oni ki tadi nvutu ti nduroni.

¹⁵Ya mi fu roni ni rengo, rago sapangbanga, gu pai nikadu fu ringara Sodoma na Amora si agberã nga wa ga gu bakporo te re.

¹⁶“Oni ngére, mi nakeda roni wa kina akandoro dagba awaru. Oni dú na tatamana wa kina awo, oni ki zere wa kina ambipo.

¹⁷Ono oni bánda tironi ti aboro, bambiko i afu roni ku be abororondo, i atáka roni abambutiria yo;

¹⁸ii, i andú na oni ku barangba agbia na abakindo mbiko re, si yugu pai fu yo na aGendiria a.

¹⁹Ono ho i ka fu roni ni, ka oni báki nga bangironi ya oni ayá wãi na gini pai oni ka gumba ha ya; bambiko i afú agu apai fu roni oni ka gumba ni gu rago re.

²⁰Mbiko si adú nga wa oni nikagumba ha te, ono ga Baroni Ziazia Toro nikagumba ha ku rogo roni yo.

²¹Boro afú wirinani fu kpio, ba gude ki fu wirini; agude nikazinga kuti avunguyo, ki fu yo fu kpio.

²²I asóga roni dunduko tipa rimore. Ono gu ni ka hi pai dati yangara rago kindi, i abátasa gu ni abatasa re.

²³Ono ho i ka rungosi roni ni rogo gu bakporo re, oni óro ku rogo kura ha; bambiko ya mi fu roni ni rengo, oni atá nga rogo ga aYisaraere abaakporo dunduko mbata Wiri boro nikaye te.

²⁴“Bawiriki nasusa nga gani bayugupai te, kanga nasusa nga gani gbia a te.

²⁵Si rengbe bawiriki du wa kina gani bayugupai, kanga ki du wa kina gani gbia. Ka i ya ti baira kporo Barazebuba, i ape he kina wo ki susi tipa agu yo du rogo gako kporo!

²⁶“Ka oni gúnde nga be aboro tie ya; mbiko a nga he sa ni dadidadi he, i ka he kusa ha te; a nga he sa du ni okooko ho, i ka he ina pa ha te.

²⁷Gu pai gumba mi fu roni bitimo, oni gúmba ha ku imarago yo. Gu pai oni agia tue yo, oni túngusi he ri bambu yo.

²⁸Ka oni gúnde nga be agu yo naimo kpotoboro ya, ka i rengbe nga ka imo mbisimo te. Ono oni gúnde ti gu ko rengbe ka gbarasa mbisimo na kpotoboro a ku Geyena yo.

²⁹I nabaga abavurukporo ue tipa rukutu marã sa, te? a nga gu ru sa dagba ra ka ti nga ku sande gi bangiri Baroni te.

³⁰Ono mangerironi tigaha ni gedigedi he dunduko.

³¹Were, ka oni gúnde nga ya; genoroni susi geno dungu abavurukporo.

³²“Were, gu ni nikakusa pa re ku bara bangiri aboro, mi akúsa pa ni a tigimi ku bara bangiri Buba du ngbangbaturũ yo.

³³Ono gu ni ka oro rimore ku bara bangiri aboro, mi aóra rimoni ku bara bangiri Buba du ngbangbaturũ yo.

³⁴“Ka oni bérẽ nga ha ya mi aye ka maa zereda zegino ya; mi aye nga ka maa zereda te, ono kina baso!

³⁵Bambiko mi aye ka maa kangu dagba ba gude na wirini, na dagba degude na nani, na dagba de na nakumbari;

³⁶avura boro angia kina gani aborokporo.

³⁷Gu ni ka kpi nyemu bani na nani ki susi re, ni are nga na mi te. Gu ni ka kpi nyemu wirini nga kumba na wirini nga de ki susi re ni are nga na mi te.

³⁸Gu ni ka atumba nga gani wagiwagi ngua ki nipeke re ya, ni are nga na mi te.

³⁹Gu ni ka bi ungani ni aingisa ha aingisa; na gu ni ka ingisa ungani tipa re ni abí he.

⁴⁰“Gu ni ka di roni ku gume ni di re, na gu ni ka di re ku gume ni di gu ko naakedi re.

⁴¹Gu ni ka di nebi ku gume ni rimo nebi ni adia mosoro nebi. Gu ni ka di ruru boro ku gume ni rimo ruru boro, ni adia mosoro ruru boro.

⁴²Gu ni ka fu kina inga na zezere ime fu gu ni sa dagba gi rukutu agude re, ni rimo bawiriki, ya mi fu roni ni rengo, ni ahe nga dia gani mosoro wa sa te.”