Read zande Matayo 11 Bible Online

Matayo 11 - zande bible

Matayo 11

¹Si ki ta du wa gere, ho Yesu anyasi ruga gako abawiriki ni nanidu bawe na ue, ko ki guari yo ki ta yugo pai nitungusi pai rogo gayo abaakporo.

²Were ho Yoane agi pa ga Kristo mangimangi apai ni bambukisa yo, ko ki kedi gako abawiriki, i sana Yesu ki ya,

³“A ngia gu ni naye nga mo, na ani ka ngera ti gu kura ni?”

⁴Yesu ki ta karaga ha fu yo niya, “Oni ndú ki yugu agu apai fu Yoane gi oni na gu bi oni:

⁵airavurari nangera, airaterenga ki nita, airangbataka ki nihu; airangbianga ki nigi apai, kangba aboro ki nizingi be kpio, i ki nitungusi wene pangbanga fu rungorungo aboro.

⁶Boro maku nga gu ni abi nga úkota ti re ya.”

⁷Wa agi yo aguari re ki nindu ngba gayo gene, Yesu ki tona ya fu rimbasa aboro tipa Yoane wẽ, “Oni andu ku ngbakungba yo ka bi gine? nganzi nawo be yuge?

⁸Ono oni andu ka bi gine? kumba navo rurungbura roko? Oni ngére, agu yo navo rurungbura roko i du ku abakindo yo.

⁹Ono tipagine oni andu ti ni? ka bi nebi? Ii, ya mi fu roni wẽ, ko susi nebi bakere gbe.

¹⁰Nga gi ko re i ake he tipa ko ya, ‘Mo ngére, mi nakeda gi sunge mbata yo foro, Ko ambákada ga gene ku mbata yo foro.’

¹¹Ya mi fu roni ni rengo, dagba agu yo ade avunga yo, a nga gu ni sa susi Yoane Babapatiza te. Ono gu ni du ni umba pa aboro rogo gu ngbi nga ga ngbangbaturũ ni susi ko.

¹²Tona ti rago Yoane Babapatiza, gu ngbi nga ga ngbangbaturũ nahi vura da ku awere, aboro vura nadia ha bambiko gbe he.

¹³Bambiko anebi dunduko na rugute i afugu pai dati rago Yoane.

¹⁴Ka oni idi pa gayo apai, gi ko re nga Eriya nikaye.

¹⁵Gu ni du na tu gia ha, ni gi nga ha.

¹⁶“Gi rika aboro re mi aríngbisa yo kuti gine? I wa kina agude nasunga bangbeahe yo, ki niyambu akurayo,

¹⁷ki ya, ‘Ani abi bia fu roni, ka oni ado nga ya; ani ata wawa, ka oni akpara nga ya.’

¹⁸Bambiko Yoane aye ka ko ari nga he ki nimbiri he ya, i ki ya, ‘Daimona namanga ko.’

¹⁹Wiri boro aye ki niri riahe nimbiri he, i ki ya, ‘Oni ngére, boro aramana, bambiri imekakue, badia abarogo marã ngbeti na aboro ingapai!’ Ono i asapa ngbanga fu tatamana mbiko sabehe.”

²⁰Ko ki tona paa na agu abaakporo ko amangi dungu gako apai du na tandu rogo yo, bambiko i asa nga gayo berã te.

²¹“Na gberẽ he foro, Korazina! na gberẽ he foro, Betesaida! bambiko ka i amangi agu apai du na tandu rogo Tura na Sidona yo a wa I amangi he rogo roni yo, ka i asa gavo berã ki vo mbuzaroko, ki mbedi kuke.

²²Ono ya mi fu roni wẽ, rago sapangbanga, pai angbá fu Tura na Sidona ki susi gaoni.

²³Mo, Kaparanauma, i atúmba ro ku ngbangbaturũ yo? i azógosa ro ku Adisi yo bambiko ka i amangi agu apai du na tandu rogo Sodoma a wa i amangi he rogo ro yo, ka si anye ki da ti gi rago re.

²⁴Ono ya mi fu roni wẽ, rago sapangbanga, pai angbá fu Sodoma ki susi gaoni.”

²⁵Nigu rago Yesu ki ya, “Mi natambuaro, Ako Buba, Gbia ngbangbaturũ na sende, bambiko mo aoko agi apai re bangiri airatatamana na arugutinapai, ki kusi he fu fogo agude;

²⁶ii, Buba, bambiko wo si angba bangiro.

²⁷Buba afu ahe ku bere dunduko, a nga boro sa ini Wiri te, kina Ba; a nga ni sa ini Ba a te, ki na Wiriko, na gu ni Wiriko akpi nyemu ka kusa ko fu ni.

²⁸Oni yé fuo re, agu roni nambu dunduko, ki du na rõrõi tindiro, mi ki fu ongoda fu roni.

²⁹Oni di gi gonga ku gorõroni, ki wiriki pa re; bambiko bayee boro nga mi nga irazerangbaduse, oni ki bi ongoda tipa mbisimoroni.

³⁰Bambiko kii nga gi gonga te, na gi tindiro ni aakpura ha.”