Read zande Matayo 13 Bible Online

Matayo 13 - zande bible

Matayo 13

¹Ni kina gu rago re Yesu ki kuru dimo yo, ki ndu ka sunga pati baime.

²Were bakere rimbasa aboro ki tiria koyo fuo ko, ko ki rimi ku kurungba yo, ki sungu yo; bakere rimbasa ki rundu pangba ime dunduko.

³Ko ki gumba dungu apai fu yo ni sanza, ki ya, “Oni ngére, bamitunga akuru ka ndu ka mi tunga;

⁴wa ko ami he, gu ki tiwi ku pangba gene, azire ki ye ki riti he.

⁵Gu kura ha ki tiwi ku dagba ambia, ho sende nanaga nga ni ya. Si ki kuru ni ipo, bambiko sende anaga nga auru he te.

⁶Ho uru afaa ni, si ki ugu auga; bambiko tarãha arima nga te, si ki kpi akpi.

⁷Gu kura ha ki tiwi ku dagba akiwe yo; akiwe ki sono asona, ki kandasi he.

⁸Gu kura ha ki tiwi ku rogo mbudu sende, ki nizuku, wa 100, watadu 60, na 30.

⁹Gu ni du na tu gia ha ti ni, ni gi he.”

¹⁰Abawiriki ki ye, ki ya fu ko, “Tipagine mo agumba pai ti ni fu yo ni kina sanza?”

¹¹Ko ki ta karaga ha fu yo ki ya, “I fu he roni oni ini gu gbugbu pai nga ga gu ngbi nga ga ngbangbaturũ!, ono i afu nga ha fu yo te.

¹²Bambiko gu ni du he be ni, i afú he fu ni ni adú na ahe kpaima; gu ni adu nga he be ni ya, i adia gu du be ni.

¹³Were mi nagumba pai fu yo ni asanza; bambiko i nangera ono i abi nga he te; tue ti yo ono i agia nga pai na ni te, i aruga nga tiyo na ni a te.

¹⁴Were gu pai Yesaya agumba adu ni digisidigisi he fu yo, nga, ‘Oni agía pai agia, ono oni arúga nga tironi na ni wa sa te, oni angéra angera ono oni abi nga he wa sa te.

¹⁵Bambiko kpoto gi rika aboro yo re asa tihe ni dokoyo ho, tuyo ni ngbangbangba ha, i kisi bangiriyo; i ka bi he ni bangiriyo, ki gi pai ni tuyo, ki ini he kpotoyo yo, ki sa tiyo berewe, mi ki husi yo.’

¹⁶Bangironr ni betedi he, bambiko si nabi he; na turoni, bambiko si nagia pai.

¹⁷Bambiko ya mi fu roni, dungu anebi na ruru aboro akpi nyemu ka bi agu apai oni abi, ono i abi nga ha te; na ka gia agu apai oni agia, ono i agia nga ha te.

¹⁸“Oni gi gu sanza nga ga bamitunga tie.

¹⁹Ho ka gu boro gi gu pangbanga ni nga ga ngbi, ka ni aruga nga tini na ni ya, gbegberẽ ko ki ye, ki dufu gu tunga i ami ku kpotoni yo. Gere nga gu i nimi ku pangba gene.

²⁰Gu i nimi ku dagba ambia, si nga gu ni nagia gu pai re ki di he ni ipo ni ngbarago;

²¹ono ka tarãha adu nga kpotoni yo ya, ni ki ru ngbutuko; ni gu rago rungo nida na rungosi tipa gu pai re, ni ki koto akota ni ba sa.

²²Gu i nimi ku dagba akiwe, si nga gu ni nagia gu pai re; berã pa zegino, na gu nanga he nga ga ũkumuko, ki kandasi gu pai re, ka ni azunga ya.

²³Guinimikurogo mbudu sende, si nga gu ni nagia gu pai re, ki rugu tini na ni; ni ki nizuku azuka ni rengo, ki nge ange, gu wa 100, gu wa 60, gu wa 30.”

²⁴Ko ki yugu kura sanza fu yo, ki ya, “I aringbisi gu ngbi nga ga ngbangbaturũ kuti gu ni nami wene tunga rogo gani ati;

²⁵ono ho i ara ni, vurani ki ye ki mi rende dagba morú, ni ki ga.

²⁶Ono ho morú akuru ni, ki zu rindihe, rende ki kuru a tigaha.

²⁷Ga irakporo aboro sunge aye ki ya fu ko, ‘Baira, a nga wene tunga mo ami rogo gamo ati te? mangi he wãi gbegberẽ rende akura ti ni?’

²⁸Ko ki ya fu yo, ‘Vurare nimangi gere’. Aboro sunge ki ya fu ko, ‘Ka si du were mo nakpi nyemu ani ndu ka mo ho?’

²⁹Ono ko aya, ‘Oó; ka oni mo rende, oni mo morú amo na ni a.

³⁰Oni he he si sono wa sa dati rago ke he. Ni gu rago i ka ke he mi aya fu abakehe, Oni rógodi rende mbata, ki vodi he avoda ka zo ho; ono oni rógodi morú ku rogo gi gbamu.’ ”

³¹Ko ayugu kura sanza fu yo, ki ya, “Gu ngbi nga ga ngbangbaturũ si wa tunga musutada, kumba adi he, ki mi he rogo gako ati.

³²Si du ni toni he ti atunga dũ; ono ho si ka kura ni, si ki du ni bakere he susi wiri angua dũ, ki sa tihe wa ngua, agu azire du ari yo ami ki ye ki nisusungu ti abehe.”

³³Kura sanza ko agumba ha fu yo; “Gu ngbi nga ga ngbangbaturũ si wa kina agbooro, de adi he, ki oko ho ku rogo ringbisiringbisi ngungo biata, daho si angbi ni rogo ho dunduko.”

³⁴Agi apai re dunduko Yesu agumba fu rimbasa aboro ni asanza; pai ho sa ko ahe gumba ha fu yo ni sanza te;

³⁵gu pai ki du ni digisidigisi he nebi agumba ha, naaya, “Mi aza ngbare ni asanza, mi agumba agu apai naadu ni okooko ho tona ni gu rago i aenge zegino.”

³⁶Were Yesu ki guari pati rimbasa aboro, ki rimi ku bambu yo; gako abawiriki ki ta ye fuo ko, niya, “Mo yúgu gu sanza fu rani re du tipa rende ati yo.”

³⁷Ko ki karaga ha ki ya fu yo, “Gu ni nami wene tunga ni nga Wiri boro;

³⁸gu ati re nga zegino; wene tunga nga awiri ngbi; rende nga awiri gbegberẽ ko.

³⁹Gu vura re naami he ni nga bakitingbanga; rago ke he nga ho zegino ka nyasa ni; akehe nga amaraika.

⁴⁰Were wa i adungura rende ka zo ho ku we yo; wo si ka du ho zegino ka nyasa ni.

⁴¹Wiri boro akéda gako amaraika, i adúngura agu ahe dunduko rogo gako ngbi aboro nakota ti ni, na agu yo dunduko namanga gbegberẽ pai,

⁴²ki bafu yo ku gbigiwi we yo; yo kpe ka du ni na ri ngba rinde.

⁴³Ni gu rago re ruru aboro ahasa rago wa kina uru rogo ga Bayo ngbi yo. Gu ni du na tue ti ni ni gí he.

⁴⁴“Gu ngbi nga ga ngbangbaturũ du wa kina bakere mosoro i aoko ho ku rogo ati yo; nga gu gu ni abi he, ki nioko ho; mbiko ngbarago ni ki ta ndu nibagi gani ahe dunduko, ki ningbe gu ati re.

⁴⁵“Gu ngbi nga ga ngbangbaturũ du wa kina babagiahe, nagbata wene ambia fongo.

⁴⁶Ho ni abi gu sa ni na bakere genoho, ni ki ndu ka baga gani ahe dunduko, ki ningbe gu mbia fongo re.

⁴⁷“Gu ngbi nga ga ngbangbaturũ du wa kina pio atĩo, i are he baime yo, i ki zi ngbatunga atĩo dunduko;

⁴⁸ho pio ahi ni, i ki gbe he ku pangba ime; i ki sungu, ki rogodi wene atĩo ku pere yo, ono agu ra nga gbegberẽ ra, i ki bafu ra.

⁴⁹Kina wo si ka du ho zegino ka nyasa ni; amaraika akúra, ki kpara gbegberẽ aboro ti wene yo,

⁵⁰ki bafu yo ku gbigiwi we yo, yo kpe ka du ni na ri ngba rinde.

⁵¹“Oni rugu tironi na agi apai re?” I ki ya fu ko, “Ii.”

⁵²Ko ki ya fu yo, “Were gu bakeapai i asa ni ni du ni bawiriki gu ngbi nga ga ngbangbaturũ, ni du wa gu kumba du ni irakporo, nakusa vovo gani kumuko na kuru he.”

⁵³Si ki ta du wa gere, ho Yesu anyasi agi asanza ni re, ko ki guari yo.

⁵⁴Ko ki da ku rogo gako ringara ko ki yugu pai fu yo rogo gayo abambutiria yo, si ki niiriwo airiwo ti yo, i ki ya, “Wari ga gi kumba tatamana aye ni re, na gi gako apai du na tandu re?

⁵⁵A nga wiri basekengua nga gi ko te re? ya yo ti nako Maria te? du awirinako nga Yakoba, na Yosefa na Simona, na Yuda te?

⁵⁶A nga adawiriko du ẽre na ani dunduko te? Wari rogo gi kumba agi apai ni re dunduko?”

⁵⁷I ki gberẽ agberã kuti ko. Ono Yesu ki ya fu yo, “A nga nebi sa ka zanga irisa te, kina gu ka ni du rogo gani ringara na kpuni yo.”

⁵⁸Ko amanga nga dungu agu apai du na tandu yo te mbiko gayo zanga idapase.