Read zande Matayo 12 Bible Online

Matayo 12 - zande bible

Matayo 12

¹Ni gu rago re Yesu ki nita rago sabiti ku ati vunde yo; gomoro ki nimangi gako abawiriki, i ki nisiri vunde, ki niri ne.

²Ono ho aFarusi abi he ni, i ki ya fu ko, “Mo ngére, gamo abawiriki namanga gu pai aru nga manga ha rago sabiti ya.”

³Ono ko aya fu yo, “Oni ageda nga gu pai Dawidi amangi ni gu rago gomoro amangi ko, na agu yo naadu na ko te?

⁴wa ko arimi ku rogo ga Mbori bambu yo ki ri ga Mbori kpokuta yugopai, gu aru nga ko ri he na agu aboro naadu na ko ya, ono tipa kina abairamotumo.

⁵Na oni ageda nga ha rogo rugute, wa abairamotumo awasi rago sabiti yekaru yo te? ono i azanga pai ku ri yo.

⁶Ono ya mi fu roni, bahe du no susi yekaru.

⁷Ono ka oni ini ndu gi pai re, ya, ‘mi nakpi nyemu weneringise, motumo te,’ ka oni akita nga ngbanga agu yo ru sa yo ya.

⁸Bambiko Wiri boro nga gbia sabiti.”

⁹Yesu Ki guari yo, ki rimi ku rogo gayo bambutiria.

¹⁰Oni ngére, kumba adu yo na kurugbo beko. I ki sana ko, ki ya, “Ru husa boro aru rago sabiti?” i kiti ngbanga ko.

¹¹Ko ki ya fu yo, “Da du dagba roni kandoro du be ni sa ka u ti ku due yo rago sabiti, ni azia nga ru ka kusa ru te?

¹²Geno boro asusa nga kandoro bakere gbe te! Were ru manga wenepai aru rago sabiti.”

¹³Ko ki ya fu kumba, “Mo tãi bero.” Ko ki tãi he; si ki du teketeke wa kina gu.

¹⁴Ono aFarusi ki kuru, ki gumba rondo imo ko.

¹⁵Ho Yesu aini he ni, ko ki guari yo. Dungu aboro ki nipeke ko, ko ki husi yo dunduko,

¹⁶ko ki rugu yo ya ka i gumba nga pa ko ya,

¹⁷gu pai dũ ni digisidigisi he i agumba ha ku ngba Yesaya nga nebi, naya,

¹⁸“Oni ngére, gi moyambu gu ko sia mi ko; ko mi akpi nyemu ko, rago nangba ti mbisimore mbiko ko. Mi amáa Torore ri ko, ko nikayugo pa sapangbanga fu aGendiria.

¹⁹Ko ati nga kangu na aboro te, ko apáa nga ku ari te; a nga boro sa nikagia fugoko ngba agene bakporo te;

²⁰ko akita nga kamakama nganzi te, gu remu du pidapida ko abísa nga ha te, daho ko ka kusa ruru sarangbanga ni ni diabese;

²¹maabangirise adú fu aGendiria mbiko rimoko.”

²²I ki ye na boro koyo du Yesu ni nadu na daimona, nga gu ko nadu na vurari na kisikisi ngbako. Ko ki nusi ko, boro kisikisi ngba ki ta fura ki ningere.

²³Rimbasa aboro dunduko ki nikigi akiga, niya, “A nga wiri Dawidi du te re?”

²⁴Ono ho aFarusi agi he ni, i ki ya, “Gi kumba re nadanda adaimona vurube kina Barazebuba nga gbia adaimona.”

²⁵Ko ki ini gayo berã ki ya fu yo, “Gu ngbi dunduko du ni kparakpara ha ni sa ha si apáya apaya; gu bakporo dunduko na gu bambu du ni kparakpara ha ni sa ha si arú nga te.

²⁶Ka Satana do Satana, ko du ni kparakpara ko; gako ngbi awira pa ru wãi?

²⁷Were ka mi do adaimona vurube Barazebuba, awironi nado ra vurube da? were kina yo ka du ni gaoni abasapungbanga.

²⁸Ono ka mi do adaimona vurube ga Mbori Ziazia Toro, ga Mbori ngbi ima da fu roni.

²⁹Gini boro rengbe na rima ku dimo ku gu kumba nga iraome, ka roga gani ahe, ka ni avo nga iraome mbata ya? fuo gure ni nikaroga ahe bambu yo.

³⁰Gu ni ka du nga na mi ya vurare nga ni; gu ni ka dungura nga ahe wa sa na mi ya, ni nagbandaka ha.

³¹Si du ya mi ti ni fu roni, i avú aboro avu ti gbegberẽapai na gberãngba yo dunduko; ono i avú nga gu ni nagberã ngbani yo fu Ziazia Toro te.

³²Ka boro gumba gbegberẽ pai kuti Wiri boro, i avú ni avu ti gure; ono gu ni ka gberã ngbani yo fu Ziazia Toro, i avú nga ni ti gure te, rogo gi ngbi re, na gu ngbi nikaye sa yo.

³³“Watadu sa ngua ni wene he, na zuzuhe ni wene he a; na sa ngua ni gbegberẽ he, na zuzuhe ni gbegberẽ he: oni mángi gu sa, bambiko i aína ngua ti zuzuhe.

³⁴Oni nga awiri awo, wa du oni ni gbegberẽ aboro, oni awira pa gumba wenepai wãi? bambiko ngba boro nagumba gu pai dũ kpotoni yo.

³⁵Gu wene boro du na wene kumuko ni nakusa wene ahe, na gu gbegberẽ boro du na gani gbegberẽ kumuko ni nakusa gbegberẽ ahe.

³⁶Ya mi fu roni wẽ, agu apai dunduko aboro ka gumba ha gbua, i aríngbisa paha aringbisa rago sapangbanga.

³⁷Bambiko i asápa ngbanga foro kuti gamo apai, i ki sapu ngbanga ro kuti gamo apai.”

³⁸Agu yo dagba abakeapai na aFarusi ki ta karaga ha fu ko niya, “Bayugupai, ani nakpi nyemu mo yugu gu pai i aina apai ti ni fu rani.”

³⁹Ono ko ki karaga ha ki ya fu yo, “Gbegberẽ rika airabari nagbata gu pai i aina apai ti ni, ka i fu nga gu pai i aina apai ti ni fu yo ya ono kina gu nga ga Yona nangia nebi.

⁴⁰Bambiko wa Yona adu vuru batĩo yo uru ki du biata na yuru biata; kina wo Wiri boro ka du ni vuru sende yo uru ki du biata na yuru biata.

⁴¹Rago sapangbanga aboro Nineve arú na gi rika aboro re, ki gbarasi ngbanga fu yo; bambiko i asa gayo berã mbiko ga Yona tungusapai fu yo; oni ngére, gu ko du erẽ nga bahe ti Yona.

⁴²Nakindo rago ku sudi yo nikamo ku ari rago sapangbanga kuti gi rika aboro re, ki gbarasi ngbanga fu yo; bambiko ri aye digida sende yo ka gia gu tatamana nga ga Soromo; oni ngere, gu ko du erẽ nga bahe ti Soromo.

⁴³“Ono ho gbigbita toro akuru ni kpotoboro yo, u ki merẽ ku kungba rago yo, ka gbatabaongoda, kauabingahaya.

⁴⁴Were u ki ya, ‘Mi akáraga tire ku rogo gi bambu ho mi akuru ni.’ Ho u ada ni, u ki Di he gbua, ni wegewege he, ni tata ha.

⁴⁵Were u ki ndu ki rogo kura atoro fuo ru saba susi u na gberã, ami ki rimi ki sungu yo. Were gu pai nga ga gu boro re si ki gberẽ ti gu naadu mbata. Pai adú kina wo fu gi gbegberẽ rika aboro re.”

⁴⁶Wa Yesu afura na rimbasa aboro, oni ngére, nako na awirinako ki ru zegi yo, ki nikpi nyemu ka fura na ko.

⁴⁷Gu ni sa ki ya fu ko, “Mo ngére, namo na awirinamo ru zegi yo, i nakpi nyemu ka fura na mo.”

⁴⁸Ono ko ki ta karaga ha fu ko niya, “Da nga nina? na da nga awirinami?”

⁴⁹Ko ki tãi beko fuo gako abawiriki, ki ya, “Oni ngére, nina na awirinami!

⁵⁰Bambiko gu ni ka manga sangba Buba du ngbangbaturũ yo, ni nga wirinami, ni nga dawire, na nina.”